काठमाडौं । नेपाली राष्ट्रिय महिला फुटबल टिमका मुख्य प्रशिक्षक ग्यारी फिलिप्सले एएफसी महिला एसियन कप २०२२ को छनोटमा ऐतिहासिक उपलब्धि हासिल गर्न टिम तयार रहेको बताएका छन् ।
एएफसी महिला एसियन कप छनोटको समूह विभाजन सार्वजनिक भएपछि प्रशिक्षक फिलिप्सले छनोटमा ऐतिहासिक उपलब्धिका लागि नेपाली टिम तयार भएको बताएका हुन् ।
एएफसीले बिहीबार सार्वजनिक गरेको समूह विभाजन अनुसार नेपाल समूह 'एफ' मा रहेको छ । नेपालको समूहमा फिलिपिन्स र हङकङ रहेको छ ।
यस समूहको छनोट खेल नेपालमा हुनेछ । एएफसीले छनोटको प्रारम्भिक मिति १३ देखि २५ सेप्टेम्बर (२८ भदौ देखि ९ असोज) लाई तोकेको छ । समूहको शीर्ष टोलीले अर्को वर्ष भारतमा हुने एसियन कप खेल्नेछ ।
अखिल नेपाल फुटबल संघ (एन्फा) ले सार्वजनिक गरेको एक भिडियोमा प्रशिक्षक फिलिप्सले बलियो टिमलाई हराएर अघि बढ्ने अवसर रहेको समेत बताएका छन् ।
'नेपाली राष्ट्रिय महिला फुटबल टिमको एएफसी वुमन्स एसियन कप छनोटको 'ड्र' बाट उत्साहित छु । हामी दुई राष्ट्रलाई होस्ट गर्न पाउँदा उत्साहित छौँ । फिफा वरीयतामा फिलिपिन्स र हङकङ माथि छ यद्दपी हामी त्यस खेलका लागि निर्धक्क छौँ,' फिलिप्सले भनेका छन्, 'फिलिपिन्स र हङकङलाई जित्ने ठुलो अवसर छ । यस समूहमा जित निकाल्दै एसियन कपमा छनोट भयौं भने नेपाली फुटबलका लागि ऐतिहासिक हुनेछ । यस अवसर प्राप्त गर्नका लागि महिला खेलाडी उत्साहित छन्।'
फिफाको पछिल्लो वरीयतामा नेपाल १०० औं स्थानमा रहेको छ । फिलिपिन्स ६८ औं स्थान र हङकङ ७६ औं स्थानमा रहेको छ ।
प्रशिक्षक फिलिप्सले नेपाली पुरुष टिमले विश्वकप र एसियन छनोटमा ठुला राष्ट्रविरुद्ध गरेको प्रदर्शनबाट टिम प्रेरित भएको र घरेलु मैदानमा त्यहिँ अनुसार प्रदर्शन गर्ने समेत बताए ।
'हामी पुरुषको एसियन छनोटको प्रदर्शनबाट प्रेरित छौँ । म त्यसका लागि मुख्य प्रशिक्षक अब्दुल्लाह, कोचिङ स्टाफ, म्यानेजमेन्ट र खेलाडीलाई धन्यवाद दिन चाहन्छु । हामी यसैबाट प्रेरित भएर अर्को स्तरमा जाने छौँ,' उनले भने ।
प्रशिक्षक फिलिप्सले टिमको बन्द प्रशिक्षण चाडै सुरु हुने आशा समेत व्यक्त गरेका छन् ।
'हामी घरमा खेल्दै छौँ समर्थकको अगाडी खेल्नु यो हाम्रो लागि ठुलो अवसर हो । टिमको क्याम चाडै सुरु हुनेमा आशावादी छौँ,' उनले भनेका छन् ।
अखिल नेपाल फुटबल संघ (एन्फा) ले गत फागुनमा फिलिप्सलाई नेपाली राष्ट्रिय महिला फुटबल टोलीको मुख्य प्रशिक्षक नियुक्त गरेको थियो ।
एएफसी एसियन कप छनोट र साफ च्याम्पियनसिपसम्मको लागि एन्फाले फिलिप्सलाई मुख्य प्रशिक्षकमा नियुक्त गरेको हो ।
यस अघि अष्ट्रेलियन प्रशिक्षक फिलिप्स प्राविधिक निर्देशनको रुपमा काम गरिरहेका थिए ।
