एजेन्सी । १६ औं संस्करणको युरोकप फुटबलमा आज (सोमबार) युक्रेन र अष्ट्रियाबीच प्रतिस्पर्धा हुँदैछ ।
समूह 'सी' मा रहेको युक्रेन र अष्ट्रियाबीचको खेल ९:४५ बजे सुरु हुनेछ ।
आज दुबै टिम जित निकाल्दै नकआउट चरणमा पुग्न चाहन्छ । यस समूहबाट नेदरल्यान्ड्स यस अघि नै अन्तिम १६ मा पुगिसकेको छ ।
युक्रेन २ खेलमा ३ अंक जोडेर समूहको दोस्रो स्थानमा रहेको छ । पहिलो खेलमा युक्रेन नेदरल्यान्ड्ससँग ३-२ ले पराजित भएको थियो । दोस्रो खेलमा युक्रेनले नर्थ म्यासेडोनियालाई २-१ ले हराएको थियो ।
अष्ट्रियाविरुद्ध युक्रेनलाई बराबरीको नतिजाले समेत नकआउट चरण पुग्ने समीकरण रहेको छ । तर, युक्रेन स्पष्ट जित निकाल्न चाहन्छ ।
अष्ट्रियालाई भने जित बाहेक अन्य बिकल्प छैन । अष्ट्रिया २ खेलमा ३ अंक जोडेर समूहको तेस्रो स्थानमा रहेको छ ।
पहिलो खेलमा नर्थ म्यासेडोनियालाई ३-१ ले हराएको अष्ट्रिया दोस्रो खेलमा नेदरल्यान्ड्ससँग २-० ले पराजित भएको थियो ।
प्लेयर्स टु वाच -
डेभिड अल्बा :
युक्रेनविरुद्ध मैदान उत्रदा अष्ट्रियाले विपक्षीको अट्याक रोक्दै काउन्टरमा अट्याक गर्ने योजना बनाएको छ । त्यसका लागि अष्ट्रियाका मुख्य खम्बाका रुपमा डिफेन्डर डेभिड अल्बा रहने छन् ।
स्पेनिस क्लब रियल मड्रिडमा आबद्द अल्बा युक्रेनविरुद्ध मुख्य खेलाडीको रुपमा हुने छन् । उनी फरवार्डका लागि पास उपलब्ध गराउन माहिर छन् । टिमको कप्तान समेत रहेका २८ वर्षीय अल्बा विंगरको भूमिकामा समेत खेल्न सक्छन् ।
अल्बासँग अष्ट्रियाको उमेर समूहको यू–१७, १९, २१ बाट खेलेको अनुभव छ । अल्बाले सिनियर टोलीबाट ८३ खेल खेल्दा १४ गोल गरेका छन् ।
ओलेक्सान्डर जिन्चेन्को :
इंग्लिस क्लब म्यानचेस्टर सिटीले यस सिजन प्रिमियर लिगको उपाधि जित्दा प्रशिक्षक पेप ग्वार्डिओलाको मुख्य पात्र थिए ओलेक्सान्डर जिन्चेन्को ।
त्यसैले बलियो अष्ट्रियाविरुद्ध मैदान उत्रदा उनी उक्रेनी टिमका मुख्य खेलाडीको रुपमा रहने छन् । २४ वर्षका युवा खेलाडी जिन्चेन्को राष्ट्रिय टोलीका लागि समेत महत्वपूर्ण खेलाडीको रुपमा रहदै आएका छन् ।
सिटीमा डिफेन्डरको भूमिकामा देखिने उनी देशको लागि खेल्दा अट्याकिङ मिडलाइनबाट खेल्ने गर्छन् । रसियन प्रिमियर क्लब युफाबाट आफ्नो व्यवसायिक खेल सुरुवात गरेका जिन्चेन्को त्यसपछि सिटी पुगेका हुन् ।
५ फिट ९ इन्च अग्ला जिन्चेन्कोले युक्रेनको यू-१६, १७, १८, १९, २१ बाट खेलिसकेका छन् । युरोकप छनोटमा स्पेनविरुद्ध डेब्यु गरेका जिन्चेन्कोले डेब्यु गोल भने रोमानियाविरुद्धको मैत्रीपूर्णमा गरेका थिए । युक्रेनका लागि उनले ४१ खेलमा ६ गोल गरिसकेका छन् ।
