राष्ट्रिय टिमको प्रशिक्षणमा परेका स्यान्सु को हुन् ?

काठमाडौं । अखिल नेपाल फुटबल संघ (एन्फा) ले फिफा विश्वकप छनौट अन्तर्गत बाँकी तीन खेलका लागि ३२ खेलाडीलाई बन्द प्रशिक्षणमा बोलाएको छ ।

मुख्य प्रशिक्षक अब्दुल्लाह अलमुताईरीले चार नयाँ खेलाडीलाई समेट्दै ३२ खेलाडीलाई प्रारम्भिक चरणको बन्द प्रशिक्षणमा बोलाएको हो ।

प्रशिक्षक अब्दुल्लाहले स्यान्सु भुषाल, मनिष डाँगी, गौतम श्रेष्ठ र विवेक बस्नेतलाई पहिलो पटक राष्ट्रिय टोलीको प्रशिक्षणमा बोलाएका छन् ।

पछिल्लो समय राष्ट्रिय टोली बाहिर रहेका प्रकाश बुढाथोकी र सुमन लामालाई प्रारम्भिक चरणको प्रशिक्षणमा राखिएको छ ।

प्रशिक्षक अब्दुल्लाहले बोलाएको चार नाममा मनिष, गौतम र विवेक परिचित रहेपनि स्यान्सु भने नयाँ अनुहार हुन् । 

१९ वर्षीय मिडफिल्डर स्यान्सु कतारको स्थानिय एकेडेमीमा रहेर प्रशिक्षण गर्ने गर्छन् । उनको खेल हेरेपछि कुवेती प्रशिक्षक अब्दुल्लाहले स्यान्सुलाई टिमको प्रशिक्षणमा बोलाएको हो ।

प्रशिक्षक अब्दुल्लाहले स्यान्सु राष्ट्रिय टोलीको लागि क्षमतावान रहेका कारण टोलीमा समावेश गरेको एन्फालाई बताएका थिए ।

‘प्रशिक्षकबाट स्यान्सु राम्रो खेलाडी भएको जनाकारी आएको छ । उनले (प्रशिक्षक) राम्रो देखेपछि टोलीमा बोलाईएको हो,’ राष्ट्रिय टोलीका व्यवस्थापक मधुसुदन उपाध्यायले भने ।

स्यान्सुले नेपालको कुनै पनि उमेर समूहबाट खेलेका छैनन् ।

राष्ट्रिय टोलीमा बोलाइएका स्यान्सु पहिलो पटक आयोजना हुन लागेको फ्रेन्चाईज नेपाल सुपर लिग (एनएसएल) खेल्ने तयारीमा रहेका छन् । उनी एफसी चितवनको अभ्यास सत्रमा जोडिएका छन् । स्यान्सु क्लबका स्थानिय खेलाडीको कोटामा रहेका छन् ।

यता, कोरियामा रहेर व्यावसायिक फुटबल खेलिरहेका मनिष समेत पहिलो पटक प्रशिक्षणमा परेका हुन् । यस अघि उनले नेपाल आएर यू–१८ साफ च्याम्पियनसिप र यू–१९ एएफसी च्याम्पियनसिप छनोट खेलिसकेका छन् ।

यता, जावलाखेल युथ हुँदै हालै त्रिभुवन आर्मी पुगेका गौतम र आर्मीबाट व्यावसायिक फुटबल खेल्दै आएका विवेक बस्नेत समेत पहिलो पटक टोलीमा बोलाईएका हुन् ।

अब नेपालले अब्दुल्लाहको प्रशिक्षणमा जोर्डन, अष्ट्रेलिया र चाईनिज ताईपेविरुद्ध खेल्नेछ ।

अब्दुल्लाहले बोलाएको ३२ सदस्यीय टोली :

गोलरक्षक : किरण चेम्जोङ, विकेश कुथु, दीप कार्की, विशाल सुनार

डिफेन्डर ः अजित भण्डारी, रञ्जित धिमाल, अनन्त तामाङ, रोहित चन्द, निशान खड्का, दिनेश राजवंशी, छिरिङ गुरुङ, गौतम श्रेष्ठ, विकास खवास

मिडफिल्डर : त्रिदेव गुरुङ, मनिष डाँगी, तेज तामाङ, एरिक विष्ट, संजोक राई, विशाल राई, सुनिल बल, रवी पासवान, सेसेहाङ आङदेम्बे, सन्तोष तामाङ, विवेक बस्नेत, प्रकाश बुढाथोकी, स्यान्सु भुषाल, अन्जन विष्ट, सुमन लामा

फरवार्ड : दर्शन गुरुङ, अभिषेक रिजाल, नवयुग श्रेष्ठ, भरत खवास