काठमाडौं । नेपाली राष्ट्रिय क्रिकेट टिमका लेग स्पिनर सन्दीप लामिछानेले मेलम्ची बाढी पीडितलाई सहयोग गरेका छन् ।
सिन्धुपाल्चोकको बाढी पहिरो प्रभावित क्षेत्र मेलम्ची पुगेर सन्दीपले संचालन गरेको अभियान 'टिम सन्दिप लामिछाने' ले अस्थायी टहरा निर्माणका लागि निर्माण सामग्री सहयोग गरेका छन् ।
सन्दीपले सामाजिक संजाल फेसबुकबाट अस्थायी टहरा निर्माणका निम्ति जस्ता पाता, ट्रस्ट आइरन लगायतका सामग्री सहयोग गरेको बताएका छन् ।
यस्तै 'टिम सन्दिप लामिछाने' ले मेलम्चीमा नि:शुल्क स्वास्थ्य शिविरको आयोजना समेत गरेको थियो ।
सन्दीपले गत जेठमा 'टिम सन्दिप लामिछाने' अभियानको घोषणा गरेका थिए ।
अभियानको घोषणा गर्दै सन्दीपले कोरोना भाईरसविरुद्ध लड्न ३ लाख सहयोग समेत गरेका थिए ।
सन्दीपले आफ्नो अभियानलाई जारी राख्ने समेत बताएका छन् ।
