एनएसएलको 'ड्रिम टिम'

काठमाडौं । पहिलो पटक आयोजना भएको नेपाल सुपर लिग (एनएसएल) फुटबल शनिबार सकिएको छ ।

नेपाल स्पोर्टस् म्यानेजमेन्टले आयोजना गरेको प्रतियोगिताको उपाधि काठमाडौं रेजर्सले जित्यो ।

त्रिपुरेश्वरस्थित दशरथ रंगशालामा भएको फाइनलमा काठमाडौंले धनगढी एफसीलाई १-० ले हराएको थियो ।

बैशाख ११ गतेबाट संचालन भएको प्रतियोगितामा ७ फ्रेन्चाईच टिमको सहभागिता रहेको थियो ।

प्रतियोगितामा सहभागी टिमले अक्सनबाट खेलाडी छनोट गरेको थियो । ७ टोलीले अक्सनबाट ९८ खेलाडी किनेका थिए ।

सिंगल राउण्ड रोविन लिगपछि काठमाडौं, धनगढीसहित ललितपुर सिटी एफसी र बुटबल लुम्बिनी प्लेअफमा पुगेका थिए । एलिमिनेटर र क्वालिफायर खेलपछि काठमाडौं र धनगढीले फाइनलमा स्थान बनाएका थिए ।

कोरोना भाईरसको महामारीको कारण प्रतियोगिता दर्शकबिना बन्द रंगशालामा आयोजना गरिएको थियो ।

प्रतियोगिताको समापनसँगै लिगमा खेलाडीले गरेको प्रदर्शनको आधारमा हामीले ‘ड्रिम टिम’ अर्थात् उत्कृष्ट-११ सार्वजनिक गरेका छौं । जसमा विदेशी तथा स्वदेशी दुबै खेलाडीलाई स्थान दिएको छ । ‘ड्रिम टिम’ बनाउन 'ए' लाइसेन्स प्रशिक्षक  हरि खड्का र चेत नारायण श्रेष्ठले सहयोग गरेका हुन् ।

‘ड्रिम टिम’ ४–४–२ को संरचनामा बनाईएको छ ।

गोलरक्षक : किरण कुमार लिम्बु

डिफेण्डर : रन्जित धिमाल, फ्रान्कलिन कुएटा टला , पिटर सेगुन, दिनेश राजबंशी

मिडफिल्डर : मेसौके ओलोमोउ, तेज तामाङ, सन्तोष तामाङ, नुर्लान जाहिद

स्ट्राइकर : अन्जन बिष्ट, पेड्रो जाभियर मान्जी

किरण कुमार लिम्बु : (धनगढी एफसी)
किरण कुमार लिम्बु धनगढी एफसीका कप्तान तथा आईकोनिक खेलाडी हुन् । उनलाई क्लबले आईकोनिक खेलाडीको रुपमा भित्र्याउदा एक विदेशी कोटा गुमाउन पुगेको थियो । टोलीका अनुबन्धित भएसँगै मार्की खेलाडी विशाल राईलाई पछाडी पार्दै कप्तानी समालेका उनले मैदानमा पूर्ण रुपमा टोलीलाई नियन्त्रणमा राखे ।
नेपाल राष्ट्रिय टोलीका कप्तान समेत रहेका ३१ वर्षीय किरणले ८ खेलमा पूरा ७२० मिनेटनै मैदानमा बिताए । टोलीको नेतृत्वसँगै किरणले मैदानभित्र खेलाडीलाई उच्च मनोबल बढ्याउँदै फाइलनसम्म पुर्याउँन महत्वपूर्ण भुमिका गरे । उनले लतिपुरको एक पेनाल्टी समेत बचाएका थिए ।
प्रतियोगितामा किरणसँग २ क्लिन सिट रह्यो । किरण प्रतियोगिताको उत्कृष्ट गोलरक्षक समेत घोषित भए ।घरेलु लिगसँगै किरणलाई माल्दिभ्स टिसी स्पोर्टस् र भारतीय आईलिग पञ्जाब एफसीबाट दुई सिजन खेलको अनुभव रहेको थियो ।

रन्जित धिमाल (विराटनगर सिटी एफसी)
रन्जिन धिमाल पूर्व विराटनगर सिटी एफसीका मार्की खेलाडी तथा कप्तान हुन् । पेपरमा बलियो देखिएको बिराटनगर यद्यपि प्लेअफमा भने स्थान बनाउन सकेन । यद्यपि लेफ्ट ब्याक रन्जितले प्रतियोगितामा खेलेका ६ खेलमा निकैनै राम्रो प्रदर्शन गरे । विशेषतः विपक्षी अट्याकरलाई रोक्दै ओभर ल्यापमा बल बढाउने र क्रस गर्ने रन्जितको क्षमता हो र जुन निकैनै लोभलाग्दो हुने गर्दथ्यो । जसका कारण उनि अन्य लेफ्ट ब्याकलाई पछाडी पर्दै लिगको ड्रिम टिममा पर्न सफल भए ।
पूर्वका खेलाडी रहेका रन्जितले मैदानमा ४७० मिनेट बिताएका थिए । चोटका कारण भने ३० वर्षीय रन्जितले ३ खेलमा परिवर्तन हुँदै मैदान छाडेका थिए । पछिल्ला सिजनमा थ्रीस्टार, मछिन्द्रबाट खेलेका रन्जितको प्रभावशाली प्रदर्शन रहँदै आएको छ ।

पिटर सेगुन (ललितपुर सिटी एफसी)
पिटर सेगुन ललितपुर सिटी एफसीका सेन्टर डिफेण्डर हुन् । सुरुवाती ३ खेल भिषा प्रक्रियाका कारण गुमाएका पिटरले त्यसपछिका ५ खेलसम्म पूरा मैदानमा बताए । पछिल्ला ४ खेलमा अपराजित रहेको ललितपुरलाई इलिमेटर राउण्डसम्म पुर्र्याउन कसैको भूमिका महत्वपूर्ण थियो भने त्यो पिटर सेगेन हुन् ।
पछिल्लो समय थ्रीस्टार, मछिन्द्रहुदै २७ बर्षीय नाईजेरियन सेन्टर डिफेण्डर ललितपुर पुगेका हुन् । उनले एनएसएलमा ४५० मिनेट मैदानमा बिताए । आफ्नो पोसेसनमा मेहनतका साथ खटिने पिटरले बिपक्षी स्ट्राइकरहरुलाई सहजै खेल्न दिएनन् ।

फ्रान्कलिन कुएटा टला (धनगढी एफसी)
धनगढीले आफ्नो सेन्टर डिफेन्समा एर्नेष्ट टंम्पीलाई झिकाएकोथियो । पहिलो खेल खेलेका उनि घाइते भए । त्यसपछि दुई खेलमा सेन्टरको भुमिकामा रमेश दंगालले निर्वाह गरे । पहिलेनै सेन्टरमा अभाव देखेको उसले म्यामरुनका फ्रान्कलिन कुएटा टलालाई चौथो खेलमा अनुबन्ध गर्यो ।
अफ्रिकन रुटस् एसोसियसनबाट खेल्न आएका उनलाई भिषाको कुनै समास्यानै भएन र चौथो खेलमै मैदान प्रवेश गरे । पछिल्ला ५ खेलमा पूरा समय मैदान बिताएका २५ बर्षीय टलाले ४५० मिनेट धनगढीको जर्सीमा विताए । उनि एक खेलमा म्यान अफ दि म्याच समेत भए । विपक्षी अट्याकरलाई सहजै निगरानीमा राखी बिना दबाब खेल खेल्नु टलाको शैली हो ।

दिनेश राजवंशी (धनगढी एफसी)
धनगढीलाई एफसीको यी खेलाडीले पूरा समय मैदानमा बिताए । खासमा उनको मुख्य पोसेससन राईट ब्याक हो । तर यस प्रतियोगतामा टोलीको अभावसँगै दिनेश सेन्टरमा झरेर खेले । जहाँ उनले टोलीले दिएको भूमिकालाई न्याय दिलाए ।
२२ वर्षीय दिनेशको उच्च प्रदर्शनसँगै धनगढी फाइनल पुग्न सफल रह्यो । दिनेशनै प्रतियोगिताको उत्कृष्ट डिफेण्डर घोषित भए । ८ खेल खेल्दै दिनेशले अतिरिक्त ३० मिनेट गरि मैदानमा ७५० मिनेट बिताएका थिए । यस क्रममा उनले धनगढीको गोल लाईनबाट १ बल बचाएका थिए । अधिकतम २ लामा धनगढीमा आबद्ध भएका दिनेश नेपाल राष्ट्रिय फुटबल टोलीका सदस्य समेत हुन् । उनीसँग घरेलु लिगमा पुलिस र च्यासलबाट खेलेको अनुभव रहेको थियो ।

तेज तामाङ (काठमाडौं रेजर्स)
घरेलु लिग तथा अन्तराष्ट्रिय प्रतियोगितामा उच्च प्रदर्शन गर्दै आईरहेका तेजलाई काठमाडौं रेजर्सले अधिकतम २ लाखमा अनुबन्धन गरेको थियो । पहिलो खेलनै कोरोनाका कारण गुमाएका उनले त्यसपछिका ८ खेलमा सत प्रतिशत खेले र टोलीलाई उपाधिनै जिताए । अन्तिम खेलमा ह्यामिस्ट्रिङ चोटको कारण उनले उपाधि पछि सजिलै सेलेब्रेसन समेत गर्न सकेनन् ।
८ खेलमा अतिरिक्त ३० मिनेट सहित ७५० मिनेट खेलेका तेजले १ गोल समेत गरे । मैदानको बीच भागमा बल होल्ड गर्दै अट्याकरलाई बल उपलब्ध गराउने र बक्स बाहिरबाट लामा सट प्रहार गर्ने तेजको खुबी हो । घरेलु लिगमा पुलिसबाट खेल्दै आएका २३ बर्षिय तेज नेपालको उमेर समूहको समेत प्रभाबशाली खेलाडी हुन् ।

सन्तोष तामाङ (विराटनगर सिटी एफसी)
सन्तोष तामाङलाई विराटनगर सिटीले न्युनतम १ लाखमै खरिद गरेको थियो । उनको प्रदर्शन एनएसएलमा निकैनै उच्च रह्यो । बल होल्डिङ मिडफिल्डरको रुपमा रहेका २६ वर्षीय सन्तोषले केहि आकर्षक गोल समेत गरे । उनको गोल र खुबीको चर्चा निकै चल्यो । राष्ट्रिय टोलीका सदस्य सन्तोषले बल होल्ड गर्दै बक्स बाहिरबाट निकैनै सुन्दर बल प्रहार गर्ने र गोल गर्ने काम गरे ।
फ्रेण्डस् क्लब हुँदै हाल त्रिभुवन आर्मी फुटबल क्लबमा रहेका सन्तोषले टोलीलाई प्लेअफ र फाइनल सहित उपाधिदिलाउन नसकेपनि प्रतियोगितामा पूरा ६ खेल खेल्दै ३ गोल गरे । मैदानमा ५४० मिनेट बिताएका सन्तोषले चितवन, बुटबल लुम्बिनी र धनगढीलाई निकैनै आकर्षक गोल गरेका थिए ।

नुर्लान नोभ्रुजोभ जाहिद (ललितपुर सिटी एफसी)
अजरबैजान युथ टोलीका सदस्य नुर्लान नोभ्रुजोभ जाहिद पहिलो पटक नेपाल आएका हुन् । सुरुवाती केहि खेलमा लय समात्न नसकेका उनले पछिल्ला खेलहरुमा भने प्रभावशाली प्रदर्शन जारी राखे । विंगरको भूमिकामा रहेका होचा कदमा नुर्लानले ओभर ल्यापमा बल बढाउदै अट्याकरलाई सहजै क्रस गर्ने र बल उपलब्ध गराउने कार्य गरे । जसको खेल प्रेरित ललितपुर पुनरागमन गर्दै एलिमिनेटर राउण्डसम्म पुग्न सफल भयो ।
८ खेल खेलका नुर्लानले एक खेलमा भने चोट बोकदै मैदान छाड्न बाध्य भए । बुटबल लुम्बिनीविरुद्ध ४६ औं मिनेटमा चोट बोक्दै बाहिरिनु बाहेक उनले मैदानमा ६७६ मिनेट बिताए । अजरबैजानको यू १९ र २३ टोलीको अनुभव बोकेका २८ वर्षीय नुर्लानले एनएसएलमा २ गोल गरे ।

मेसौके ओलोमोउ (काठमाडौं रेजर्स)
मेसौके ओलोमोउ पहिलो संस्करण एनएसएलको पहिलो तथा अन्तिम ह्याट्रिक कर्ता रहे । विदेशी कोटोमा काठमाडौं रेजर्समा अनुबन्धित भएका क्यामरुनका यी खेलाडीले लिगमा सर्वाधिक ८ गोल गरे । उनी लिगको उत्कृष्ट मिडफिल्डर समेत चुनिए ।
यस अघि संकटा क्लबबाट ए डिभिजन लिग खेल्न आएका उनले लिगमा भने प्रभाव जमाउन सकेका थिएनन् । एनएसएलमा विंगर तथा स्ट्राइकर दुबै भूमिकामा रहेका मेसौकेले दुबै भूमिका सहजै निर्बाह गरे ।
पहिलो खेल ललितपुरविरुद्ध १ गोल गरेका उनले विराटनगरविरुद्ध ३ गोल, चितवनविरुद्ध १, एलिमिनेटर राउण्डमा ललितपुरविरुद्ध २ तथा फाइनलमा निर्णायक गरि प्रतियोगितामा ८ गोल पूरा गरेका हुन् ।
क्यामरुन यी खेलाडीको बल नियन्त्रणमा लिने र तिब्र गतिमा बल अगाडी बढाउदै फिनिसिङ गर्ने शैली निकैनै उत्कृष्ट थियो ।

अन्जन बिष्ट (ललितपुर सिटी एफसी)
ललितपुर सिटीका मार्की खेलाडी तथा कप्तान हुन् अन्जन बिष्ट । सुरुवाती ४ खेलमा ३ अंक मात्रै बनाएको ललितपुरले अन्तिम २ खेलमा सतप्रतिशत जित निकाल्दै प्लेअफ स्थान बनायो । एलिमिनेटर राउण्डसम्म पुगेको ललितपुरलाई अन्जनले मार्की खेलाडी र कप्तानी पालीको न्याय गरेका थिए ।
स्ट्राइकरको भुमिकामा होस् या विंगरको भूमिकामा होस् २३ वर्षीय अन्जन पुरा समय खटिएर खेले । ८ खेलमा पुरा ७२० मिनेट मैदान विताएका अन्जनले ३ गोल गरे । अन्जसँग घरेलु लिगमा मनाङ मर्स्याङ्दीसँगै विभिन्न अन्तराष्ट्रिय प्रतियोगिता खेलेको अनुभव छ । उनी एनएसएलको उत्कृष्ट स्ट्राइकर चुनिए ।

पेड्रो जाभियर मान्जी (विराटनगर सिटी एफसी)
स्पेनिस पेड्रो जाभियर मान्जी पहिलो पटक नेपाल आएका हुन् । व्यवसायिक खेलाडी मान्जीले सुपर लिगमा विराटनगर सिटी एफसीले अनुबन्धन गरेको हो ।
३२ वर्षीय मान्जीले सुपर लिगमा ६ खेल मात्रै खेल्न पाए । तर उनले मैदानमा आफुलाई प्रमाणित गरे । सुरुवाती केहि खेलमा उनि आफ्नो लय समात्नमै केन्द्रित रहे ।
आफ्नो लयसँगै मान्जीले पछिल्ला ३ खेलमा ४ गोल गरे । मैदानमा ५४० मिनेट बिताएका मान्जीको उत्कृष्ट फिनिसिङनै रुचाईएको बिषय हो । मैदानको मध्यभागबाट गोलरक्षक बिट भएपछि उनले चतुरताका साथ प्रहार गर्ने शैलीलाई नेपाली खेलाडी तथा प्रशिक्षकले रुचाएका छन् । उनले अन्तिम खेलमा मैदानमा देखाएको अनुशासनलाई भने नेपाली दर्शकले समेत तारिफ गरेका छन् । नेपालमा लामो समयको लिग हुने हो र उनको आगमन हुने हो भने मान्जी नेपालमा आउने विदेशी कोटाको सर्वश्रेष्ठ खेलाडी हुनेछन् ।