एजेन्सी । १६ औं संस्करणको युरोकप फुटबलमा अहिले फ्रान्स र पोर्चुगलबीच प्रतिस्पर्धा भईरहेको छ ।
हंगेरीको पुस्कास एरिनामा जारी खेलको पहिलो हाफ सकिदा फ्रान्स र पोर्चुगलले १-१ गोलको बराबरी खेलेका छन् ।
खेलको ३१ औं मिनेटमा कप्तान क्रिस्टियानो रोनाल्डोले पेनाल्टीमा गोल गर्दै पोर्चुगललाई सुरुवाती अग्रता दिलाएका थिए ।
फ्रान्सका गोलकिपर ह्युगो लोरिसले पेनाल्टी क्षेत्रमा डानिल पेरीएरालाई फउल गरेपछि पोर्चुगलले पेनाल्टीको अवसर पाएको हो । जसमा रोनाल्डोले सहजै गोल गरे ।
रोनाल्डोको यो १ सय ८ औं अन्तराष्ट्रिय गोल हो ।
जारी युरोमा रोनाल्डोको यो चौंथो गोल हो । युरोकपमा रोनाल्डोको यो कीर्तिमानी १३ औं गोल हो ।
तर, पहिलो हाफको इन्जुरी समयमा करिम बेन्जिमाले पेनाल्टीमा गोल गर्दै फ्रान्सलाई १-१ गोलको बराबरीमा ल्याए ।
पोर्चुगलका नेल्सन सेमिडोले केलियन एमबाप्पेलाई पेनाल्टी क्षेत्रभित्र लडाएपछि फ्रान्सले पेनाल्टीको अवसर पाएको हो ।
बेन्जिमाले फ्रान्सका लागि ५ वर्ष २ सय ५८ दिनपछि गोल गरेका हुन् । पछिल्लो पटक उनले फ्रान्सका लागि २०१५ को अक्टोबर ८ मा गोल गरेका थिए ।
कठिन मानिएको समूह 'एफ' रहेको फ्रान्स यस अघि नै नकआउट चरणमा पुगिसकेको छ । तर, पोर्चुगललाई हराएर फ्रान्स समूह विजेता बन्न चाहन्छ ।
समूह चरणको पहिलो खेलमा फ्रान्सले जर्मनीलाई १-० गोल अन्तरले हराएको थियो। तर, दोस्रो खेलमा फ्रान्स हंगेरीसँग १-१ गोलको बराबरीमा रोकिएको थियो ।
पोर्चुगल पनि फ्रान्सलाई हराएर नकआउट चरणमा पुग्न चाहन्छ । समूह चरणको पहिलो खेलमा पोर्चुगलले हंगेरीलाई ३-० गोल अन्तरले पराजित गरेको थियो । तर, दोस्रो खेलमा पोर्चुगल जर्मनीसँग ४-२ गोल अन्तरले पराजित भएको थियो ।
-1747503617.webp)
