डर्टमण्डको पुनरागमन जित

एजेन्सी । जर्मन बुन्डेसलिगा फुटबलमा बोरुसिया डर्टमण्डले सहज जित निकालेको छ ।

आइतबार राति भएको खेलमा डर्टमण्डले वेर्डेर ब्रेमेनलाई ४-१ गोल अन्तरले पराजित गरेको हो ।

डर्टमण्डको मैदानमा सुरुवाती अग्रता भने पाहुना टोलीले बनाएको थियो ।

१४ औं मिनेटमा मिलोट राशिकाले गोल गर्दै ब्रेमेनलाई अग्रता दिलाएका थिए ।

तर, खेलको २९ औं मिनेटमा जियोभानीले गोल गर्दै डर्टमण्डलाई १-१ गोलको बराबरीमा फर्काए ।

खेलको ३४ औं मिनेटमा अर्लिङ हालाण्डले पेनाल्टीमा गोल गरेपछि डर्टमण्ड २-१ ले अघि रह्यो ।

३८ औं मिनेटमा हालाण्डले व्यक्तिगत दोस्रो गोल गरेपछि डर्टमण्डले ३-१ को अग्रता बनायो ।

त्यसपछि खेलको ८७ औं मिनेटमा म्याट हुमेल्सले गोल गर्दै डर्टमण्डलाई ४-१ को जित दिलाए ।

जितसँगै डर्टमण्डले २९ खेलमा ४९ अंक जोडेको छ । डर्टमण्ड लिगको पाँचौं स्थानमा रहेको छ ।

ब्रेमेन ३० अंक जोडेर १३ औं स्थानमा रहेको छ ।