एजेन्सी । १६ औं संस्करणको युरोकप फुटबलमा आज (आइतबार)स्विट्जरल्यान्डले टर्कीसँग खेल्दैछ ।
बाकुमा हुने स्विट्जरल्यान्ड र टर्कीबीचको खेल राति ९:४५ बजे सुरु हुनेछ ।
आज स्विट्जरल्यान्ड पहिलो जितको खोजीमा हुनेछ । स्विट्जरल्यान्ड जित निकाल्दै नकआउट चरणको ढोका खोल्न चाहन्छ ।
स्विट्जरल्यान्ड २ खेलमा १ अंक जोडेर तेस्रो स्थानमा रहेको छ । पहिलो खेलमा वेल्ससँग बराबरी खेलेको स्विट्जरल्यान्ड दोस्रो खेलमा इटालीसँग पराजित भएको थियो ।
टर्की भने पहिलो अंकको खोजीमा हुनेछ । समूहको पुछारमा रहेको टर्कीले अंक जोड्न सकेको छैन । पहिलो खेलमा खेलमा इटालीसँग पराजित टर्की दोसो खेलमा वेल्ससँग पराजित भएको थियो ।
रिकार्डो रोड्रिग्वेज – स्विट्जरल्यान्ड
नकआउट चरणमा स्थान बनाउन प्रयासरत स्विट्जरल्यान्डलाई टर्कीविरुद्ध रोड्रिग्वेजले महत्वपूर्ण भूमिका निर्वाह गर्न सक्छन् । २८ वर्षीय अनुभवी लेफ्ट ब्याक रोड्रिग्वेज सेट पिसमा गोल गर्न माहिर छन् ।
रक्षापंक्तिमा समेत उनले न्याय दिदै आएका छन् । उनी सिरी 'ए' क्लब टोरिनोबाट व्यावसायिक फुटबल खेल्ने गर्छन् । स्विट्जरल्यान्डको लागि उनले यू–१७, १८, १९ र २३ टोलीबाट खेलेका छन् ।
सिनियर टोलीबाट ८० खेल खेलेका उनले ९ गोल गरेका छन् । उनले अघिल्ला दुई खेलमा पूरा समय मैदानमा बिताएका थिए ।
सेन्गिज अन्डर – टर्की
अघिल्ला दुई खेलमा जित विहीन रहेको टर्कीका लागि मिडफिल्डर सेन्गिज अन्डर महत्वपूर्ण खेलाडी हुनेछन् । इंग्लिस क्लब लेष्टर सिटीमा आबद्द सेन्गिजले गत सिजन रोमाबाट लोनमा खेलेका थिए ।
टर्की यू–१८, १९, २१ टोली खेलिसकेका सेन्जिजले टर्कीको सिनियर टोलीबाट ३२ खेल खेल्दा ९ गोल गरेका छन् । स्विट्जरल्यान्डविरुद्ध बेन्चमा राजेका उनी वेल्सविरुद्ध सुरुवाती-११ मै रहेका थिए ।
