एजेन्सी । १६ औं संस्करणको युरोकप फुटबलमा अहिले बेल्जियमले फिनल्याण्डसँग प्रतिस्पर्धा गरिरहेको छ ।
रुसको सेन्ट पिटर्सवर्ग स्टेडियममा जारी खेलको पहिलो हाफ सकिदा बेल्जियम र फिनल्याण्डले गोलरहित बराबरी खेलेका छन् ।
पहिलो हाफमा बल पोसेसनमा पकड जमाएपनि बेल्जियमले गोल गर्न सकेन ।
आज बेल्जियम लगातार तेस्रो जितको खोजीमा रहेको छ । समूह 'बी' मा रहेको बेल्जियम यस अघि नै नकआउट चरणमा पुगिसकेको छ ।
तर, बेल्जियम शतप्रतिशत जितसहित समूह विजेता बन्दै अन्तिम १६ को यात्रा तय गर्न चाहन्छ । अघिल्ला दुई खेल जितेको बेल्जियमले ६ अंक जोडेको छ । फिनल्याण्डलाई हराएर बेल्जियम समूह विजेता बन्नेछ ।
पहिलो खेलमा बेल्जियमले रुसलाई ३–० ले हराएको थियो । दोस्रो खेलमा बेल्जियमले डेनमार्कलाई २-१ ले हराएको थियो ।
फिनल्याण्ड पनि बेल्जियमलाई हराएर अन्तिम १६ मा पुग्न चाहन्छ । अर्को चरणमा पुग्न फिनल्याण्डलाई जित अत्यावश्यक रहेको छ । बराबरीले अर्को खेलको नतिजामा निर्भर हुनु पर्नेछ ।
फिनल्याण्ड २ खेलमा ३ अंक जोडेर समूहको तेस्रो स्थानमा रहेको छ । पहिलो खेलमा डेनमार्कलाई १-० ले हराएको फिनल्याण्ड दोस्रो खेलमा रुससँग १-० ले नै पराजित भएको थियो ।
