एजेन्सी । १६ औं संस्करणको युरोकप फुटबलमा आज (बुधबार) राति जर्मनीले हंगेरीसँग प्रतिस्पर्धा गर्दैछ ।
जर्मनीले एलिनाज स्टेडियममा हंगेरीको सामना गर्नेछ । जर्मनी र हंगेरीबीचको खेल राति १२:४५ बजे सुरु हुनेछ ।
जर्मनी २ खेलमा ३ अंक जोडेर समूहको दोस्रो स्थानमा रहेको छ । हंगेरीलाई हराएर जर्मनी अन्तिम १६ को यात्रा तय गर्न चाहन्छ ।
पहिलो खेलमा फ्रान्ससँग १-० ले पराजित जर्मनीले दोस्रो खेलमा पोर्चुगललाई ४-२ गोल अन्तरले पराजित गरेको थियो ।
हंगेरीविरुद्ध मैदान उत्रदा जर्मनी पोर्चुगलविरुद्धको लयलाई कायम राख्न चाहन्छ ।
'हंगेरीविरुद्ध कठिन खेल हुनेछ । आठ देखि नौं खेलाडीले डिफेन्ड गर्दै काउन्टर खेल्ने छन् । कति खतरानक छ उनीहरुले देखाईसकेका छन् । तर, मलाई विश्वास छ हामी हाम्रो गतिमा खेल्ने छौँ,' जर्मन प्रशिक्षक जोचिम लो भन्छन् ।
हंगेरी १ अंक जोडेर समूहको पुछारमा रहेको छ । हंगेरी पनि जर्मनीलाई हराएर नकआउट चरणमा पुग्न चाहन्छ ।
पहिलो खेलमा पोर्चुगलसँग ३-० ले पराजित हंगेरीले दोस्रो खेलमा फ्रान्ससँग १-१ गोलको बराबरी खेलेको थियो ।
'हामी खेल्न चाहन्छौ । राम्रो प्रदर्शन गर्न चाहन्छौ । हमी हाम्रो प्लान 'ए' अनुसार म्युनिखमा हुने छौँ,' हंगेरीका मार्को रोसी भन्छन् ।
प्लेयर्स टु वाच -
काइ हाभर्टेज - जर्मनी
जर्मनी हंगेरीविरुद्ध सहज जित निकाल्न चाहन्छ । त्यसैले हंगेरीविरुद्ध जर्मनी अट्याकिङ फुटबल खेल्नेछ । जसका लागि जर्मनी टोलीले युवा अट्याकर काइ हाभर्टेजलाई अघि सार्ने छ ।
पोर्चुगलविरुद्ध जित निकाल्दा हाभर्टेजले उत्कृष्ट प्रदर्शन गरेका थिए । हाभर्टेजले एक गोल समेत गरेका थिए
२२ वर्षीय अट्याकिङ मिडफिल्डर हाभर्टेज इंग्लिस क्लब चेल्सीबाट व्यावसायिक फुटबल खेल्ने गर्छन् । हाभर्टेजले जर्मनीको उमेर समूहको यू–१६, १७, १९ टोलीबाट समेत खेलेका छन् । हाभर्टेजले सिनियर टोलीबाट १६ खेल खेल्दा ४ गोल गरेका छन् ।
विलि ओर्वान – हंगेरी
जर्मनीका शक्तिशाली अट्याकरलाई रोक्न हंगेरीले डिफेन्डर विलि ओर्वानलाई तयार गर्नेछ । बुन्डेसलिगा क्लब आरबी लाईपजिगबाट खेल्दै आएका आर्वान जर्मनीविरुद्ध डिफेन्स लाईनमा व्यस्त रहनेछन् ।
२८ वर्षीय विल्लीसँग जर्मनको यू-२१ टोलीबाट खेलेको अनुभव छ । उनले हंगेरीको राष्ट्रिय टोलीबाट २३ खेल खेल्दा ५ गोल गरेका छन् । उनले सुरुवाती दुई खेलमा उत्कृष्ट खेलेका थिए ।
