एमबाप्पे चम्किदा पीएसजी शीर्ष स्थानमा
एजेन्सी । साविक विजेता पेरिस सेन्ट जर्मेन (पीएसजी) ले फ्रेन्च लिग वान फुटबलमा सहज जित निकालेको छ ।
आइतबार राति भएको खेलमा पीएसजीले लियोनलाई ४-२ गोल अन्तरले पराजित गरेको हो ।
केलियन एमबाप्पेले दुई गोल गरेपछि पीएसजीले सहज जित निकालेको हो ।
लियोनको मैदानमा १५ औं मिनेटमा एमबाप्पेले गोल गर्दै टिमलाई अग्रता दिलाएका थिए ।
खेलको ३२ औं मिनेटमा डानिलो पेरिएराले गोल गर्दै टोलीलाई २-० को अग्रता दिलाए ।
४७ औं मिनेटमा एन्जल डी मारियाले गोल गर्दा पीएसजी ३-० ले अघि रह्यो ।
खेलको ५२ औं मिनेटमा एमबाप्पेले व्यक्तिगत दोस्रो गोल गरेपछि पीएसजी ४-० ले अघि रह्यो ।
खेलको ६२ औं मिनेटमा इस्लाम स्लिमानीले गोल गर्दै लियोनलाई ४-१ को स्थितिमा ल्याए ।
त्यसपछि खेलको ८१ औं मिनेटमा लियोनका म्याक्स्वेल कोर्नेटले गोल गरेपनि पीएसजी ४-२ ले विजयी भयो ।
लियोनविरुद्ध दुई गोल गरेसँगै २२ वर्षीय एमबाप्पे फ्रेन्च लिग वन फुटबलमा १०० गोलको कोशेढुंगा पूरा गर्ने सर्वाधिक युवा खेलाडी चुनिए ।
यस जितपछि पीएसजी लिगको शीर्ष स्थानमा समेत उक्लिएको छ ।
पीएसजीले ३० खेलमा ६३ अंक जोडेको छ ।
लियोन ६० अंकसहित तेस्रो स्थानमा रहेको छ ।
