कप्तान बिक्रमद्वारा सम्झौता नवीकरण

काठमाडौं । ललितपुरको 'ए' डिभिजन क्लब थ्री स्टारले बिहीबार कप्तान बिक्रम लामासँगको सम्झौता नवीकरण गरेको छ ।

थ्री स्टारले कप्तान बिक्रमसँगको सम्झौता नवीकरण गरिएको जनाएको छ ।  

सहिद स्मारक 'ए' डिभिजन लिग र राष्ट्रिय लिग नजिकिदै गर्दा थ्री स्टारले कप्तान बिक्रमसँगको सम्झौता नवीकरण गरेको हो ।

'ए' डिभिजन लिग कात्तिक २९ बाट सुरु हुनेछ । राष्ट्रिय लिगको मिति भने तय भएको छैन ।

कप्तान बिक्रमले ११ वर्षयता थ्री स्टारबाट खेलिरहेका छन् ।

'म धेरै खुसी छु थ्री स्टारमा आबद्द भएको १२ वर्ष पुगेको छ । यस वर्ष धेरै उतार चढाव, त्याग र कडा मेहनतसँगै बित्यो ।  थ्री स्टार मेरो लागी घर जस्तै हो र सबै मेरो परिवार हो,' सम्झौता नवीकरणपछि बिक्रमले भने, 'म सँधै थ्री स्टार परिवारप्रति आभारी छु ।'

यस्तै कप्तान बिक्रमले यस सिजन थ्री स्टारलाई उपाधि दिलाउन खेल्ने बताए ।

'हाम्रो टिममा उत्कृष्ट खेलाडीहरु छन् । यहाँ सबैको लक्ष्य छन् र मलाई विश्वास छ की हामी लिग उपाधि जित्न कडा संघर्ष गर्नेछौं,' उनले थपे ।

थ्री स्टारले यस अघि मिडफिल्डर आयुश घलान र डोना थापालाई अनुबन्ध गरेको थियो ।

यस्तै डिफेन्डर अनन्त तामाङ,मिडफिल्डर सन्जोक राई र निशान खड्कासँगको सम्झौता नवीकरण गरेको थियो  ।

थ्री स्टारले उर्जन श्रेष्ठलाई मुख्य प्रशिक्षकको जिम्मेवारी समेत दिएको छ  ।