काठमाडौं । त्रिभुवन आर्मी क्लबका कप्तान बिनोद भण्डारीले खेलहरु निरन्तर आयोजना भएको खण्डमा नयाँ खेलाडी देखिने बताएका छन् ।
आर्मीलाई प्रधानमन्त्री कप राष्ट्रिय पुरुष क्रिकेट प्रतियोगिताकाे उपाधि जिताएका भण्डारीले खेलहरु आयोजना हुदाँ नयाँ खेलाडी देखिने उल्लेख गरे ।
‘खेल हुनु भनेको खेलाडी आउनु हो ।’ भण्डारीले सञ्चारकर्मीसंग भने, ‘काठमाडौंमा देखिदैन । तर हरेक क्रिकेट खेलाडीले आफ्नो ठाउँमा मेहनत गरिरहेको छ । खेल नहुँदा कता देखाउने भन्ने हुन्छ । खेल हुदाँ मौका पाउने हो । अहिले त्यही भएको हो ।’
उनले नयाँ खेलाडीको आगमनले पुराना खेलाडीलाई समेत दुख गर्न प्रेरित गर्ने बताए ।
‘नयाँ खेलाडी आउँदा पुराना खेलाडीलाई पनि गर्न पर्छ भन्ने मानसिकता बन्छ ।’ उनले भने ।
विभागीय टिम एपीएफलाई हराउँदै आर्मीले शनिबार प्रधानमन्त्री कपको उपाधि जितेको छ ।
उनले एपीएफको तुलनामा कम गल्ती गरेका कारण आर्मीको उपाधि सम्भव भएको बताए ।
‘दुवैले नराम्रो खेलेको हो । कसले कम गल्ती गर्ने भन्ने थियो । जसले बढी गल्ती गर्यो, उसले हार्यो । दुवैले राम्रो खेलेको हैन ।’ उनले भने ।
उनले आसिफ शेखको विकेटलाई खेलको टर्निङ प्वाइन्टको रुपमा ब्याख्या गरे ।
आसिफ ६१ रन बनाएर आउट एका थिए । उनी जितेन्द्र मुखियाको बलमा रोहित पौडेलको हातबाट क्याच आउट भएका थिए ।
‘आसिफले निरन्तर रन बनाईरहेका थिए । उनको विकेट जाने बित्तिकै एपीएफ दबाब आईसकेको थियो ।’ उनले भने ।
उनले समग्र टिमको प्रर्दशनमा आर्मीको उपाधि यात्रा सम्भव भएको बताए । कुनै एकमा निर्भर नभएर आर्मीले टिमको रुपमा प्रर्दशन गरेको उनको भनाई थियो ।
‘यसअघि विधागततर्फ आर्मीका खेलाडीको वर्चस्व रहन्थ्यो । तर यसपटक टिमले काम गरेको छ । कुनैमा कसले खेलेको छ, अर्कोमा कसैले । टिम कसैको भरमा परेको छैन । त्यसले गर्दा सजिलो भएको हो ।’ उनले भने ।
उनले मुख्य तीन खेलाडी नहुदाँ टिमलाई मनोबैज्ञानिक दबाब पारेको बताए ।
आर्मीका सोमपाल कामी, करण केसी र कुशल मल्ल टी–१० फ्रेन्चाईज खेल्न देश बाहिर छन् ।
‘तीन जना नहुदाँ खेल कुनैपनि बेला फस्छ कि भन्ने डर थियो ।’ उनले भने, ‘तीन जना भएको भए धेरै सोच्नपर्थेन । ढुक्कसंग खेल्थ्यौं ।’
-1751975074.jpeg)
