'अण्डर डग' सँग नेपाललाई डर

काठमाडौं । त्रिकोणात्मक टी-ट्वान्टी सिरिजका लागि नेपाल आएको मलेसिया 'अण्डर डग’ टिम हो ।

तर, मलेसियाले नेपाललाई २ खेलमा पराजित गरिसकेको छ ।

हालसम्म नेपाल र मलेसियाबीच ४ टी-ट्वान्टी र ४ टी-ट्वान्टी अन्तराष्ट्रिय खेल भएको छ । जसमा नेपाल हाबी रहेको छ ।

नेपालले ३ टी-ट्वान्टी र ३ टी-ट्वान्टी अन्तराष्ट्रियमा जित हात पार्दा मलेसियाले २ खेलमा जित निकालेको छ ।

पहिलो पटक सन् २००७ को कुवेतमा भएको एसीसी टी–ट्वान्टी कपमा नेपालले मलेसियासँग खेलेको थियो ।  त्यस खेलमा नेपालले २१ रनको जित निकालेको थियो ।

टस हारेर पहिले ब्याटिङ गरेको नेपालले निर्धारित २० ओभरमा ९ विकेटको क्षतिमा १ सय २१ रन बनाएको थियो । नेपालका बसन्त रेग्मीले ३३ तथा परेश लोहनीले ३१ रन बनाए । १ सय २२ को लक्ष्य पछ्याएको मलेसिया १८ ओभर ५ बलमा १०० रनमा समेटिएको थियो । खेलको प्लेयर अफ द म्याच बसन्त रेग्मी घोषित भएका थिए ।

दोस्रो भेट युएईमा सन् २००९ को एसीसी टी–ट्वान्टी कपमा भएको थियो । जुन खेल नेपालले ६ विकेटले गुमाएको थियो ।

टस जितेर पहिले ब्याटिङ गरेको नेपालले निर्धारित २० ओभरमा ७ विकेट गुमाउँदै १ सय १२ रन बनायो । नेपालका महबुब आलमले सर्वाधिक ३१ रन बनाए । यस्तै ज्ञानेन्द्र मल्लले २२ तथा परेश लोहनीले १९ र पारस खड्काले १० रनको योगदान गरे । १ सय १२ रनको लक्ष्य पछ्याएको मलेसियाले १७ ओभर २ बलमा ४ विकेट गुमाउँदै लक्ष्य पूरा गर्यो ।

सन् २०१३ को एसीसी टी–ट्वान्टी कप नेपालले आयोजना गरेको थियो । किर्तिपुरस्थित टियु मैदानमा टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १ सय ६३ बनायो । नेपालका पारस खड्काले सर्वाधिक ८७ रन बनाए ।

जवाफी ब्याटिङमा आएको मलेसियाले पुरै ओभर खेल्दै ९ विकेट गुमाएर १ सय ४४ रन मात्र बनायो । र, नेपाल १९ रनले विजयी भएको थियो ।

अन्तिम टी-ट्वान्टी सन् २०१८ को विश्व टी–ट्वान्टी एसिया क्षेत्रिय छनोटमा प्रतिस्पर्धा भएको थियो । जुन खेलमा नेपालले ८ विकेटको जित निकालेको थियो ।

मलेसियाकै क्वालालम्पुरमा टस जितेर पहिले ब्याटिङ गरेको मलेसिया १९ ओभर ३ बलमा १०० रनमा समेटियो । नेपालका सन्दीप लामिछानेले ५ विकेट तथा सोमपाल कामीले ३ विकेट हात पारे ।

१०१ रनको लक्ष्य पछ्याएको नेपालले १२ ओभर ४ बलमा २ विकेट गुमाउँदै लक्ष्य पूरा गर्यो । नेपालका पारस खड्काले ५२ रनको अर्धशतकीय इनिङ्स खेलेका थिए ।

सन् २०१९ को आईसीसी टी–ट्वान्टी विश्वकप एसिया फाइनलको तयारी गर्न नेपाली राष्ट्रिय क्रिकेट टोलीले मलेसिया भ्रमण गर्यो । दुई खेलको मैत्रीपूर्ण सिरिजमा नेपालले सहज जित निकाल्यो । पहिलो खेलमा ७ विकेटले मलेसियालाई पराजित गरेको नेपालले दोस्रो खेलमा ६ रनको जित निकाल्यो ।

पहिलो खेलमा १ सय २९ रनको लक्ष्य नेपालको लागि पारस खड्काले अविजित रहदै ८६ रनको अर्धशतकीय इनिङ्स खेले ।

दोस्रो खेलमा पहिले ब्याटिङ गरेको नेपालले बिनोद भण्डारीको अर्धशतकमा १ सय ७३ रन बनाउन सफल भयो । मलेसियाविरुद्ध नेपालले बनाएको यस रन सर्वाधिक स्कोर हो । जवाफी लक्ष्य पछ्याएको मलेसियाले १ सय ६७ रन मात्र बनायो र, नेपालले सिरिज २–० ले कब्जा गर्यो ।

लगत्तै सिंगापुरमा भएको आईसीसी टी-ट्वान्टी विश्वकप एसिया रिजनल फाइनल प्रतियोगितामा भेट भयो । ९ ओभरमा छोट्टाईएको खेलमा ८४ रनको लक्ष्य पछ्याएको नेपालले ८ ओभरमा ३ विकेट गुमाएर लक्ष्य पूरा गर्यो । खेलमा ज्ञानेन्द्र मल्लले ५१ रनको अर्धशतकीय इनिङ्स खेले ।

अन्तिम पटक नेपाल र मलेसियाबीच सन् २०२० मा एसीसी इस्टर्न रिजन टी-ट्वान्टीमा प्रतिस्पर्धा भएको थियो । उक्त खेलमा भने नेपाल पराजित भएको थियो । १ सय ५५ रनको लक्ष्य पछ्याउने क्रममा नेपाल १ सय ३२ रनमा अलआउट भएको थियो ।  

नेपालविरुद्ध मलेसिया - म्याच फ्याक्ट

सर्वाधिक रन बनाउने नेपाली खेलाडी : पारस खड्का (४ इनिङमा १७० रन)

एक इनिङमा सर्वाधिक रन बनाउने नेपाली खेलाडी : पारस खड्का (अविजित ८६ रन)

सर्वाधिक स्ट्राइक रेट : आरिफ सेख (१६६.६७)

सर्वाधीक विकेट लिने नेपाली खेलाडी : सन्दीप लामिछाने (७ इनिङमा १३ विकेट)

बेस्ट बलिङ फिगर : कारण केसी (२० रन खर्चेर ५ विकेट)