वेस्टर्न डिभिजन 'ए' मा प्रवेश

बुटवल । नेपाल टेलिकम रुपन्देही सुपर लिग क्रिकेट अन्तर्गतको 'बी' डिभिजनमा वेस्टर्न क्रिकेट क्लबले लगातार दोस्रो जित निकालेको छ ।

भैरहवाको सिदार्थ रंगशालामा आइतबार गोलपार्क क्रिकेट क्लबलाई ४९ रनले हराएर वेस्टर्नले लगातार दोस्रो जित निकालेको हो ।

पहिले ब्याटिङ गरेको वेस्टर्नले ४४ ओभरमा ९ विकेट गुमाएर १ सय ६१ रन बनाएको थियो ।

उसका लागि अनिल खरेलले अविजित २७ रन जोड्दा देव खनालले २४ तथा भुवन पाण्डेले २२ रन बनाए ।

गोलपार्कका हेमन्त ओलीले ३ विकेट लिए ।

वेस्टर्नले दिएको लक्ष्यसहित जवाफी ब्याटिङ गरेको गोलपार्कले अलआउट हुँदै १ सय १२ रन मात्र बनाउन सक्यो ।

गोलपार्कका रिकी पुनले ३२ रन बनाए ।

वेस्टर्नका कृष्ण कार्कीले ४ विकेट लिए । अनिल खरेलले ३ विकेट लिए ।

यस जितसँगै वेस्टर्न डिभिजन ‘ए’ मा प्रवेश गरेको छ ।

यस्तै डिभिजन ‘ए’ मा प्रवेश गर्ने चार टिमको समेत टुंगो लागेको छ ।

डिभिजन ‘ए’ मा बढुवा हुने अन्य क्लबमा तिलोत्तमा क्रिकेट क्लब, सैनामैना क्रिकेट क्लब र बुटवल राइनोज रहेका छन् ।