मिलानमा हिगुईनको पहिलो गोल

एजेन्सी । इटालियन सिरी-ए फुटबलमा एसी मिलान बराबरीमा रोकिएको छ । आइतबार राति भएको खेलमा एसी मिलान काग्लियारीसंग १ - १ गोलको बराबरीमा रोकिएको हो ।

काग्लियारीको घरेलु मैदानमा एक गोलले पछि परेको स्थिति उल्टाएर मिलानले बराबरी खेलेको हो । मिलानलाई हारबाट जोगाउने काम यसै सिजन क्लब आएका गोन्जालो हिगुईनले गरे ।

पहिलो हाफको चौथो मिनेटमै जोया पेड्रोले गोल गर्दै काग्लियारीलाई सुरुवाती अग्रता दिलाएका थिए । तर, दोस्रो हाफमा मिलानका हिगुईन दृश्यमा आए । खेलको ५५ औं मिनेटमा हिगुईनले गोल गर्दै मिलानलाई हारबाट जोगाए ।

मिलानको लागि हिगुईनको यो पहिलो गोल समेत हो । हिगुईन यसै सिजन युभेन्ट्सबाट मिलान आएका थिए ।

यो बराबरीपछि मिलानले ३ खेलबाट ४ अंक जोडेको छ । काग्लियारीको ४ खेलबाट ५ अंक छ ।