आजमको शतकमा पाकिस्तानको सानदार जित

एजेन्सी । पाहुना टिम पाकिस्तानले तेस्रो टी-ट्वान्टी क्रिकेटमा घरेलु टोलि दक्षिण अफ्रीकालाई पराजित गरेको छ ।

सेन्चुरियनमा बुधबार भएको खेलमा पाकिस्तानले दक्षिण अफ्रीकालाई ९ विकेटले पराजित गरेको हो ।

दक्षिण अफ्रीकाले दिएको २ सय ४ रनको लक्ष्य पाकिस्तानले १८ ओभरमा मात्र १ विकेट गुमाएर पूरा गर्यो ।

पाकिस्तानको जितमा कप्तान बाबर आजमले १ सय २२ रनको शतकीय इनिङ्स खेले । उनले ५९ बलमा १४ चौका र ४ छक्का प्रहार गरे ।

यस्तै मोहमद रिजवानले अविजित रहदै ७३ रनको अर्धशतकीय इनिङ्स खेले । फकर जमान ८ रनमा अविजित रहे ।

दक्षिण अफ्रीकाका लिजाड विलियम्सले १ विकेट लिए ।

यस अघि पहिले ब्याटिङ गरेको दक्षिण अफ्रीकाले २० ओभरमा ५ विकेट गुमाएर २ सय ३ रन बनाएको थियो ।

दक्षिण अफ्रीकाका एडिन मार्क्रमले ६३ रनको अर्धशतकीय इनिङ्स खेले ।

यस्तै जानेमान मालनले ५५ रनको अर्धशतकीय इनिङ्स खेल्दा रस्सी भान डेर डुसेनले अविजित रहदै ३४ रन बनाए । जर्ज लिन्देले २२ रन जोडे ।

पाकिस्तानका मोहमद नवाजले दुई विकेट लिए ।

यस जितसँगै पाकिस्तानले ४ खेलको सिरिजमा २-१ को आग्रता बनाएको छ ।