काठमाडौं । एएफसी कप-२०२१ प्ले अफमा नेपालको त्रिभुवन आर्मी फुटबल क्लबले भोलि (बुधबार) श्रीलंका पुलिस स्पोर्ट्स क्लबसँग प्रतिस्पर्धा गर्दैछ ।
त्रिपुरेश्वरस्थित दशरथ रंगशालामा आर्मीले श्रीलंका पुलिस टिमसँग खेल्नेछ । खेल साँझ ५:३० बजे सुरु हुनेछ ।
घरेलु मैदानमा आर्मी जित निकाल्दै प्ले अफको दोस्रो चरणमा पुग्ने योजनामा रहेको छ ।
आर्मीका मुख्य प्रशिक्षक नविन न्यौपाने पाहुना टिमलाई हराएर अर्को चरणमा पुग्ने योजनामा रहेको बताउँछन् ।
'हामी जितका लागि खेल्छौं । हाम्रो टिम सेट राम्रो छ । हामी आधुनिक फुटबल पस्केर दर्शकलाई खुसी बनाउने छौँ,' श्रीलंका पुलिससँगको खेल अघि प्रि म्याच कन्फरेन्समा प्रशिक्षक न्यौपानेले भने, 'यो पहिलो चरण हो । हामी पहिलो चरण पार गर्न चाहन्छौं । त्यसपछि अन्य खेलको योजना बनाउने छौँ ।'
पहिलो खेलमा श्रीलंकाको पुलिसलाई हराएमा आर्मीले दोस्रो खेलमा भारतको बेंगलुरु फुटबल क्लबसँग खेल्नेछ । उक्त खेल अप्रिल १४ मा हुनेछ ।
भारतको बेंगलुरुलाई पराजित गरेको खण्डमा आर्मीले अप्रिल २१ मा हुने प्ले अफको फाइनल खेल खेल्नेछ ।
यस प्ले अफको विजेताले समूह चरणको समूह 'डी' स्थान बनाउने छन् ।
समूह 'डी' मा भारतको मोहुन बगान, बंगलादेशको बसुन्धरा किंग्स र माल्दिभ्सको माजिया एण्ड रिक्रिएसन रहेका छन् । यस समूहका समूह चरणका खेलहरु मे १४ बाट सुरु हुनेछ ।
एएफसीको क्लब लाईसेन्स प्राप्त गरेपछि आर्मीले पहिलो पटक एएफसीको प्रतियोगिता खेल लागेको हो ।
सहिद स्मारक 'ए' डिभिजन लिगमा उपविजेता बनेपनि च्याम्पियन मछिन्द्रको लाईसेन्स नहुँदा आर्मीले प्ले अफको मौका पाएको हो ।
प्रशिक्षक न्यौपानेले क्लब लाईसेन्स पाएपछि लगातार तयारी गरेको कारण नतिजा निस्कनेमा आशावादी रहेको बताए ।
'हामीले क्लब लाइसेन्स पाएको दिनबाट तयारी सुरु गरेका थियौं । बीचमा हामीले तयारी स्वरुप एक खेल खेल्न पनि पायौं । त्यसैले श्रीलंकन टोलिसँगको खेलमा नतिजा हाम्रोमा आउँछ भन्ने आशा छ,' उनले भने ।
प्रशिक्षक न्यौपानेले टिममा केहि खेलाडी चोटग्रस्त भएको समेत बताए । उनले सुमन अर्याल र टेक बहादुर बस्नेतले चोट बोकेको बताए ।
यस्तै आर्मीका कप्तान भरत खवासले यस खेलमा टिमले महत्वपूर्ण अवसरको रुपमा लिएको बताए ।
'हाम्रो तयारी राम्रो छ । हामी सधै यहि टिम खेल्ने हो । बिचमा कोरोनाले प्रशिक्षण गर्न नपाएपनी तयारी राम्रो छ,' भरतले भने, 'यो हाम्रा लागि अवसर र चुनौती पनि हो । हामिले यसलाई अवसरका रुपमा लिएका छौँ ।'
भरतले श्रीलंका पुलिससँगको खेलबाट आफुलाई प्रमाणित गर्ने दाबी गरे ।
'थ्री नेसन्स लिगमा बेन्चमा बसे । म त्यो देखाउन चाहन्छु कि म पुरानै लयमा छु । अझै राम्रो खेल्न सक्छु भनेर । हामी शारीरिक रुपमा पनि सबल छौँ जस्तो लाग्छ,' उनले भने ।
श्रीलंका पुलिसका प्रशिक्षक झिलाउ अल्पेन्सुले छोटो तयारी भएपनि टिम राम्रो रहेको बताए ।
टिममा राष्ट्रिय टिमका खेलाडी नभएपनि विदेशी खेलाडी राम्रो भएको उनले बताए ।
'कोभिडका कारण लामो समय प्रशिक्षण गर्न पाएनौं । पछिल्लो दुई महिना तयारी गरेका छौँ,' उनले भने, 'यो क्लब खेल हो । टोलीमा राष्ट्रिय टिमका खेलाडी छैनन् । हामीसँग ३ विदेशी खेलाडी छन् । त्यसैले नतिजा राम्रो आउछ भन्ने आशा छ ।'
श्रीलंका पुलिसका कप्तान चामिक कुमाराले नेपालमा खेल्न पाउँदा खुसी लागेको बताए ।
'हामीले तयारी गर्ने छोटो अवसर पाएपनि खेल खेल्न पाएका छौँ । त्यसैमा खुसी छौँ । अझ नेपालमा खेल्न पाउँदा खुसी छौ,' उनले भने ।
