न्युजिल्याण्डले टस जित्यो, भारत ब्याटिङमा  

एजेन्सी । आईसीसी विश्व टेस्ट च्याम्पियनसिपको फाइनलमा भारतले सुरुवातमा ब्याटिङ गर्ने भएको छ ।

साउथह्याम्पटनमा न्युजिल्याण्डले टस जितेर फिल्डिङ रोजेपछि भारतले सुरुवातमा ब्याटिङ गर्ने भएको हो ।

पहिलो दिन शुक्रबार वर्षाले प्रभावित गरेपछि दुई टिमबीचको टेस्ट आजबाट सुरु हुन लागेको हो ।  वर्षाले प्रभावित गरेपछि पहिलो दिन शुक्रबार टस समेत नभई खेल सकिएको छ ।

विराट कोहलीको कप्तानीमा मैदान उत्रने भारत पहिलो संस्करणको उपाधि उचाल्न चाहन्छ ।

केन विलियम्सनको कप्तानी मैदान उत्रने न्युजिल्याण्ड पनि उपाधि जित्ने योजनामा रहेको छ ।

दुई टोलीबीचको पछिल्लो पाँच टेस्टमा भारत बलियो देखिएको छ । भारतले ३ खेल जित्दा न्युजिल्याण्डले २ खेल जितेको छ ।

गत वर्षको फेब्रुअरीमा भएको दुई टेस्ट सिरिजमा न्युजिल्याण्डले भारतलाई हराएको थियो ।

टेस्ट च्याम्पियनसिपको विजेताले १.६ मिलियन अमेरिकी डलर पुरस्कार पाउने छन् । फाइनल टेस्ट ड्र (बराबरी) मा सकिए उपाधि बाडिने छन् ।

यस्तै उपविजेता टोलीले ८००,००० अमेरिकी डलर पाउने जनाएको छ । आईसीसीले दुई टिमले पाउने पुरस्कार राशि २.४ मिलियन अमेरिकी डलर रहेको जनाएको छ ।