अष्ट्रेलियाको जितमा फिन्चको अर्धशतक

एजेन्सी । घरेलु टिम न्युजिल्याण्डविरुद्धको चौंथो टी-ट्वान्टी क्रिकेटमा अष्ट्रेलियाले जित निकालेको छ ।

विलिङटनमा शुक्रबार भएको चौंथो टी-ट्वान्टीमा अष्ट्रेलियाले न्युजिल्याण्डलाई ५० रनले हराएको हो ।

अष्ट्रेलियाले दिएको १ सय ५७ रनको लक्ष्यसहित जवाफी ब्याटिङ गरेको न्युजिल्याण्डले १८ ओभर ५ बलमा अलआउट हुँदै १ सय ६ रन मात्र बनाउन सक्यो ।

न्युजिल्याण्डका लागि केली जेमिसनले सर्वाधिक ३० रन बनाए ।

यस्तै टिम सेइफार्टले १९ रन जोड्दा डेभोन कोनवेले १७ रन बनाए ।

न्युजिल्याण्डलाई सस्तैमा समेट्न अष्ट्रेलियाका केन रिचार्डसनले ३ विकेट लिए ।

एस्टन अगर, एडम जाम्पा र ग्लेन म्याक्सवेलले २/२ विकेट लिए ।

यस अघि पहिले ब्याटिङ गरेको अष्ट्रेलियाले २० ओभरमा ६ विकेट गुमाएर १ सय ५६ रन बनाएको थियो ।

अष्ट्रेलियाका लागि कप्तान आरोन फिन्चले अविजित रहदै ७९ रनको अर्धशतकीय इनिङ्स खेले ।

यस्तै मार्कुस स्टोनिसले १९ रन जोड्दा ग्लेन म्याक्स्वेलले १७ रन बनाए ।

म्याथ्यु वेडले १४ र जोस फिलिपले १३ रन जोडे ।

न्युजिल्याण्डका इश सोधीले ३ विकेट लिए । ट्रेण्ड बोल्टले २ विकेट लिए ।

यस जितसंगै अष्ट्रेलियाले घरेलु टिमविरुद्धसँगको पाँच खेलको सिरिजमा २-२ को बराबरी गरेको छ ।