काठमाडौं । नेपाल सुपर लिग फुटबलको फ्रेन्चाईज टिम धनगढी फुटबल क्लबसँग सगरमाथा सिमेन्ट र एस–आयल सेभेन लुब्रिकेन्ट जोडिएको छ ।
धनगढी एफसीको सह–प्रायोजकका रुपमा सगरमाथा सिमेन्ट र एस–आयल सेभेन जोडिएको हो ।
धनगढीले शुक्रबार सगरमाथा र एस–आयलसँग सम्झौता गरेको छ । दुवै कम्पनीले एक वर्षका लागि सम्झौता गरेको हो ।
सम्झौता पत्रमा धनगढी एफसीका अध्यक्ष सुवास शाही तथा सगरमाथा सिमेन्टको उत्पादक कम्पनी घोराही सिमेन्ट इन्डिष्ट्रिजका मार्केटिङ प्रमुख प्रतिक अधिकारी तथा एस–आयल नेपालको आधिकारिक विक्रेता त्रिशुल अटोमोबाइल्सका अध्यक्ष दीलिप भट्टराईले हस्ताक्षर गरे ।
सम्झौतापछि सगरमाथा सिमेन्टका अधिकारीले सगरमाथा सिमेन्ट नेपाली खेलकुदको पर्यायवाची नाम जस्तै बनिसकेको बताए ।
‘हामी लामो समयदेखि धनगढीको खेलकुदसँग जोडिएका छौं । खेलकुदको विकासमा योगदान गर्ने उदेश्य अनुरुप हामीले धनगढी एफसीसँग सह–प्रायोजन गरेका हौं,' सम्झौतापछि सगरमाथा सिमेन्टका अधिकारीले भने, 'धनगढी एफसीसँग जोडिन पाउँदा निकै खुशी छौं । सगरमाथा सिमेन्ट नेपाली खेलकुदको पर्यायवाची नाम जस्तै बनिसकेको छ । आउने दिनमा पनि धनगढीसँगको सहकार्यलाई हामीले निरन्तरता दिनेछौं ।’
एस–आयल सेभेनका भट्टराईले खेलकुदमा लगानी गर्ने योजनासहित धनगढीसँग जोडिएको बताए ।
‘विगतदेखि नै एस–आयल सेभनले खेलकुदमा लगानी गर्दै आएको छ । यसअघि विश्वका विभिन्न खेलकुदमा लगानी गर्दै आएको कम्पनीले यसपटक नेपाली खेलकुदमा पनि लगानी गर्ने सोचका साथ हामी धनगढी एफसीसँग जोडिएका छौं । धनगढी एफसीसँग जोडिन पाउँदा हामी उत्साहित छौं । हाम्रो सहकार्य अन्य वर्षमा पनि निरन्तरता दिनेछौं,’ एस–आयल सेभेनका भट्टराईले भने ।
धनगढीका अध्यक्ष सुवास शाहीले दुई ब्रान्डलाई जोड्न पाउँदा हामी एकदमै हर्षित भएको बताए ।
‘धनगढी एफसीसँग नेपालकै विश्वसनीय दुई ब्रान्डलाई जोड्न पाउँदा हामी एकदमै हर्षित छौं । दुवै ब्रान्डको आगमनले हाम्रो उत्साह अझै बढेको छ । सगरमाथा सिमेन्ट र एस–आयलले हामीप्रति देखाएको विश्वासप्रति आभारी छौं । यो सम्झौताले धनगढी फुटबलको मात्रै नभएर समग्र नेपाली फुटबलको विकासमा योगदान पुग्ने विश्वास हामीले लिएका छौं । यसवर्ष सुरुवात भएपनि आगामी वर्ष हामीबीचको सहकार्यले निरन्तरता पाउने विश्वास लिएका छौं,’ उनले भने ।
धनगढीका आइकोनिक खेलाडीमा राष्ट्रिय टोलीका कप्तान समेत रहेका किरण चेन्जोङ छन् । यस्तै मार्की खेलाडीमा विशाल राई रहेका छन् ।
शनिबारबाट सुरु हुने प्रतियोगितामा धनगढीले विराटनगर सिटी फुटबल क्लबविरुद्ध आइतबार पहिलो खेल खेल्दै एनएसएलको यात्रा थाल्नेछ ।
