आयरल्याण्डविरुद्ध दक्षिण अफ्रीकाको क्लिन स्विप

एजेन्सी । दक्षिण अफ्रीकाले घरेलु टोली आयरल्याण्डविरुद्धको तीन खेलको टी-ट्वान्टी क्रिकेट सिरिजमा क्लिन स्विप गरेको छ ।

डुब्लिनमा शनिबार राति भएको तेस्रो तथा अन्तिम टी-ट्वान्टीमा ४९ रनको जित निकाल्दै दक्षिण अफ्रीकाले सिरिज ३-० ले आफ्नो बनाएको हो ।

दक्षिण अफ्रीकाले दिएको १ सय ९० रनको लक्ष्यसहित जवाफी ब्याटिङ गरेको आयरल्याण्डले २० ओभरमा ९ विकेट गुमाएर १ सय ४० रन मात्र बनाउन सक्यो ।

आयरल्याण्डका कप्तान एन्डी बलब्रिनीले सर्वाधिक २७ रन जोडे । क्रेग योङ २२ रनमा आउट हुँदा लोर्कन टुकरले १९ रन बनाए ।

पाउल स्ट्रर्लिङले १८ रन जोड्दा बारी म्याककार्थीले अविजित १३ रन बनाए ।  

दक्षिण अफ्रीकाका जर्ज लिन्डे, लिजाड विलियम्स र मुल्डेरले २/२ विकेट लिए ।

यस अघि पहिले ब्याटिङ गरेको दक्षिण अफ्रीकाले २० ओभरमा २ विकेट गुमाएर १ सय ८९ रन बनाएको थियो ।

दक्षिण अफ्रीकाका लागि कप्तान टेम्बा बाभुमाले ७२ रनको अर्धशतकीय इनिङ्स खेले ।

यस्तै रिजा हेन्ड्रिक्सले ६९ रनको अर्धशतकीय इनिङ्स खेल्दा डेभिड मिलरले अविजित रहदै ३६ रन जोडे । हेन्रिच क्लासेन ७ रनमा अविजित रहे ।

आयरल्याण्डका सिमि सिंह र बारी म्याककार्थीले १/१ विकेट लिए ।