युनाईटेडद्वारा साउथह्याम्पटनको पोस्टमा ९ गोल !

एजेन्सी । इंग्लिस प्रिमियर लिग फुटबलमा म्यानचेस्टर युनाईटेडले फराकिलो जित निकालेको छ ।

मंगलबार राति भएको खेलमा युनाईटेडले साउथह्याम्पटनलाई ९-० गोल अन्तरले पराजित गरेको हो ।

घरेलु मैदानमा ९ खेलाडीमा समेटिएको साउथह्याम्पटनविरुद्ध युनाईटेडले फराकिलो जित निकालेको हो ।

ओल्ड ट्राफोर्डमा खेलको दोस्रो मिनेटमा एलेक्सजेन्ड्रा जान्केविट्जले रातो कार्ड पाएपछि साउथह्याम्पटन १० खेलाडीमा समेटिएको थियो ।

खेलको १८ औं मिनेटमा आरोन वान वासिकाले गोल गर्दै युनाईटेडलाई अग्रता दिलाएका थिए ।

खेलको २५ औं मिनेटमा मार्कुस राषफोर्डले गोल गर्दै युनाईटेडको अग्रता २-० को बनाए ।

३४ औं मिनेटमा जान बेडनाराकले आत्मघाती गोल गर्दा युनाईटेड अग्रता तेब्बर बन्यो ।

खेलको ३९ औं मिनेटमा एडिन्सन काभानीले गोल गर्दा युनाईटेडले पहिलो हाफमा ४-० को अग्रता बनायो ।

दोस्रो हाफमा युनाईटेडले थप पाँच गोल गर्यो ।

खेलको ६९ औं मिनेटमा एन्थोनी मार्सियलले ग्ल गर्दै टोलीको अग्रता ५-० को बनाए ।

७१ औं मिनेटमा स्कट म्याकटोमिनेले गोल गर्दै युनाईटेडलाई ६-० को अग्रता दिलाए ।

खेलको ८६ औं मिनेटमा जानले रातो कार्ड पाएपछि साउथह्याम्पटन ९ खेलाडीमा समेटियो ।

खेलको ८७ औं मिनेटमा ब्रुनो फर्नान्डेसले पेनाल्टीमा गोल गर्दै टोलीको अग्रता ७-० को बनाए ।

९० औं मिनेटमा मार्सियलले व्यक्तिगत दोस्रो गोल गर्दा युनाईटेड ८-० ले अघि रह्यो ।

त्यसपछि खेलको इन्जुरी समयमा डानियल जेम्सले गोल गर्दा युनाईटेडले ९-० को फराकिलो जित निकाल्यो ।

प्रिमियर लिगको इतिहासमा युनाईटेडले दोस्रो पटक ९-० को जित निकालेको हो ।

यस अघि सन् १९९५ मा इप्सविचविरुद्ध युनाईटेडले ९-० को जित निकालेको थियो ।

यस्तै साउथह्याम्पटनले दोस्रो पटक ९-० को हार व्यहोरेको हो ।

गत सिजन साउथह्याम्पटन लेष्टरसँग ९-० ले पराजित भएको थियो ।

जितसंगै युनाईटेडले लिगमा शीर्ष स्थानको टिम म्यानचेस्टर सिटीसँग अंक बराबरी गरेको छ ।

दोस्रो स्थानको युनाईटेडले २२ खेलमा ४४ अंक जोडेको छ ।

साउथह्याम्पटन २९ अंक जोडेर १२ औं स्थानमा रहेको छ ।