काठमाडौं । त्रिकोणात्मक टी–ट्वान्टी क्रिकेट सिरिजको उपाधिका लागि आज नेपाल र नेदरल्यान्ड्स भिड्दै छन् ।
टियु अन्तर्राष्ट्रिय क्रिकेट मैदानमा नेपाल र नेदरल्यान्ड्सबीचको फाइनल खेल अपरान्ह १ः१५ बजे सुरु हुनेछ ।
करिब १४ महिनापछि अन्तर्राष्ट्रिय प्रतियोगितामा फर्किएको नेपाल घरेलु मैदानमा उपाधि जित्न चाहन्छ । उपाधि जित्दै नेपाल कोरोनाका कारण बारम्बार सरेको अन्तर्राष्ट्रिय प्रतियोगिताको पीडा भुल्न चाहन्छ ।
नेदरल्यान्ड्स पनि नेपाललाई उसैको घरेलु मैदानमा पराजित गर्दै सिरिजको उपाधि जित्न चाहन्छ । तर, उपाधिका लागि दुबै टोलीलाई त्यति सहज भने हुने छैन् ।
सिरिजको पहिलो खेलमा नेदरल्यान्ड्सलाई ९ विकेटले पराजित गरेको नेपाल फाइनलमा पनि त्यही लयलाई कायम गर्न चाहन्छ । सिरिजमा नै उच्च प्रदर्शन गरेको नेपाल फाइनलमा पनि नेदरल्यान्ड्सलाई कडा चुनौती दिन चाहन्छ ।
तर, नेदरल्यान्ड्ससँग पनि सिरिजको दोस्रो खेलमा नेपाललाई पराजित गरेको उच्च मनोबल छ । नेदरल्यान्ड्सले दोस्रो खेलमा नेपाललाई ३ विकेटले पराजित गरेको थियो । नेदरल्यान्ड्स पनि आफ्नो त्यहि लयलाई कायम राख्दै उपाधि जित्ने लक्ष्यका साथ मैदान उत्रिने छ ।
प्लेर टु वाच :
ब्याटिङ -
नेपाली टोलीका लागि दुई युवा ब्याट्सम्यान कुशत भुर्तेल र आसिफ शेख मुख्य हतियार रहने छन् । सिरिजमा उत्कृष्ट ओपनिङ जोडीको रुपमा देखिएका दुई ब्याट्सम्यान नेदरल्यान्ड्सविरुद्धको फाइनल खेलमा पनि ओपनिङ गर्ने सम्भावना छ ।
टी–ट्वान्टी अन्तर्राष्ट्रियमा नेदरल्यान्ड्सविरुद्ध नै डेब्यु गरेको यी दुई जोडीले थुप्रै कीर्तिमान समेत बनाएका छन् । उनीहरुले टी–ट्वान्टी अन्तर्राष्ट्रियमा अर्धशतकसँगै पहिलो विकेटका लागि सर्वाधिक १ सय १६ रनको साझेदारी समेत गरे ।
कुशल जारी सिरिजमा सर्वाधिक स्कोर कर्ता समेत हुन् । उनले नेपालका लागि सिरिजमा ४ खेलमा २ सय १ रन जोडेका छन् । त्यस्तै आसिफले १ सय ३८ रन जोड्दै सिरिजमा सर्वाधिक रन जोड्ने खेलाडीको तेस्रो स्थानमा छन् । उनीहरुलाई कप्तान ज्ञानेन्द्र मल्ल र उपकप्तान दिपेन्द्र सिंह ऐरीको पनि साथ रहनेछ ।
यता नेदरल्यान्ड्सका लागि म्याक्स ओ डोउड मुख्य हतियार हुन् । जारी सिरिजमा शतक प्रहार गर्ने उनी एक्लो खेलाडी समेत हुन् । उनले मलेसियाविरुद्धको खेलमा १ सय ३३ रनको अविजित शतकीय इनिङ्स खेलेका थिए ।
उनी सिरिजमा सर्वाधिक दोस्रो स्कारकर्ता समेत हुन् । म्याक्सले सिरिजमा तीन खेल खेल्दै १ सय ५२ रन जोडेका छन् । उनलाई मलेसियाविरुद्धको दोस्रो खेलमा भने विश्राम दिइएको थियो ।
त्यस्तै बेन कुपर र बास डे लिड पनि नेदरल्यान्ड्सका लागि मुख्य हतियार हुन् । कुपरले सिरिजमा चार खेलमा दुई खेलमा अविजित रहदै १ सय २९ रन जोडेका छन् । उनले दुई अर्धशतक समेत जोडेका छन् ।
त्यस्तै लिडले सिरिजको शीर्ष स्कोरकर्ताको पाँचौ स्थानमा छन् । उनले चार खेलका तीन इनिङ्सबाट एक अर्धशतक सहित १ सय २२ रन जोडेका छन् । उनले नेपालविरुद्ध तीन विकेटको जित निकाल्दा ८१ रनको अविजित इनिङ्स खेलेका थिए ।
बलिङ -
नेदरल्यान्ड्ससँगको खेलका लागि बलिङतर्फ लेग स्पिनर सन्दीप लामिछाने र तिव्र गतिका बलर करन केसी नेपालका लागि मुख्य हतियार हुने छन् ।
अन्तर्राष्ट्रिय स्तरमा फ्रेन्चाइजी टी–ट्वान्टी लिगको अनुभव बटुली सकेका सन्दीपले जारी सिरिजका चार खेलबाट ११ विकेट लिएका छन् । उनले नेदरल्यान्ड्सविरुद्धको पहिलो खेलमा चार ओभर बलिङ गर्दै दुई विकेट लिएका थिए । त्यस्तै दोस्रो खेलमा चार ओभरमा ४ विकेट लिएका थिए ।
बलिङ अलराउण्डर करण केसीले सिरिजमा खासै विकेट दिन नसके पनि उनी नेपालका लागि मुख्य हतियारा हुन् । उनले सिरिजका चार खेलमा ४ विकेट लिएका छ्न ।
यता नेदरल्यान्ड्सका लागि कप्तान पिटर सिलार मुख्य हतियार हुन् । उनले जारी सिरिजका चार खेलमा तीन इनिङ्स बलिङ गर्दै तीन विकेट लिएका छन् । उनले नेदरल्यान्ड्सका लागि ७३ टी–ट्वान्टी अन्तर्राष्ट्रियमा ६१ इनिङ्समा बलिङ गर्दै ६.८७ को इकोनोमीमा ५६ विकेट लिएका छन् ।
ब्याटिङमा पनि उत्कृष्ट देखिएका बास डे लिड नेदरल्यान्ड्सको बलिङतर्फ पनि मुख्य खेलाडी हुन् । उनले सिरिजका चार खेलमा ४ विकेट लिएका छन् ।
हेड टु हेड
नेपालको लागि नेदरल्यान्ड्स चिरपरिचित प्रतिद्वन्दी हो । नेपालले सर्वाधिक टी-ट्वान्टी नेदरल्यान्ड्सविरुद्ध खेलेको छ ।
यस सिरिजमा दुबै टोली उपाधि दाबेदार हुन् । एसोसिएट राष्ट्रको एक बलियो टोली नेदरल्यान्ड्सलाई घरेलु भूमिमा हराउनु नेपाललाई ठुलो चुनौती छ । यस्तै नेदरल्यान्ड्सलाई समेत नेपाली समर्थकसामु खेल्न सहज हुने छैन ।
हालसम्म नेपालले नेदरल्यान्ड्ससँग १० टी-ट्वान्टी खेल खेलेको छ । जसमा ८ टी-ट्वान्टी अन्तराष्ट्रिय रहेको छ भने २ टी–ट्वान्टी खेल रहेको छ । नेपालले कुनैपनि राष्ट्रसँग खेलेको यो खेल सर्वाधिक हो ।
नेपालले ३ टी–ट्वान्टी अन्तराष्ट्रिय खेलमा जित हात पारेको छ भने नेदरल्यान्ड्सले २ टी-ट्वान्टी र ४ टी-ट्वान्टी अन्तराष्ट्रियमा जित निकालेको छ । एक खेल नतिजा विहीन भएको थियो ।
नेपाल र नेदरल्यान्ड्सको पहिलो भेट सन् २०१२ को आईसीसी टी–ट्वान्टी विश्वकप छनोटमा भएको थियो । सो खेलमा नेपालले मात्र ८५ रन बनाउँदा नेदरल्यान्ड्सले ६ विकेटको सहज जित निकालेको थियो ।
सन् २०१३ मा पुनः विश्वकप छनोटमा समेत नेपाल १ सय ७ रन जोड्दा नेदरल्यान्ड्सले ५ विकेटको जित हात पार्यो ।
दुबै राष्ट्रको पहिलो टी ट्वान्टी अन्तराष्ट्रिय खेल सन् २०१५ मा भएको थियो । सन् २०१४ मा टी ट्वान्टी विश्वकप खेलेपछि पाएको एतिहासिक टी–ट्वान्टी मान्यतापछि नेपाल नेदरल्यान्ड्स भ्रमणमा निस्किएको थियो । चार खेलको भ्रमण सिरिजमा नेपालले मात्र १ खेलमा जित हात पार्यो, जुन नेपालले नेदरल्यान्ड्समाथि पहिलो पटक जित दर्ता गर्न सफल भयो ।
पहिलो खेलमा १ सय ३५ रनको लक्ष्य पछ्याएको नेपालले मात्र १ सय १६ रन बनाउन सक्यो । दोस्रो खेलमा नेपालले लज्जास्पद हार व्यहोर्यो । १ सय ७२ रनको ठुलो लक्ष्य पछ्याउने क्रममा नेपाल मात्र ६९ रनमा समेटियो ।
नेदरल्यान्ड्सविरुद्ध नेपालले बनाएको यो नै सबै भन्दा कम रन हो । तेस्रो खेलमा १ सय ४९ रनको लक्ष्य पछ्याउने क्रममा नेपालले १ सय ३१ रन बनायो ।
सिरिज अन्तिम खेलमा भने नेपालले नेदरल्यान्ड्सलाई पहिलो पटक पराजित गर्न सफल भयो । १ सय ४० रन पछ्याएको नेपालले २ बल बाँकी छँदा ७ विकेट गुमाएर लक्ष्य पुरा गर्यो ।
सन् २०१८ को इंग्ल्यान्ड भ्रमणमा नेपालले नेदरल्यान्ड्स र मेरिलिबोन क्रिकेट क्लबसँग त्रिकोणात्मक सिरिज खेल्यो । जसमा नेपाल र नेदरल्यान्ड्स बीचको खेल वर्षाले प्रभावित भयो ।
नेपालमा जारी सिरिज अघि नेदरल्यान्ड्स र नेपालले ओमानमा २०१९ मा भएको पाँच राष्ट्र सम्मिलित टी–ट्वान्टी सिरिजमा प्रतिस्पर्धा गरेको थियो । जुन खेलमा नेपालले नेदरल्यान्ड्सलाई ४ विकेटले पराजित गरेको थियो ।
घरेलु मैदानमा जारी सिरिजको पहिलो खेलमा नेपालले ९ विकेटको जित निकालेको थियो । दोस्रो भेटमा भने नेदरल्यान्ड्सले ३ विकेटको जित निकालेको थियो ।
-1747932338.JPG)
