बुटवल । नेपाली क्रिकेट समर्थक समाज (एनसीएसएस) जिल्ला समन्वय समिति रुपन्देहीले क्रिकेट प्रशिक्षक जंगबहादुर थापालाई सम्मान गरेको छ ।
एनसीएसएस रुपन्देहीले शनिबार आफ्नो पाँचौ वार्षिक साधारण सभाको अवसरमा प्रशिक्षक थापालाई नगद १० हजारसहित सम्मान गरेको हो ।
नेपालका राष्ट्रिय तथा अन्तराष्ट्रिय खेलाडी उत्पादनमा जीवन समर्पण गरेको भन्दै भैरहवाको क्रिकेटमा लामो समयबाट खटिदै आएका थापालाई सम्मान गरिएको हो ।
सम्मानित भएपछि बोल्दै थापाले यस सम्मानबाट आफुलाई निकै खुसी लागेको बताउदै समर्थकहरुको नेपाली क्रिकेटप्रतिको माया सद्भावले नेपाली क्रिकेट थप उचाईमा पुग्ने बताए ।
यस्तै एनसीएसएस रुपन्देहीले लामो समय जिल्लाको नेतृत्वमा रहदै जिल्लालाई नयाँ उचाईमा पुर्याउन ठुलो योगदान दिएको भन्दै संस्थापक अध्यक्ष तारा प्रसाद पाठक र जिल्लाको हरेक सफलतामा क्रियाशील सल्लाहकार राजु रानालाई पनि सम्मान गरेको छ ।
कार्यक्रममा सम्पूर्ण अफिसियल सदस्यलाई प्रमाणपत्र तथा परिचय पत्र बितरण समेत गरिएको थियो ।
कार्यक्रममा संयोजक मोहन ज्ञवालीले वार्षिक प्रतिवेदन प्रस्तुत गर्दै जिल्लाले वर्षभरिमा गरेका क्रिकेट गतिविधिहरुको बारेमा जानकारी गराएका थिए ।
