मोटो रकममा कमल च्यासलमा

काठमाडौं । डिफेन्डर कमल श्रेष्ठ मोटो रकममा ए डिभिजन क्लब च्यासल युथ (सीवाईसी)मा आबद्ध भएका छन् ।

मासिक १ लाख २५ हजार रुपैयाँ पाउने गरि श्रेष्ठ च्यासलमा अनुबन्ध भएका हुन् ।

मनाङ मर्स्याङ्दी क्लबले कीर्तिमानी आठौं पटक ए डिभिजन लिगको उपाधि जित्दा कमल टिमका सदस्य थिए । 

मनाङका अधिकांश खेलाडी मछिन्द्रमा आबद्ध भएपछि मनाङले कमललाई टिमको कप्तानको जिम्मवारी दिएको थियो ।

राष्ट्रिय फुटबल टोलीका सदस्य समेत रहेका कमललाई च्यासलले असोज ३ गतेबाट सुरु हुने लिगका लागि अनुबन्ध गरेको हो ।

‘क्लबबाट राम्रो प्रस्ताव आयो । यस सिजन च्यासलबाट खेल्नेछु ।’ गत सिजन मनाङको कप्तानी गरेका कमलले खेलपाटीसँग भने ।

गत सिजन शीर्ष ६ भित्र पर्न असफल च्यासल यस सिजन लिगमा राम्रो छाप छाड्ने योजनामा छ । सोहि अनुरुप च्यासलले ठुला नाम चलेका अनुभवी खेलाडी अनुबन्धको प्रयास थालेको छ ।

गत सिजन च्यासल नवौं स्थानमा रहेको थियो । च्यासलले ३ जापानी खेलाडीलाई ए डिभिजन खेलाएको थियो । तरपनि च्यासलले लिगमा खासै प्रभाव जमाउन सकेन ।
करिब ५ बर्ष मनाङ खेलेर ललितपुरे क्लब पुगेका कमलले पहिलो पटक च्यासलको जर्सी लगाएर ए डिभिजन लिग खेल्न लागेका हुन् । यसअघि उनले च्यासलबाट सी डिभिजन लिग खेलेका थिए ।

‘च्यासल क्लबसँग राम्रो योजना छ । खेलाडीलाई खेल्ने वातावरण छ । अब होम ग्राउन्डसंगै दैनिक अभ्यासका लागि मैदान समेत छ । क्लबले इच्छा देखाएपछि अनुबन्ध हुने निर्णय लिए ।’ कमलले भने ।

नेपालले बंगबन्धु गोल्डकप, एएफसी सोलिडारिटी कप, १२ औं दक्षिण एसियाली खेलकुद (साग) को स्वर्ण पदक जित्दा कमल राष्ट्रिय टिमका महत्वपुर्ण सदस्य थिए ।

यसअघि ब्वाईज युनियन क्लबबाट एक सिजन खेल्दै ए डिभिजन यात्रा तय गरेका कमलले त्यसपछि ५ बर्ष मनाङ मस्र्याङ्दी क्लबबाट खेलेका हुन् ।

यस अवधिमा उनले मनाङबाट ए डिभिजन लिग सहित मोफसल र सिक्किममा आयोजना हुने गभर्नस गोल्डकप लगायत धेरै प्रतियोगिताको उपाधि हात पारेका थिए ।

लिग च्याम्पियनको हैसियतले मनाङ एएफसी कप च्याम्पियनसिपको समूह चरणमा खेल्दा कमल समेत टोलीका सदस्य थिए ।

कमलले जेठ १ गते समाप्त भएको फ्रेन्चाईज फुटबल नेपाल सुपर लिगमा भाटभटेनी सुपर मार्केटको स्वामित्वमा रहेको ललितपुर सिटी एफसीको प्रतिनिधित्व गरेका थिए ।

गोलप्रथाबाट ललितपुर पुगेका कमलको १ लाख २० हजार भाउ रहेको थियो । प्रतियोगितामा पुरा ८ खेल खेलमा ६ सय ४९ मिनेट खेलेका कमलले चितवनविरुद्ध १ गोल समेत गरेका थिए ।

कमल पछिल्लो समय भने राष्ट्रिय टिम बाहिर रहँदै आएका छन् । कमलले सन् २०१६ जनवरी १९ मा माल्दिभ्सविरुद्ध डेब्यु गरेका थिए । ढाकामा भएको बंगबन्धु गोल्डकपको उपाधि नेपालले जितेको थियो ।

एन्फा एकेडेमी बाहिरका कमलले यू–१९ टोलीबाट साफ च्याम्पियनसिप उपाधि हात पारेका थिए । यस्तै उनले नेपालको यू–२१ र २३ टोलीबाट समेत खेलेका छन् ।

सर्लाहीमा जन्मिएका कमल हाल काठमाडौं मध्यबिन्दु थापाथलीमा स्थायी रुपमै बस्दै आएका छन् । च्यासल क्लब उनकै घर छेउमा छ । घर नजिकैको क्लबलाई उनी पहिलो लिग उपाधि दिलाउन चाहन्छन् ।

‘च्यासलमा पनि मनाङझै उपाधि दिलाउनु उद्धेश्य हुनेछ । क्लबलाई उपाधि दिलाउन महत्वपूर्ण भुमिका खेल्न चाहन्छु ।’ २४ बर्षीय कमलले भने ।