काठमाडौं । नेपालको त्रिभुवन आर्मी फुटबल क्लब एएफसी कप-२०२१ प्ले अफको दोस्रो चरणमा प्रवेश गरेको छ ।
त्रिपुरेश्वरस्थित दशरथ रंगशालामा बुधबार भएको खेलमा श्रीलंका पुलिस स्पोर्ट्स क्लबलाई ५-१ गोल अन्तरले पराजित गर्दै आर्मीले दोस्रो चरणको यात्रा तय गरेको हो ।
आर्मीलाई पुनरागमन जित दिलाउन नवयुग श्रेष्ठले २ गोल गरे । यस्तै सन्तोष तामाङ, टंक बहादुर बस्नेत, सुदिल राईले एक एक गोल गरे । श्रीलंका पुलिसका इभान्सले एक गोल फर्काए ।
श्रीलंका पुलिसविरुद्ध त्रिभुवन आर्मी सुरुवातबाटै आक्रामक रुपमा प्रस्तुत भएको थियो ।
खेलको १० औं मिनेटमा आर्मीका सन्तोष तामाङको डिबक्स बाहिरबाटको सशक्त प्रहार श्रीलंका पुलिसका गोलकिपर दिनेश महिन्दरणले बचाए ।
खेलको १२ औं मिनेटमा भरत खवासले गोलकिपर दिनेशलाई बिट गर्दै प्रहार गरेको बल श्रीलंका पुलिसका ए निकोलसले गोललाइनबाट बचाए ।
लगत्तै १३ औं मिनेटमा भरतको उत्कृष्ट हेडर श्रीलंका पुलिसका गोलकिपरले पन्च गर्दै बाहिर फाल्दा आर्मी अग्रता बनाउन चुकेको थियो ।
खेलको २१ औं मिनेटमा श्रीलंका पुलिसका इभान्सको प्रहार आर्मीका गोलकिपर विश्वास चौधरीले सहजै रोके ।
तर, खेलको २८ औं मिनेटमा इभान्सले गोल गर्दै श्रीलंका पुलिसलाई सुरुवाती अग्रता दिलाए ।
खेलको ३९ औं मिनेटमा टंक बहादुर बस्नेतको क्रसमा भरतको हेडरले पोस्टको दिशा लिन सकेन ।
४१ औं मिनेटमा आर्मीले खेल १-१ को बराबरीमा ल्यायो । सन्तोषले डिबक्स बाहिरबाट उत्कृष्ट हाफ भली गोल गरेका थिए ।
खेलको ४३ औं मिनेटमा नवयुगले गोल गर्दै आर्मीलाई पहिलो हाफमा २-१ को अग्रता दिलाए । उनले भरतको क्रसमा हेडमार्फत गोल गरे ।
दोस्रो हाफमा पनि आर्मीले श्रीलंका पुलिसविरुद्ध लगातार आक्रमण गर्यो ।
खेलको ५० औं मिनेटमा टंकले गोल गर्दै आर्मीलाई ३-१ को अग्रता दिलाए । श्रीलंका पुलिसका गोलकिपरले पन्च गर्दा आएको बलमा उनले गोल गरेका हुन् ।
खेलको ७१ औं मिनेटमा श्रीलंका पुलिसका इभान्सको कडा प्रहार क्रस बारमा लागेर फर्किएको थियो ।
खेलको ८३ औं मिनेटमा सब्सिच्युड खेलाडी सुदिलले गोल गर्दै आर्मीलाई ४-१ को अग्रता दिलाए । उनी ६३ औं मिनेटमा टंकको स्थानमा मैदान प्रवेश गरेका थिए ।
त्यसपछि खेलको इन्जुरी समयमा नवयुगले व्यक्तिगत दोस्रो गोल गर्दै आर्मीलाई ५-१ को जित दिलाए । श्रीलंका पुलिसका डिफेन्डरको ब्याक पासमा नवयुगले बल खोस्दै गोल गरेका हुन् ।
अब आर्मीले दोस्रो चरणमा भारतको बेंगलुरु फुटबल क्लबसँग खेल्नेछ । उक्त खेल बैशाख १ मा हुनेछ ।
भारतको बेंगलुरुलाई पराजित गरेको खण्डमा आर्मीले अप्रिल २१ मा हुने प्ले अफको फाइनल खेल खेल्नेछ ।
यस प्ले अफको विजेताले समूह चरणको समूह 'डी' स्थान बनाउने छन् । समूह 'डी' मा भारतको मोहुन बगान, बंगलादेशको बसुन्धरा किंग्स र माल्दिभ्सको माजिया एण्ड रिक्रिएसन रहेका छन् । यस समूहका समूह चरणका खेलहरु मे १४ बाट सुरु हुनेछ ।
एएफसीको क्लब लाईसेन्स प्राप्त गरेपछि आर्मीले पहिलो पटक एएफसीको प्रतियोगिता खेलेको हो ।
सहिद स्मारक 'ए' डिभिजन लिगमा उपविजेता बनेपनि च्याम्पियन मछिन्द्रको लाईसेन्स नहुँदा आर्मीले प्ले अफको मौका पाएको हो ।
