काठमाडौं । नेपालको राष्ट्रिय क्रिकेट टोलीले शनिबारदेखि मलेसिया र नेदरल्यान्ड्ससँग त्रिकोणात्मक टी–ट्वान्टी सिरिज खेल्दैछ ।
काठमाडौंको त्रिवि मैदानमा डबल राउण्ड रोविनका आधारमा हुने प्रतियोगिताको पहिलो खेलमा नेपालले नेदरल्यान्ड्ससँग खेल्नेछ ।
लामो समय अन्तर्राष्ट्रिय प्रतियोगिता खेल्न नपाएको नेपाललाई मलेसिया र नेदरल्यान्ड्ससँग खेल्न सजिलो भने हुने छैन । आईसीसीको टी–ट्वान्टी वरीयतामा एसोसिएट राष्ट्रको पाँचौं स्थानमा रहेपनि नेदरल्यान्ड्स एसोसिएट राष्ट्र मध्यको बलियो टोली हो । नेदरल्यान्ड्स टेष्ट राष्ट्रलाई समेत मात दिएको टिम हो ।
मलेसियालाई भने ‘अण्डर डग’ टोली मानिएको छ । यसअघि नेपाललाई दुई खेलमा पराजित गरेको मलेसियालाई यस सिरिजमा ‘अण्डर डग’ टिमको रुपमा हेरिएको छ ।
नेपाली टोलीका कप्तान ज्ञानेन्द्र मल्लले भने आफ्नो क्रिकेटमा विश्वास राख्नुपर्ने बताउँछन् । उनले क्रिकेट भएकाले विपक्षी टिम जस्तो भएपनि आफुले राम्रो क्रिकेट खेल्नु पर्छ भन्ने विश्वास राख्ने बताए ।
‘पहिलो कुरा यो क्रिकेट हो । अर्को विषय भनेको विपक्षी कस्तो छ भन्दा पनि हामीले राम्रो क्रिकेट खेल्नु पर्छ ।’ कप्तान मल्लले खेलपाटीसंग भने, ‘अब टी–ट्वान्टीमा सबै टोली उस्तै–उस्तै हुन्छ । टी–ट्वान्टीमा जुन टिमले राम्ररी खेल्छ उसले जित्ने हो । तर, पनि हाम्रो टिम जुन किसिमले बनेको छ, त्यसले हामी अझ बलियो छौ जस्तो लाग्छ ।’
उनले केही खेलाडी टी–ट्वान्टीमा खास भएकाले टोलीमा समावेश गरेको बताए ।
उनले आसिफ सेख, कुशल भुर्तेल, कुशल मल्ल लगायतका खेलाडी टी–ट्वान्टीमा गेम चेन्जरको रुपमा टोलीमा प्रयोग गर्न सकिने बताए ।
‘आसिफ, कुशल, कुशलको खेल्ने स्टाइल टी–ट्वान्टीका लागि उपयुक्त हुने खालको छ । उनीहरु टी–ट्वान्टीलाई प्रस्ताव गर्दा नेपाली टोलीमा मिल्ने खालको टी–ट्वान्टीका खास खेलाडी हुन् ।’ उनले भने, ‘सन्दीप लामिछाने पनि अन्तर्राष्ट्रिय स्तरमा टी–ट्वान्टीमा राम्रो गरिरहेका खेलाडी हुन् । यसले अन्य खेलाडीलाई पनि आत्मविश्वास दिलाएको छ ।’
तिव्र गतिका बलरद्धय सोमपाल कामी र करन केसीले पनि अन्तर्राष्ट्रिय स्तरमा अनुभव लिएकाले टी–ट्वान्टीमा नेपाली टोलीलाई अझै बलियो बनाएको कप्तान मल्लको बुझाई छ ।
अबको तयारी विश्वकप
कप्तान मल्लले अबको तयारी टी–ट्वान्टी विश्वकपको रहेको बताए ।
उनले यस्ता प्रतियोगिताले नयाँ खेलाडी उत्पादनमा सहयोग पुग्ने भन्दै अबको तयारी टी–ट्वान्टी विश्वकपको रहेको बताए ।
‘हामीले भनिरहेका पनि छौ । अबको टी–ट्वान्टी विश्वकपका लागि त्यही अनुसारको खेलाडीहरु तयार गर्नु पर्छ ।’ उनले भने ।
उनले नयाँ खेलाडीको आगमनबारे प्रष्ट पारे । घरेलु क्रिकेटमा राम्रो प्रर्दशन गरेका कारण युवा खेलाडीलाई सिरिजमा मौका दिएको बताए ।
‘शाहब आलमले घरेलु प्रतियोगिताहरुमा राम्रो प्रदर्शन गरेका थिए । उनले त्यही प्रदर्शनलाई हेरेर राष्ट्रिय टोलीमा निरन्तरता दिनु परेको हो ।’ मल्लले भने ।
‘आलम राम्रो गर्न सक्ने क्षमता भएको खेलाडी हो । एकदमै क्षमतावान पनि छ । उसले यस प्रतियोगितामा आफुलाई प्रमाणित गर्नु पर्ने बेला पनि आएको छ ।’ कप्तान मल्लले भने, ‘आलम अझै यो भन्दा पनि अगाडी बढ्न सक्छ । पछिल्लो समय उसले ब्याटिङमा पनि सुधार गर्न थालेको छ ।’
उनले थपे, ‘आसिफ पनि राम्रो क्षमता भएको खेलाडी छ । उनले पछिल्लो सिजनमा राम्रो प्रदर्शन गरिरहेका छन् । राम्रो भैनहाले पनि निरास बनाउँदैन । यहि बेला हो जति सकिन्छ युवा खेलाडीलाई अवसर दिनु पर्ने र मोटिभेट गर्नु पर्ने ।’
उनले अन्तर्राष्ट्रिय खेलहरु आयोजनाका लागि अगाडी बढाउनु महत्वपूर्ण गरेको बताए । उनले यस्ता प्रतियोगितामा नयाँ खेलाडीले अवसर पाए राष्ट्रिय टोली निर्माणमा टेवा पुग्ने बताए ।
ब्याटिमा सुधारको अपेक्षा
नेपालले १४ महिना पछि अन्तर्राष्ट्रिय प्रतियोगिता खेल्दैछ । कोरोनाका कारण नेपालले खेल्ने तय भएका अन्तर्राष्ट्रिय खेलहरु बारम्बार सर्दै गए । नेपालले १४ महिना अन्तर्राष्ट्रिय खेल खेल्न पाएन ।
‘यो १४ महिनाको अवधिमा हामीले धेरै आशा गरेका थियौ कि धेरै एकदिवसीय खेल खेल्ने छौ । त्यो गुमायौ ।’ कप्तान मल्लले भने, ‘तर, अब कोरोनाका बाबजुद पनि हामीले घरेलु मैदानमा अन्तर्राष्ट्रिय प्रतियोगिता खेल्न पाउँदा सबै खेलाडी खुशी छौ ।’
सिरिजका लागि तयारी राम्रो भएको उनले सुनाए ।
नयाँ प्रशिक्षकको निगरानीमा रहेर प्रशिक्षण गर्दा तयारी राम्रो रहेको मल्लको भनाई छ ।
सबै खेलाडीले घरेलु प्रतियोगितामा राम्रो गरेकाले सकारात्मक नतिजाको अपेक्षा गरेको उनले बताए ।
‘हाम्रो राम्रो पक्ष भनेको टोलीमा रहेको सबै जसो खेलाडीली घरेलु प्रतियोगिता खेलिरहेका पनि थिए । उनीहरुले घरेलु प्रतियोगितामा राम्रो गरेका पनि थिए ।’ उनले भने, ‘उहाँहरु जसरी तयारी गरिरहनु भएको छ । त्यो सबैका लागि राम्रो हो । उनीहरुलाई यस्तो अवसर र स्थान आवश्यक छ ।’
उनले नेपाली खेलाडीको ब्यटिङ सुधारका लागि राम्रा तथा अन्तर्राष्ट्रिय बलरसँग धेरै भन्दा धेरै प्रतियोगिता खेल्न आवश्यक रहेको बताए ।
‘अन्तर्राष्ट्रिय बलरहरुसँग जति खेल्ने अवसर पायौ, त्यतिनै हाम्रो ब्याटिङमा सुधार हुँदै जाने हो । त्यसमा चाँही हामी चुक्छौ । एकै चोटी ठुलो स्थानमा गएर प्रदर्शन गर्दा पक्कै पनि हाम्रो ब्याटिङ लाइन चुक्छ । हामी क्षमता हुँदा हुँदै पनि गर्न सकिरहेका छैनौ । त्यसैले यस्तो खालको प्रतियोगिता गर्न आवश्यकछ ।’ मल्लले भने ।
पछिल्लो समय घरेलु मैदानमा आयोजना भएका एकदिवसीय क्रिकेटले खेलाडीको ब्याटिङमा सुधार देखाएको छ । पीएम कप र मेयस कपमा नेपाली ब्याट्सम्यानले सुधारिएको ब्याटिङ प्रस्तुत गरेका थिए ।
‘पछिल्लो समय एकदिवसीय क्रिकेटमा धेरैको ब्याटिङमा सुधार देखाएको छ । घरेलु प्रतियोगितामा ब्याट्सम्यानले २ सय ५० रन बनाएर पनि खेल सुरक्षित छैन । त्यो रन चेज गरिरहेका छन् । हामी यसलाई पनि एक सकरात्मक रुपमा लिन सक्छौ ।’ उनले भने ।
उनले थपे, ‘कोरोनाका कारण अझै भनेको जस्तो भइरहेको छैन । यो तीन महिनामा पनि हामी अझै सबै विषयलाई समेटेर लैजान सकिरहेका छैनौ । अब यसलाई हामीले कोरोनापछिको पहिलो खुट्किलोको रुपमा लिनु पर्छ । हामीले राम्रो प्रशिक्षक पनि पाएका छौ । व्यवस्थापक पनि सकरात्मक पक्षमा गारिरहेका छन् । यसलाई नै निरन्तरता दिने हो भने नेपाली क्रिकेट पहिले भन्दा राम्रो हुन्छ ।’
