खेलाडी देशको गहना, कुन चाहिँ गहना ?

काठमाडौं । नेपाली राष्ट्रिय क्रिकेट टिमका लेग स्पिनर सन्दीप लामिछाने पहिलो पटक इंग्ल्यान्डको भाइटालिटी टी-ट्वान्टी ब्लास्ट क्रिकेट प्रतियोगिता खेल्ने तयारीमा थिए ।

तर, भिषा समस्याको कारण सन्दीप पहिलो पटक भाइटालिटी टी-ट्वान्टी खेल्नेबाट बन्चित भएका छन् । भिषा ढिला आएपछि इंग्ल्यान्ड जान नपाएका सन्दीपले प्रतियोगिताबाट नाम फिर्ता लिन बाध्य भए ।

सन्दीप वोर्सेस्टरशायर र्यापिड्समा अनुबन्धित भएका थिए । तर, र्यापिड्सले सन्दीपको स्थानमा न्युजिल्याण्डका लेग स्पिनर इश सोधीलाई अनुबन्ध गरेको छ ।

टी-ट्वान्टी ब्लास्ट खेल्नबाट बन्चित भएपछि सन्दीपले दुख व्यक्त गरेका छन्  ।  सामाजिक संजाल फेसबुक लाईभमा सन्दीपले आफु निकै दुखि बताएका हुन् ।

सन्दीपले आफुलाई सम्बन्धित निकायले सहयोग नगरेको समेत बताएका छन् । उनले राष्ट्रको गहनालाई हेर्ने दृष्टिकोण नबदलिएको बताएका छन् ।

 सन्दीपले फेसबुक लाईभमा के के भने ? उनकै शब्दमा ।

'म आज मेरो भिषाको विषयमा भन्दै छु । म काउन्टी क्लबका लागि छनोट भएको थिए । त्यो मेरा लागि निकैनै खुसीको कुरा थियो । कुनै पनि खेलाडी वा एसोसिएट खेलाडीका लागि काउन्टी एक ठुलो प्लेटफम हो । तर, म यसको प्रोसेसको विषय देखि निकै दुखी थिए ।

खासमा मैले त्यो प्रतियोगिताका लागि मे २७ मा जानु पर्ने थियो । मेरो यात्रामा मैले १० दिन अरु देशमा बसेर ४–५ दिन इङ्ल्यान्डमा पनि क्वारेन्टिाइनमा बस्नु पर्ने थियो । करिब १५ दिनको क्वारिन्टाइनपछि म प्रतियोगिता खेल्न तयार हुने थिए । तर, मलाई नै थाहा छैन । कहाँ के भइरहेको छ । मैले एक दुई दिन अगाडी ट्वीट पनि गरेको थिए । कसैले सहयोग गर्छ कि भनेर । यतिबेला हाम्रो देशको अवस्था के छ र देशमा के भइरहेको छ त्यो मलाई थाहा छ । अहिले नेपालमा अवस्था निकै असहज छ । तर, यस्तो अवस्थामा पनि खेलाडीलाई कसैन कसैले सहयोग गरिदिएको भए हुने थियो ।

यसमा पनि हामी एसोसिएट । त्यसमा पनि हामी नेपाली खेलाडीले थोरै मात्रामा अवसर पाउने गर्दछौ । हाम्रा लागि सानो भन्दा सानो अवसर पनि ठुलो हुन आउछ । काउन्टी क्लब धेरै खेलाडीका लागि ठुलो अवसर हो ।  मैले भन्नु पर्दैन होला । हरेक राष्ट्रका खेलाडी त्यहा गएर खेल्नु हुन्छ । त्यो अवसर मैले पनि पाएको थिए । अझ पनि पाउन सकिन्छ ।

तर, मेरो भिषाको विषयमा लापरबाही कहाँबाट भयो । मेरो पासपोर्टमा भिषा पहिले नै लागि सकेको रहेछ । मैले हिजो मात्रै पासपोर्ट पाए । त्यसमा भिषा जारी मिति हेर्ने हो भने धेरै अगाडीको नै छ । तर, मैले पासपोर्ट पाउन्जेलसम्म अत्यन्तै ढिला भइसकेको थियो ।

यदि म आज भन्दा ४–५ दिन अगाडी मात्रै जान पाएको भए । मैले दुई तीन खेल गुमाएर खेल्न पाउँथे होला ।

मलाई थाहा छैन पहिला पनि यि समस्याहरु मैले भोग्दै आएको छु । मलाई थाहा छैन अरु कति जनाले भोग्नु  भएको छ । कति जनाले छैन् । पछिल्लो समय पनि म अमेरिकन दुताबासमा जाँदा अपमानीत भएको थिए । मैले यि विषय कहिलै पनि खुलेर भनिन् । मलाई थाहा छैन्, कहिलेसम्म हुने हो ।

यस पटक पनि इङ्ल्यान्डको भिषा त्यस्तै भयो । भिषा लागि सकेको थियो । तर, पासपोर्ट भने नेपालमा ढिलो आई पुग्यो । ढिला चाहि किन आयो । के कारणले गर्दा मेरो पासपोर्ट ढिला आयो । मलाई जहाँसम्म याद छ, थाहा छ भारतबाट प्लेन पनि आइरहेका थिए । त्यो समयमा हामी पासपोर्ट मगाउन सक्थ्यौ । तर, किन ढिला आयो अहिलेसम्म मलाई थाहा छैन् ।

यसले एउटा खेलाडीलाई कति पीडा दिन्छ । जब उसको अगाडी कुनै अवसर आउँछ र गुमाउनु पर्छ । यो हाम्रा लागि एक नौकरी जस्तै हो । हामीले यस खेललाई माया गर्छौ ।

फेरि हामी कुरा गर्छौ कि नेपालको क्रिकेट किन बढेन । नेपालले अवसर पाउँदैन् । अवसर पाएको समयमा कस्ले पो साथ दिएको छ ? आजसम्म म शान्त रहे । मैले एकदमै नराम्रो स्थिती पनि भोगिसकेको छु । झुटो ओरोपहरु पनि भोगिसकेको छु । स्टारडम पायो । एक दुई लिग खेल्यो, मात्तियो, घमन्डी भयो भनेर कतिले भन्नु हुन्छ । तर, तपाई आफैले आफैलाई प्रश्न गर्नु, तपाईले कति जना खेलाडीलाई चिन्नु भएको छ ? फेरि तपाईहरु नै भन्नु हुन्छ, नेपालको खेलाडीले अवसर पाइरहेको छैन् । उनीहरुले केही गरिरहेको छैन् ।

हामी बाहिर खेल्न जाँदा धेरै भिषाको समस्या भोगिरहेका छौ । यसअघि पनि मैले ट्वीट गर्दा जस जसलाई मैले मेन्सन गरेको थिए, उहाँहरु कसैले पनि त्यो मेरो समस्यामा चासो देखाएनन् । अब यसको भोलीको असर कस्तो पर्छ । अब कुनै विदेशी टोलीले नेपाली खेलाडीलाई लिन खोज्ला कि नाई ?

अब मैले अर्को सिजन इङ्ल्यान्डको काउन्टी  क्लबका लागि खेल्न जादा सबैको दिमागमा त्यही हुन्छ कि नेपालको खेलाडीलाई युकेको भिषा पाउन निकै गाह्रो छ । यसले गर्दा अरु खेलाडीका लागि पनि ढोका कसरि खोल्ने ।

खेलाडी देशको गहना, कुन चाही गहना ? सबैले आ आफ्नो स्वार्थ हेरेर भएननी । आजसम्म खेलकुद लगायत कुनै पनि क्षेत्रबाट कसैले पनि सन्दीप म तिमिसँग छु भनेर भनेको छैन् । यो मैले खेल्न नपाएर यस्तो भनिरहेको हैन् । यो हाम्रो भविष्य र नेपाली खेलाडीको भविष्यको कुरा हो । यस्तो हो भने हामी कसरि अगाडी बढ्न सक्छौ ।

म बलियो त छु । तर सबैको भावना हुन्छ । मैले यो भिख मागे जस्तै भयो । कति पटक भनिरहनु पर्छ मैले । नेपाली खेलाडी किन प्राथमिकतामा पर्दैनन् । यो बन्दाबन्दीको बेला मात्रै हैन् । पहिला पनि यस्तो अवस्था आएको हो । यो समस्या भोली अन्य खेलाडीले पनि भोग्ने छन् ।

नेपाली क्रिकेट अगाडी बढेन् । नेपाल टेस्ट राष्ट्र भएन भनेर मात्रै प्रश्न गर्छौ । नेपाली क्रिकेटका लागि लगानी कस्ले गर्ने । खेलाडीलाई साथ कस्ले दिन्छ । तालि मात्रैले पुग्दैन् । कामले पनि देखाउनु पर्छ ।

सम्झौता रद्द हुनुको पीडा मलाई मात्र थाहा छ । मलाई थाहा छ अर्को सिजन छ । कुनै न कुनै टोलिले कुनै न कुनै समय लिन्छ । तर, भोली आउने दिनमा अरु नेपाली खेलाडीलाई कस्तो असर पर्छ । उसले अवसर पाइरहेका बेला उसको मनमा कस्तो असर पर्ला ? यो समस्या कहिले रोकिने ?

मलाई आशा थियो कि खेलकसद मन्त्रालयबाट कुनै न कुनैले सन्दीप के छ भनेर फोन गर्नु हुन्छ भनेर । भिषाको  काम हुन सक्थ्यो, सक्थेन् । ढिलो भएपनि केही थिएन् । तर, कम्तिमा एक जानले पनि फोन गरेर भन्नु भएनकी सन्दीप हामी हाम्रो तर्फबाट काम गरिरहेका छौ । मलाई यो पनि थाहा छैन कि खेलकुद मन्त्रालयमा कति जनालाई थाहा थियो, सन्दीप काउन्टी क्लबका लागि खेल्न जाँदैछ भनेर ।

म नेपाली खेलाडी र नेपाली क्रिकेटको भविष्य बारेमा निकै गम्भीर छु । मलाई थाहा छैन भोलि के हुनेछ । आशा गर्छु कुनै न कुनै दिन होस् ।'  

(सन्दीपले फेसबुक लाईभमा बोलेको कुराको सम्पादित अंश)

 

यो पनि ...

सन्दीपको स्थानमा इश सोधीले खेल्ने

सन्दीपले भाइटालिटी ब्लास्ट क्रिकेट गुमाउने

बेलायत जान सन्दीपलाई भिसाको समस्या