त्रिकोणात्मक सिरिज : तथ्यमा नेपालको प्रदर्शन

काठमाडौं । कीर्तिपुरस्थित टियु अन्तराष्ट्रिय क्रिकेट मैदानमा जारी त्रिकोणात्मक टी–ट्वान्टी सिरिजमा नेपाली खेलाडीले सुधारिएको खेल प्रस्तुत गरे । सिरिजमा केही नेपाली खेलाडीले टी–ट्वान्टी अन्तर्राष्ट्रिय क्रिकेटमा कीर्तिमान बनाए भने केहीले उत्कृष्ट प्रदर्शन गरे ।

सिरिजका चार खेल खेलेको नेपाल तीन खेलमा जित र एक खेलमा हार व्यहोर्न पुग्यो । तर, सिरिज भर नेपालको प्रदर्शन भने सम्झना योग्य नै रह्यो । धेरै खेलाडीले सिरिजमा सम्झन लायक प्रदर्शन गरे ।

टी–ट्वान्टी अन्तर्राष्ट्रियका २५ खेल मध्येमा २१ इनिङ्स खेलेका उपकप्तान दिपेन्द्र सिंह ऐरीले आफ्नो पहिलो टी–ट्वान्टी अन्तर्राष्ट्रिय अर्धशतक पूरा गरे । उनले नेदरल्यान्ड्सविरुद्धको खेलमा आफ्नो टी–ट्वान्टी अन्तर्राष्ट्रिय करियरको पहिलो अर्धशतक पूरा गरेका थिए ।

नेदरल्यान्ड्सविरुद्ध चौथो नम्बरमा ब्याटिङ गर्न आएका ऐरीले ६० रनको अर्धशतकीय इनिङ्स खेलेका थिए । उनले ३० बलमा ३ चौका र ५ छक्का सहित अर्धशतक बनाएका हुन् ।

कुशलको कीर्तिमान -

नेपाली राष्ट्रिय क्रिकेट टोलीका ओपनर कुशल भुर्तेलले विश्व कीर्तिमान बनाए । उनले टी–ट्वान्टी अन्तराष्ट्रिय क्रिकेटमा दुर्लभ कीर्तिमान बनाएका हुन् ।

नेदरल्यान्ड्सविरुद्ध टी–ट्वान्टी अन्तर्राष्ट्रियमा डेब्यु गरेका कुशलले डेब्यसँगै लगातार तीन अर्धशतक बनाए । उनी टी–ट्वान्टी अन्तर्राष्ट्रियमा डेब्युपछि लगातार तीन अर्धशतक बनाउने विश्वकै पहिलो खेलाडी बने ।

कुशलले नेदरल्यान्ड्सविरुद्धको पहिलो तथा डेब्यु खेलमा ६२ रन बनाएका थिए । उनले ४६ बलको सामना गर्दै समान ५ चौका र छक्काको मद्दतमा ६२ रन जोडेका थिए ।

त्यसपछि मलेसियासँगको आफ्नो दोस्रो खेलमा पनि उनले अर्धशतक बनाएका थिए । उनले ४२ बलमा ३ चौका र ५ छक्का प्रहार गर्दै ६१ रनको अविजित इनिङ्स खेलेका थिए ।

कुशलले नेदरल्यान्ड्सविरुद्धको दोस्रो खेलमा आफ्नो टी–ट्वान्टी अन्तर्राष्ट्रिय करियरको तेस्रो अर्धशतथक बनाए । उनले नेदरल्यान्ड्सलाई २ सय ७ रनको लक्ष्य सुम्पिँदा ६२ रनको जोडेका थिए । कुशलले ४६ बलमा ८ चौका र एक छक्का प्रहार गरेका थिए ।

कुशलले लगातार तीन खेलमा अर्धशतक बनाउने खेलाडीमा भारतका विराट कोहली, अष्ट्रेलियाको डेभिड वार्नर, सेन वाट्सन, पाकिस्तानका बाबर आजम, श्रीलंकाका कुमार संगकारासँग पनि बराबरी गरेका छन् ।

टी–ट्वान्टी अन्तराष्ट्रिय क्रिकेटमा लगातार ४ अर्धशतक बनाउने खेलाडीको कीर्तिमान भने दुई खेलाडीको नाममा छ । लगातार ४ अर्धशतक बनाउनेमा वेष्ट इन्डिजका क्रिस गेल र न्युजिल्यान्डका ब्रेण्डन म्याकुलम रहेका छन् ।

कुशलले सिरिजका चार खेल खेल्दा एक खेलमा अविजित रहँदै २ सय एक रन जोडेका छन् । उनी सिरिजको सर्वाधिक स्कोरकर्ताको शीर्ष स्थानमा छन् । दोस्रो स्थानमा नेदरल्यान्ड्सका म्याक्स ओ डाउड रहेका छन् । उनले तीन खेलमा एक शतकसहित १ सय ५२ रन जोडेका छन् ।

डेब्युमा कमलको तीन विकेट 

नेपाली राष्ट्रिय त्रिकेट टोलीका मिडियम पेस बलर कमल सिंह ऐरीले पनि जारी त्रिकोणात्मक टी–ट्वान्टी सिरिजमा डेब्युको अवसर पाए । सुरुवाती तीन खेलमा बेन्चमै सिमित रहेका कमल मलेसियासँगको चौथो खेलमा प्लेइङ- ११ मा मौका पाएका थिए ।

एक खेल अगावै नेपालले सिरिजको फाइनलमा स्थान बनाएपछि डेब्यु गर्न बाँकी रहेका कमलले पनि मलेसियाविरुद्धको खेलमा टी–ट्वान्टी अन्तर्राष्ट्रियमा डेब्युको अवसउर पाएका थिए ।

कमलले डेब्यु खेलमा मलेसियाविद्ध टिमको सातौ ओभर लिएर बलिङ गर्न आए । उनले आफ्नो टी–ट्वान्टी अन्तर्राष्ट्रिय करियरको पहिलो ओभरमा विना विकेट ८ रन खर्चिए ।

त्यसपछि आफ्नो स्पेलको दोस्रो ओभर लिएर नवौं ओभरमा आए । उनको पहिलो बलमा मलेसियाका विरन्दीप सिंहले एक रन लिए । दोस्रो बलमा उनले शर्विन मुनियन्दीलाई एलबीडब्लुको सिकार बनाउँदै टी–ट्वान्टी अन्तर्राष्ट्रियमा आफ्नो पहिलो विकेट लिए ।

त्यसपछिको बलमा एक रन खर्चेका उनले आफ्नो दोस्रो ओभरको अन्तिम बलमा आसिफ शेखबाट क्याच गराउँदै विरन्दस्पलाई पेभिलियन फर्काए । दोस्रो ओभरमा कमलले मात्र दुई रन खर्चेर दुई विकेट लिए ।

टिमको ११ औं तथा आफ्नो तेस्रो ओभरमा उनले ६ रन खर्चेर विकेट लिन सकेनन् । त्यसपछि उनी आफ्नो स्पेलको अन्तिम ओभर लिएर २० औ ओभरमा अलिङ अट्याकमा आए । उनले २० औं ओभरको पहिलो बलमा कप्तान ज्ञानेन्द्र मल्लको हातबाट मुहम्मद वाफिकलाई आउट गरे । वाफिकलाई आउट गरेसँगै कमलले आफ्नो डेब्यु खेलमा ३.१ ओभरमा मात्र १६ रन खर्चदै ३ विकेट लिए ।

नेपालको स्कोर २ सय भन्दा माथि 

नेपाली क्रिकेटमा बलिङ साइड राम्रो भएपनि ब्याटिङ साइडमा भने धेरै प्रश्न उठ्ने गरेका थिए । धरमराएको नेपाली क्रिकेटको ब्याटिङमा मुख्य कमजोरी नै ओपनिङ जोडी थियो । बारम्बार ओपनिङमा खेलाडी परिक्षण गर्दा असफल बनेको नेपाली टोलीले अन्तर्राष्ट्रियका कुनै पनि खेलमा लामो इनिङ्स खेल्न सकिरहेको थिएन् ।

तर, लामो समयको अन्तरालपछि नेपाली टोलीले एक उत्कृष्ट ओपनिङ जोडी पाएको छ । डेब्यु खेलमा नै ओपनिङ जोडीद्धय कुशल भुर्तेल र आसिफ शेखले १ सय १६ रनको साझेदारी गर्दै नेपाललाई उत्कृष्ट सुरुवात दिएका थिए । त्यसपछिका खेलमा पनि यो जोडीले नेपाललाई उत्कृष्ट सुरुवात दिलाए ।

पछिल्लो खेलहरुमा ओपनिङ जोडीको उत्कृष्ट सुरुवात र टप अडरका ब्याट्सम्यानले राम्रो प्रदर्शन गर्दा नेपालले आफ्नो ब्याटिङ लाईन सुधारिएको संकेत देखाएको छ । त्रिकोणात्मक सिरिजका सुरुवाती दुई खेलमा लक्ष्य पछ्याएको नेपालले निर्भारित ओभर अगावै ९ विकेटको जित निकालेको थियो ।

त्यसपछिका दुई खेल खेल्दा पहिले ब्याटिङ गरेको नेपालले विपक्षी टोलीलाई २ सय भन्दा माथीको लक्ष्य सुम्पेको थियो । यसअघि मध्यम स्कोरमा सिमित हुने नेपालले दुई पछिल्लो खेलहरुमा २ सयभन्दा माथीको रन बनाउन थालेको छ ।

नेदरल्यान्ड्सविरुद्ध २ सय ६ रन जोडेको नेपालले, मलेसियासँगको खेलमा २ सय १७ रन जेडेको थियो । जुन टी–ट्वान्टी अन्तर्राष्ट्रियमा नेपालले १३ औं सागमा भुटानविरुद्ध जोडेको २ सय ३६ रनपछिको सर्वाधिक रन हो ।

करणको आक्रमक ब्याटिङ

तिव्र गतिका बलर करण केसी विश्व कीर्तिमान बनाउनबाट चुके । उनी भारतीय क्रिकेटर युवराज सिंहले बनाएको सर्वाधिक छिटो अर्धशतकको कीर्तिमान बराबरी गर्नबाट चुके । युवराज सिंहले १२ बलमा अर्धशतक पुरा रगेका थिए ।

टी–ट्वान्टी अन्तर्राष्ट्रियमा मलेसियाविरुद्ध आक्रमक ब्याटिङ प्रस्तुत गरेका करणले ११ बलमा ४४ रन जोडेका थिए । उनलाई अर्धशतक बनाउन एक छक्काको आवश्यक थियो । तर, उनी कीर्तिमान नजिक पुगरे कीर्तिमान बनाउनबाट चुके ।

१६ औं ओभरको चौथो बलमा उपकप्तान दिपे्रन्द्र सिंह ऐरी आउट भएपछि करण क्रिजमा पुगेका थिए । पहिलो बलको सामना गर्दै एक रनबाट सुरुवात गरे ।

१७ औं ओभरका दुई बल कुशल मल्ले फेस गरिसकेपछि तेस्रो बलमा करण इट्राइकमा पुगे । उनले तेस्रो बल डट खाए । तर, चौथो र पाँचौ बलबाट उनले छक्काको सुरुवात गरे ।

करणले १८ औं ओभरमा पाँच बल फेस गर्दा ४ छक्का र एक बलमा चौका बटुलेका थिए । १८ औं ओभरसम्म पुग्दा करणले १० बलमा ३८ रन जोडी सकेका थिए ।

१९ औं ओभरको पहिलो बल कुशलले सामना गर्दै एक रन जोडेर क्रिज करणलाई लिए । करणले दोस्रो बलमा छक्का प्रहार गर्दै ११ बलमा ४४ रन जोडे । अब उनलाई युवराज सिंहसँगको फाटेस्ट अर्धशतकको कीर्तिमानका लागि एक बलमा छ रन आवश्य थियो । उनी क्रिजमा रहेकाले उनीसँग त्यो अवसर समेत थियो । तर, उनी मुहम्मद वाफिकले गरेको १९ औं ओभरको तेस्रो बलमा एक रन लिग पुगे र कीर्तिमान बनाउनबाट चुके ।

त्यसपछि उनी २० औं ओभरमा पेभिलियन फर्किन पुगे । २० औं ओभरको पहिलो बल वाइड भएपछि साद अजिजले पुनः फालेको बलमा करण क्याच आउट हुँदै १३ बलमा ७ छक्का सहित ४५ रन जोडेर पेभिलियन फर्किए ।