पहिलो टी-ट्वान्टीमा इंग्ल्यान्ड विजयी

एजेन्सी । घरेलु टिम इंग्ल्यान्डले श्रीलंकाविरुद्धको पहिलो टी-ट्वान्टी क्रिकेटमा जित निकालेको छ ।

बुधबार राति भएको खेलमा इंग्ल्यान्डले श्रीलंकालाई ८ विकेटले हराएको हो ।

कार्डिफमा श्रीलंकाले दिएको १ सय ३० रनको लक्ष्य इंग्ल्यान्डले १७ ओभर १ बलमा २ विकेट गुमाएर पूरा गर्यो ।

इंग्ल्यान्डको जितमा जोस बट्लरले अविजित ६८ रनको अर्धशतकीय इनिङ्स खेले । जासन रोयले ३६ रन जोडे ।

डाभिड मालन ७ रनमा आउट हुँदा जोनी बेयर्सटोले अविजित १३ रन बनाए ।

श्रीलंकाका दुश्मन्था चामिरा र इसुरु उडानाले १/१ विकेट लिए ।

त्यस अघि टस जितेर पहिले ब्याटिङ गरेको श्रीलंकाले २० ओभरमा ७ विकेट गुमाएर १ सय २९ रन बनाएको थियो ।

श्रीलंकाका लागि दसुन शनकाले ५० रनको अर्धशतकीय इनिङ्स खेले । कप्तान कुशल परेराले ३० रन जोड्दा दनुश्का गुनाथालिकाले १९ रन बनाए ।

इंग्ल्यान्डका साम कुरान र आदील राशिदले २/२ विकेट लिए ।

यस जितसँगै इंग्ल्यान्डले ३ खेलको सिरिजमा १-० को अग्रता बनाएको छ ।