काठमाडौं । प्रशिक्षक बालगोपाल महर्जनले एन्फा एकेडेमीका गोलरक्षक विशाल सुनारलाई थ्री नेसन्स कपका लागि पहिलो पटक राष्ट्रिय टिमको प्रारम्भिक प्रशिक्षणमा बोलाएका थिए ।
पहिलो पटक राष्ट्रिय टोलीको प्रारम्भिक प्रशिक्षणमा आएका युवा गोलरक्षक विशालले चमत्कारी प्रदर्शननै गरे ।
प्रशिक्षक महर्जन समक्ष १९ बर्षीय गोलरक्षक विशालले उम्दा खेल देखाए । विशालले टोलीका अन्य सिनियर गोलरक्षकलाई पछाडी पारे । राष्ट्रिय टोलीका युवादेखि अनुभवी खेलाडी समेत विशालको उच्च प्रदर्शनबाट प्रभावित बनेका थिए । खेलाडीले विशालको खुलेरै प्रशंसा गरेका थिए ।
त्यसैको परिणाम विशाल फ्रेन्चाईज फुटबल नेपाल सुपर लिग (एनएसएल)मा सर्वाधिक मूल्यमा बिक्री भए । एनएसएलको अक्सनमा विशाललाई सर्वाधिक २ लाखमा एफसी चितवनले खरिद गरेको थियो ।
चितवनका प्रशिक्षक थिए, मेघराज केसी । उनलाई विशालको क्षमता थाहा थियो । केसीले विशाललाई राम्रोसँग चिनेका थिए ।
जोर्डनमा भएको एएफसी यू–१९ च्याम्पियनसिप छनोट २०१९ मा नेपालको टिम हेर्ने जिम्मेवारी केसीले पाएका थिए । सोही अनुसार केसीले उज्वल मानन्धरलाई गोलरक्षक प्रशिक्षकमा झिकाएका थिए ।
यसअघि हलचोकस्थित एपीएफ मैदानमा भएको यू–१८ साफ च्याम्पियनसिपमा समेत विशालले नेपालको गोलपोष्ट सम्हालेका थिए । खराब प्रदर्शन गरेको नेपाल समूह चरण पार गर्न सकेन । विशालको प्रदर्शन औषत खालको नि भएन ।
तर उज्वलले विशाललाई एएफसी छनोटका क्रममा माझ्ने काम गरे । लेवल वान कोर्ष गरेका उज्वलले विशाललाई सकेको ज्ञान दिए । राम्रो गोल रक्षकमा हुनुपर्ने कला भर्ने काम गरे ।
विशाललाई नजिकबाट नियालेका र बुझेका प्रशिक्षक केसीले चितवन एफसीमा विशाललाईनै रोजे । उनी अनुभवी खेलाडीमा गएनन् ।
परिणाम स्वरुप विशालले उच्च प्रदर्शन गरे । चितवनमा कुनै कसर बाँकी राखेनन् ।
उनले एनएसएलको पहिलो खेलमै ललितपुरका अन्जन बिष्टको पेनाल्टी रोकेर सबैको ध्यान आफुतिर खिचेका थिए ।
पोखराविरुद्ध ८२ औं मिनेटमा रातो कार्ड खानु अघि ४ खेलमा पुरा ४ सय ४२ मिनेट खेलेका विशालले उच्च प्रदर्शन गरेका थिए । उत्कृष्ट मुभहरुलाई असफल बनाएका थिए । उनी टोलीको ठुलो हारमा संकटमोचक रहे ।
राम्रो गोलकिपरमा हुनुपर्ने बल जजमेन्ट, काउन्टर लङ बल रिलिज, फुट वक, कमान्डिङ जस्ता गुण भएकाले विशाल अहिले चर्चामा छन् ।
एनएसएल हुँदै राष्ट्रिय टिममा स्थान बनाएका उनै विशालमाथि घरेलु फुटबलको सर्वाधिक सफल क्लब मनाङ मर्स्याङ्दी क्लबले नजर लगाएको छ । सर्वाधिक ८ पटक 'ए' डिभिजन लिग जितेको मनाङले आफ्नो पोष्टको जिम्वेवारी विशाल सुनारलाई दिन चाहेको छ ।
जसका लागि मनाङको नयाँ कार्यसमिति, पूर्व क्लब ब्रिगेड ब्वाईज (बीबीसी) र विशाल स्वयम समेत सकारात्मक छन् ।
पछिल्लो समय युवा परियोजना सहित सिनियर टोलीमा समेत युवा खेलाडीको बाहुल्यता दिने निर्णय गरेको मनाङले विशाललाई अनुबन्धन गर्ने पक्का जस्तै छ ।
‘अनुबन्धनको तयारीमा छौं । विशालसँग सकारात्मक छौं । पोखरामा आहारारा गोल्डकप पनि मनाङबाट खेलेको हो । हामी अन्तिम तयारीमा छौं ।’ मनाङका अध्यक्ष मुखिया गुरुङले खेलपाटीसँग भने ।
यसअघि दशक समय क्लबमा बिताएका खेलाडी मछिन्द्र लागेपछि मनाङ युवा खेलाडीलाई समावेश गर्दै नयाँ सिजनका लागि बलियो टिम बनाउन चाहेको छ । खेलाडी अनुबन्धमा दिल खोलेर खर्च गर्ने परिचय बनाएको मनाङले कप्तानको जिम्मेवारी अन्जन विष्टलाई दिने तयारी गरेको छ ।
मनाङले नयाँ टिममा राष्ट्रिय टोलीका युवा खेलाडीलाई अनुबन्ध गर्न चाहन्छ । साग विजेता टोलीबाट केहि खेलाडी तान्ने मनसाय क्लबको देखिन्छ । मनाङसँग विदेशी खेलाडीको रुपमा आफिज ओलावाले रहने पक्का जस्तै छ ।
अब, विशालले एमएमसी जाने भएसँगै बीबीसीबाट रिलिज पेपर लिनुपर्ने हुन्छ । रिजिल पेपर दिन बीबीसी समेत तयार छ । बीबीसीका व्यवस्थापक अर्विन गुरुङ आवश्यता अनुसार विशाललाई रिलिज पेपर दिने बताउँछन् ।
विशाल समेत मनाङबाट खेल्न तयार छन् । एक समय मनाङबाट खेल्ने विशालको सपना थियो । उनी अहिले सपनाको नजिक पुगेका छन् ।
‘नेपालको एक चर्चित क्लबका आवद्ध हुन पाउनु खुसीको कुरा हो । मोफसलमा क्लबबाट खेलिसकेको छु । क्लबसँग लामो समय अनुबन्ध हुँदा निकै उत्साहित छु ।’ हाल गृहजिल्ला रुपन्देही रहेका विशालले भने ।
यसअघि विशालले उमेर समूहमा नेपालको यू–१६, यू–१८ र यू–१९ टोलीबाट खेलिसकेका छन् । एन्फा एकेडेमी छाडेसँगै विशालले थ्री स्टार र आर्मीबाट क्रमश ललित स्मृति कप च्याम्पियनसिप खेलेका थिए । विशालको ए डिभिजन यात्रा भने ब्रिगेड ब्वाईजबाट सुरु भएको थियो ।
