काठमाडौं । राष्ट्रिय महिला लिग खेल्ने क्रममा चोट बोकेकी स्ट्राईकर सावित्रा भण्डारी (साम्बा) को उपचार कतारमा हुने भएको छ ।
अखिल नेपाल फुटबल संघ (एन्फा) ले मंगलबार सावित्राको उपचार कतारमा हुने जनाएको छ ।
कतार फुटबल एसोसियसनको सहयोगमा सावित्राको उपचार दोहास्थित अस्पेटार अस्पतालमा हुने भएको हो । एन्फाले सावित्राको उपचारमा सहयोग गर्नका लागि कतारलाई पत्र पठाएको थियो ।
सावित्रा चोटको उपचारका लागि शनिबार त्यसतर्फ प्रस्थान गर्ने छिन् ।
कतार फुटबल एसोसियसनकै सहयोगमा राष्ट्रिय पुरुष फुटबल टोलीका दुई सदस्य विमल घर्ति मगर र बिक्रम लामा पनि उपचार दोहामा गरिएको थियो ।
राष्ट्रिय लिग अन्तर्गत नेपाल पुलिसविरुद्धको खेलमा सावित्राले चोट बोकेकी थिइन् ।
सावित्राको दाँया खुट्टाको एन्टेरिएर क्रुसिएट लिगामेन्ट (एसिएल) च्यातिएको छ । उनको शल्यक्रिया गर्नु पर्नेछ ।
चोटको कारण सावित्राले लिगको अन्तिम दुई खेल समेत गुमाएकी थिइन् । उनी करिब एक वर्ष मैदान बाहिर रहने छिन् ।
लिगको उपाधि एपीएफले अपराजित रहदै जितेको थियो ।
सावित्राले लिगको १० खेलमा ४३ गोल गरेकी थिइन् । उनि लिगको उत्कृष्ट फरवार्ड चुनिएकी थिइन् ।
-1748869700.jpg)
