काठमाडौं । नेपालमा पहिलो पटक आयोजना हुन लागेको फ्रेन्चाइज फुटबल प्रतियोगिता नेपाल सुपर लिग (एनएसएल) को सम्पूर्ण तयारी पूरा भएको छ ।
आयोजक नेपाल स्पोर्टस म्यानेजमेन्टले शुक्रबार पत्रकार सम्मेलन गर्दै प्रतियोगिताको सम्पूर्ण तयारी सकिएको जनाएको छ ।
आयोजकले कोरोना भाईरसको महामारी बाबजुत सरकारसँग छलफल गर्दै सरकारको अनुमतिमा लिग आयोजना गर्न लागेको जनाएको छ ।
प्रतियोगिताका डिरेक्टर श्रेयन्स कार्कीले क्लबले लगानी गरिसकेको कारण बन्द रंगशालामा भएपनि प्रतियोगिता आयोजना गर्न गईरहेको बताए ।
'टिमहरुले आफ्नो क्लबका लागि खर्च गरिसकेकोले हामीले बन्द ढोकामा भएपनि पहिलो संस्करण गर्नुपर्छ भनेर अघि बढेका हौं,' पत्रकार सम्मेलनमा प्रतियोगिता डिरेक्टर कार्कीले भने, 'सरकारको सबै स्थानमा पत्र पठाएर स्वीकृती लिएर अघि बढेका हौँ । बीचमा फरक अवस्था सिर्जना भएमा कसरि अघि बढ्ने भन्नेबाट सरकारसनाग छलफल भईरहेको छ ।'
कोरोना भाईरसको महामारीलाई मध्येनजर गर्दै सरकारले खेलकुद गतिविधि बन्द रंगशालामा आयोजना गर्न निर्देशन दिएको छ । जसको कारण पहिलो संस्करणको प्रतियोगिता दर्शक बिना संचालन हुनेछ ।
प्रतियोगिता डिरेक्टर कार्कीले दर्शकलाई अनुमति नमिले पनि फरक माध्यमबाट प्रतियोगिताले खेलकुदको माहोल ल्याउने बताए ।
'मैदानमै दर्शक नभएपनि यो प्रतियोगिताले देश भरी कुनै न कुनै माध्यमबाट खेलकुदको माहोल ल्याउनेमा हामी विश्वस्त छौँ,' उनले भने ।
पहिलो संकरणको लिगमा ७ फ्रेन्चाइज टिमको सहभागिता रहेको छ ।
जसमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।
त्रिपुरेश्वरस्थित दशरथ रंगशालामा शनिबार काठमाडौं रेजर्स फुटबल क्लब र ललितपुर सिटी फुटबल क्लबबीचको खेलसँगै प्रतियोगिताको सुरुवात हुनेछ ।
काठमाडौं र ललितपुरबीचको उद्घाटन खेल साँझ ५:३० बजे सुरु हुनेछ ।
अखिल नेपाल फुटबल संघ (एन्फा) को प्राविधिक सहयोगमा हुने लिग राउण्ड रोबिनको आधारमा हुनेछ । जेठ १ सम्म सञ्चालन हुने लिगमा कुल २५ खेल हुनेछ ।
विजेतालाई ३५ लाख :
प्रतियोगिताको विजेताले ३५ लाख पाउने आयोजकले जनाएको छ ।
यस्तै उपविजेताले १५ लाख पाउने छन् । व्यक्तिगत विधातर्फ उत्कृष्ट हुनेले जनही १ लाख पाउने आयोजकले जनाएको छ ।
प्रतियोगिताको उत्कृष्ट युवा खेलाडीले १ लाख पाउने छन् ।
त्यस्तै हरेक खेलको उत्कृष्ट युवा खेलाडीले १० हजार र हरेक खेलको म्यान अफ दि म्याचले २५ हजार पाउने छन् ।
