काठमाडौं । पहिलो फ्रेन्चाईज फुटबल नेपाल सुपर लिग (एनएसएल) आज (शनिबार) सुरु हुँदैछ । करिब तीन हप्ता चल्ने प्रतियोगितामा ७ शहरलाई फ्रेन्चाईज गरिएको छ ।
विराटनगर सिटी एफसी, एफसी चितवन, काठमाडौं रेजर्स, ललितपुर सिटी, पोखरा थण्डर्स, बुटबल लुम्बिनी एफसी र धनगढी एफसीले फ्रेन्चाईज फुटबल खेल्दैछन् ।
सहभागी टिमले अक्सनबाट १४ खेलाडी किने । टिमले ३ विदेशी र २ स्थानीय खेलाडी थप्न पाउनेछन् । प्रतियोगिताको दौरान खेलाडीमा कोरोना देखिए अन्य खेलाडी थप्न पाईने आयोजकले जनाएको छ । कोरोनाको दोस्रो लहरका कारण प्रतियोगिता दर्शक विहीन हुनेछ ।
प्रतियोगिताको अघिल्लो दिन पत्रकार सम्मलेनमा सहभागी टिमका कप्तान र प्रशिक्षकले धारणा राखे । सबैले तयारीको समय अपुग भएको गुनासो गरे र उपाधिमा दाबेदारिता प्रस्तुत गरे ।
प्रतियोगिताको विजेताले ३५ लाख प्राप्त गर्दा दोस्रो हुनेले १५ लाख रुपैयाँ हात पार्नेछ । यस्तै प्रतियोगिताको विधागततर्फ ६ उत्कृष्टले १ लाख प्राप्त गर्दा प्रत्येक खेलको म्यान अफ दि म्याच र उदयमान खेलाडीले क्रमश २५ र १० हजार रुपैयाँ पाउनेछन् ।
प्रतियोगिता सुरु हुँदै गर्दा सहभागी टिम र खेलाडीको संयोजन हेर्दा कागजमा धनगढी एफसी र विराटनगर सिटीले फ्रेन्चाईजको उपाधिमा बलियो दाबेदारिता प्रस्तुत गर्ने देखिन्छ ।
धनगढी सुवास शाहीको टिमको स्वामित्वको टिम हो । धनगढीको टिममा सबै पोजिसनमा राम्रा खेलाडी अनुबन्धित गरेको छ । दक्षिण एसियाली फुटबलका उत्कृष्ट गोलकिपर किरण चेम्जोङ कप्तानीको धनगडीको मिडफिल्ड र फरवार्ड लाईनमा राम्रा खेलाडी छन् ।
किरणले धनगढीको पोस्ट सम्हाल्दा राष्ट्रिय टिमका दिनेश राजवंशी र निशान खड्काले डिफेन्स लाईन सम्हाल्नेछन् । अफ्रिकन खेलाडी टेम्पेको उपस्थितीले धनगढीको डिफेन्स लाईन अझ बलियो देखिएको छ । उनी घरेलु लिगको पछिल्ला सिजनमा सबैभन्दा प्रभावशाली खेलाडी बनेका थिए ।
मिडफिल्डमा मार्की खेलाडी विशाल राईसँगै पुजन उपरकोटी, रुपेश केसी र विवेक बस्नेत लगायतका खेलाडीले राम्रो प्रभाव जमाउने अपेक्षा गरिएको छ । फरवार्ड लाईनमा आफिज ओलावले र युवा खेलाडी दर्शन गुरुङको उपस्थितीमा धनगढी बलियो देखिन्छ । अफिज घरेलु लिगका सर्वाधिक आक्रकम र सफल फरवार्ड हुन् ।
अर्को टिम विराटनगर भने स्पेनिस फरवार्ड पेड्री मान्जीलाई एनएसएलमा प्रस्तुत गर्दैछ । एनएसएल खेल्न आएको विदेशी खेलाडी मध्य मान्जीलाई उच्च कोटीको खेलाडीको रुपमा हेरिएको छ । मान्जीले पछिल्लो दुई सिजन भारतीय आईलिगमा उच्च प्रदर्शन गरेका थिए । सोहि कारण उनलाई एनएसएलमा उपलब्ध फरवार्ड मध्य राम्रो स्ट्राइकर मानिएको छ ।
विराटनगरले पछिल्लो समय मनाङ मस्र्याङ्दी क्लब र मछिन्द्र क्लबलाई लिग जिताउन महत्वपूर्ण भुमिका निर्वाह गरेका क्यामरुन खेलाडी एडेलाजा सोमिडेलाई पनि टिममा आबद्ध गरेको छ । शारिरिक रुपमा बलियो एडेलाजा तिव्र गतिका फरवार्ड मानिन्छन् । एडेलाजा र पेड्रीको जोडीले धेरै टिमलाई एनएसएलमा दुख दिने अनुमान गरिएको छ ।
विराटनगरलाई मार्की खेलाडी तथा कप्तान रन्जित धिमाल सहित घरेलु फुटबलमा उत्कृष्ट प्रदर्शन गर्दै आईरहेका सन्तोष तामाङ, सरोज दाहाल, सुनिल बल, निर कुमार राई लगायतका खेलाडी टिममा आबद्ध छन् । विराटनगरलाई भारतीय ए लाईसेन्स प्राप्त प्रशिक्षक यान लले नेतृत्व गर्नेछन् ।
एनएसएललाई लिएर सबै टिमले राम्रो तयारी गर्न पाएनन् । तयारीको समय सबै टिमलाई पुगेन । खेलाडीहरु मोफसलको प्रतियोगितामा व्यस्त भए । काठमाडौंमा रहेका धेरै टिमले अभ्यासका लागि मैदाननै पाएनन् । हुन त घरेलु लिग फुटबलको उपाधिमा विदेशी खेलाडी निर्णायक देखिदै आएका छन् । पहिलो फ्रेन्चाईज फुटबलमा समेत विदेशी खेलाडीको प्रर्दशन निर्णायक हुने अपेक्षा गरिएको छ । अधिकांश विदेशी खेलाडी समेत नयाँ भएकाले उपाधि होडबाट अनुमान गर्न हतारो हुने देखिन्छ । त्यसका लागि सुरुवाती केही खेलको नतिजा हेर्नुपर्ने प्रशिक्षक मेघराज केसी बताउँछन् ।
सहभागी अर्को टिम बुटबल लुम्बिनीलाई तीन विदेशी खेलाडी सहित घरेलु फुटबल चर्चित अनुहार रविन श्रेष्ठ, सेसेहाङ आङ्देम्बे, आमिर श्रेष्ठ, आशिष लामा, सुमन लामा, रन्दिप पौडेल, लक्ष्मण रुचाल जस्ता खेलाडीको साथ छ ।
प्रशिक्षक मेघराज केसी नेतृतवको एफसी चितवन एफसीको टिममा मार्की खेलाडी भरत खवाससँगै विशाल सुनार, मनिष थापा, बिकास खवास, टेक बुढाथोकी, बिकास तामाङ, विश्व अधिकारी लगायतका खेलाडी छन् ।
बालगोपाल महर्जन नेतृत्वको काठमाडौं रेजर्सले मार्की खेलाडी विकेश कुथु सहित तेज तामाङ, संजोक राई, त्रिदेभ गुरुङ, विश्वास श्रेष्ठ लगायतका खेलाडीलाई समावेश गरेको छ ।
अन्जन बिष्ट मार्की खेलाडी रहेको ललितपुरलाई दुई युरोपेली खेलाडी सहित घरेलु खेलाडीमा युवा खेलाडी एरिक बिष्ट, पाल्साङ लामा, अर्पण कार्की, मिक्छेन तामाङ लगायतका खेलाडीले साथ दिनेछन् । पछिल्लो समय टिममा आबद्ध भएका पिटर सेगुनको आगमनले ललितपुरले डिफेन्स लाईनलाई थप मजबुद बनाएको छ ।
युरोपबाट आएका दुई खेलाडीले टिमको आक्रमण लाईन थप मजबुद बनेको ललितपुरको भनाई छ ।
यता, पोखरालाई तीन क्यामरुन खेलाडी सहित कप्तान अनिल गुरुङ, नवयुग श्रेष्ठ, दिप कार्की, अजित भण्डारी, रवि पासवान, गौतम श्रेष्ठ, सुजित बुठाथोकी लगायत खेलाडीको साथ रहेको छ ।
