एजेन्सी । १६ औं संस्करणको युरोकप फुटबल अन्तर्गत अन्तिम १६ को दोस्रो खेलमा अहिले इटाली र अष्ट्रियाबीच प्रतिस्पर्धा भईरहेको छ ।
इंग्ल्यान्डको वेम्बली स्टेडियममा जारी खेलको पहिलो हाफ सकिदा इटाली र अष्ट्रियाले गोलरहित बराबरी खेलेका छन् ।
पहिलो हाफको खेलमा पकड जमाएपनि इटालीले अष्ट्रियाविरुद्ध गोल गर्न सकेन ।
खेलको ३२ औं मिनेटमा इटालीका सिरो इमोबाइलको प्रहार क्रसबारमा लाग्दै बाहिरिएको थियो ।
यस्तै इटालीको केहि उत्कृष्ट आक्रमण अष्ट्रियाका गोलकिपर डानिलले बचाए ।
आज दुबै टिम जित निकाल्दै अन्तिम आठमा पुग्ने लक्ष्यसहित मैदान उत्रिएका छन् ।
इटाली समूह 'ए' को विजेता बन्दै नकआउट चरणमा पुगेको हो । समूह चरणमा इटालीले ३ खेलमा ९ अंक जोडेको थियो ।
अष्ट्रियालाई हराएर इटाली कीर्तिमान बनाउन चाहन्छ । इटाली पछिल्लो ३० खेलमा अपराजित रहेको छ । अष्ट्रियाविरुद्ध जित निकालेमा इटालीले ३१ खेलमा अपराजित रहदै कीर्तिमान बनाउने छ ।
सन् २०१८ सेप्टेम्बरमा यूइएफए नेसन्स लिगको समूह चरणमा पोर्चुगलसँग १–० ले पराजित भएपछि इटालीले हार व्यहोरेको छैन । यस अवधिमा इटालीले २५ जित र ५ बराबरीको नतिजा निकालेको छ ।
इटाली ८२ वर्ष अगाडीको आफ्नै कीर्तिमान भङ्ग गर्ने बाटोमा रहेको हो । यस अघि इटालीले १९३५ को अक्टोबर देखि जुलाई १९३९ सम्म ३० खेलमा अपराजित रहेर कीर्तिमान बनाएको थियो ।
इटाली समूह चरणमा अपराजित टिम हो । शतप्रतिशत जित निकाल्ने क्रममा इटालीले पहिलो खेलमा टर्कीलाई ३–० ले हराएको थियो । यस्तै दोस्रो खेलमा इटालीले स्विट्जरल्यान्डलाई ३–० गोल अन्तरले नै हराएको थियो । अन्तिम खेलमा इटालीले वेल्सलाई १-० ले हराएको थियो ।
पहिलो पटक नकआउट चरणमा पुगेको अष्ट्रिया समूह 'सी' को उपविजेता बनेको थियो । समूह चरणमा अष्ट्रियाले ३ खेलमा ६ अंक जोडेको थियो ।
अष्ट्रियाले पहिलो खेलमा नर्थ म्यासेडोनियालाई ३-१ ले हराएको थियो । तर, दोस्रो खेलमा नेदरल्यान्ड्ससँग २-० ले पराजित भएको थियो । अन्तिम खेलमा युक्रेनलाई १-० ले हराउँदै अष्ट्रिया नकआउट चरणमा पुगेको हो ।
इटाली र अष्ट्रियाबीच अहिलेसम्म १३ पटक प्रतिस्पर्धा भएको छ । इटालीले अष्ट्रियासँग हार्नु परेको छैन । इटालीले अष्ट्रियाविरुद्ध १० खेल जित्दा ३ खेल बराबरी खेलेको छ ।
-1747503617.webp)
