कीर्तिमानतर्फ अग्रसर इटालीलाई अष्ट्रियाको चुनौती

एजेन्सी । १६ औं संस्करणको युरोकप फुटबल अन्तर्गत अन्तिम १६ को दोस्रो खेलमा आज (शनिबार) राति इटालीले अष्ट्रियासँग प्रतिस्पर्धा गर्दैछ ।

इंग्ल्यान्डको वेम्बली स्टेडियममा हुने इटाली र अष्ट्रियाबीचको खेल राति  १२:४५ बजे सुरु हुनेछ । दुबै टिम जित निकाल्दै अन्तिम आठमा पुग्ने लक्ष्यसहित मैदान उत्रने छन् ।

इटाली समूह 'ए' को विजेता बन्दै नकआउट चरणमा पुगेको हो । समूह चरणमा इटालीले ३ खेलमा ९ अंक जोडेको थियो ।

अष्ट्रियातर्फ मैदान उत्रदा इटाली कीर्तिमानतर्फ अग्रसर हुनेछ ।  इटाली पछिल्लो ३० खेलमा अपराजित रहेको छ । अष्ट्रियाविरुद्ध जित निकालेमा इटालीले ३१ खेलमा अपराजित रहदै कीर्तिमान बनाउने छ । 

सन् २०१८ सेप्टेम्बरमा यूइएफए नेसन्स लिगको समूह चरणमा पोर्चुगलसँग १–० ले पराजित भएपछि इटालीले हार व्यहोरेको छैन । यस अवधिमा इटालीले २५ जित र ५ बराबरीको नतिजा निकालेको छ ।

इटाली ८२ वर्ष अगाडीको आफ्नै कीर्तिमान भङ्ग गर्ने बाटोमा रहेको हो । यस अघि इटालीले १९३५ को अक्टोबर देखि जुलाई १९३९ सम्म ३० खेलमा अपराजित रहेर कीर्तिमान बनाएको थियो । त्यससमय इटालीको मुख्य प्रशिक्षक भिट्टोरियो पोज्जो रहेका थिए । तर, रोबर्टो मान्सिनीलाई यस पटक कीर्तिमान भङ्ग गर्ने अवसर रहेको छ ।

इटाली समूह चरणमा अपराजित टिम हो । इटालीले समूह चरणमा गोल खाएको छैन ।  शतप्रतिशत जित निकाल्ने क्रममा इटालीले पहिलो खेलमा टर्कीलाई ३–० ले हराएको थियो । यस्तै दोस्रो खेलमा इटालीले स्विट्जरल्यान्डलाई ३–० गोल अन्तरले नै हराएको थियो । अन्तिम खेलमा इटालीले वेल्सलाई १-० ले हराएको  थियो ।

तर, अष्ट्रियाविरुद्ध इटाली केहि शतर्क भएर खेल्नेछ । मान्सिनीले त्यहि अनुसारको रणनीति तयार गर्नेछन् ।

'अष्ट्रिया आक्रामक छन् । उनीहरुसँग सबै गुणहरु छ । त्यसैले हामीले राम्रो खेल खेल्नु पर्नेछ,' मान्सिनी भन्छन्, 'हामीले गल्ति गर्नु हुन्न ।'

अष्ट्रिया पनि इतिहास कोर्ने योजनामा हुनेछ । त्यसैले इटालीमाथि अष्ट्रेलियाले कडा टक्कर दिने अनुमान गरिएको छ ।

'टिमले सानदार प्रदर्शन गरेको छ । हामी अन्तिम १६ मा छौँ र हामी क्वाटरफाइनलका  लागि सकेजति सबै गर्न चाहन्छौं,' अष्ट्रियाका प्रशिक्षक फान्सको फोडा भन्छन्, 'हामी इटालीविरुद्ध पूर्ण आत्मविश्वासमा छौँ र केन्द्रित छौँ ।'

पहिलो पटक नकआउट चरणमा पुगेको अष्ट्रिया समूह 'सी' को उपविजेता बनेको थियो । समूह चरणमा अष्ट्रियाले ३ खेलमा ६ अंक जोडेको थियो ।

पहिलो पटक नकआउट चरणमा पुग्ने क्रममा अष्ट्रियाले पहिलो खेलमा नर्थ म्यासेडोनियालाई ३-१ ले हराएको थियो । तर, दोस्रो खेलमा नेदरल्यान्ड्ससँग २-० ले पराजित भएको थियो । अन्तिम खेलमा युक्रेनलाई १-० ले हराउँदै अष्ट्रिया नकआउट चरणमा पुगेको हो ।

इटाली र अष्ट्रियाबीच अहिलेसम्म १३ पटक प्रतिस्पर्धा भएको छ ।  इटालीले अष्ट्रियासँग हार्नु परेको छैन । इटालीले अष्ट्रियाविरुद्ध १० खेल जित्दा ३ खेल बराबरी खेलेको छ ।

प्लेयर्स टु वाच -

म्यानुएल लोकाटेली : 

इटालीका युवा खेलाडी म्यानुएल लोकाटेलीले जारी प्रतियोगितामा उत्कृष्ट प्रदर्शन गरिरहेका छन् । अघिल्ला २ खेलमा प्रभावशाली प्रदर्शन गरेका उनी अष्ट्रियाविरुद्ध समेत सबैको नजरमा पर्नेछन् ।

दुई खेलमा उनले दुई गोल समेत गरेका छन् । पहिलो खेलमा टर्कीविरुद्ध ७४ मिनेट खेलेका लोकाटेलीले दोस्रो खेलमा भने पूरा समय खेल्दै महत्वपूर्ण दुई गोल गरे ।

इटालीले वेल्सविरुद्धको खेलमा भने उनलाई विश्राम दिएको थियो । तर, अष्ट्रियाविरुद्ध उनी टिमका महत्वपूर्ण खेलाडी हुने छन् ।

२३ वर्षीय लोकाटेली घरेलु लिग सिरी 'ए' क्लब सासोउलोबाट खेल्ने गर्छन् । लोकाटेलीसँग इटालीको उमेर समूहको यू–१५, १६, १७, १९, २१ टोलीबाट खेलेको अनुभव छ । सिनियर टोलीबाट भने लोकाटेलीले १२ खेल खेल्दै ३ गोल गरेका छन् ।

डेभिड अल्बा :

बलियो इटालीविरुद्ध मैदान उत्रदा अष्ट्रियाले विपक्षीको अट्याक रोक्दै काउन्टरमा अट्याक गर्ने योजना बनाएको छ । त्यसका लागि अष्ट्रियाका मुख्य खम्बाका रुपमा डिफेन्डर डेभिड अल्बा रहने छन् ।

स्पेनिस क्लब रियल मड्रिडमा आबद्द अल्बा इटालीविरुद्ध मुख्य खेलाडीको रुपमा हुने छन् । उनी फरवार्डका लागि पास उपलब्ध गराउन माहिर छन् । टिमको कप्तान समेत रहेका २८ वर्षीय अल्बा  विंगरको भूमिकामा समेत खेल्न सक्छन् ।

अल्बासँग अष्ट्रियाको उमेर समूहको यू–१७, १९, २१ बाट खेलेको अनुभव छ ।  अल्बाले सिनियर टोलीबाट ८४ खेल खेल्दा १४ गोल गरेका छन् ।