काठमाडौं । प्रधानमन्त्री कप (पीएम कप) एकदिवसीय पुरुष क्रिकेट प्रतियोगिताको फाइनलमा शनिबार दुई विभागीय टिम एपीएफ क्लब र त्रिभुवन आर्मी क्लब भिड्दै छन् ।
टियु क्रिकेट मैदानमा हुने विभागीय डर्बी भिडन्त बिहान ९ बजे सुरु हुनेछ ।
चौंथो संस्करणको फाइनलमा मैदान उत्रदा एपीएफ र आर्मी उपाधि आफ्नो बनाउने लक्ष्यमा हुनेछ ।
एपीएफका कप्तान शरद भेषवाकर र आर्मीका कप्तान विनोद भण्डारी दुबै उपाधि जित्नेमा आशावादी छन् ।
फाइनल अघि शुक्रबार आयोजित प्रि-म्याच कन्फरेन्समा दुबै टिमका कप्तानले उपाधिका लागि खेल्ने बताए ।
'फाइनल पुग्नु खुसीको कुरा हो । फाइनल बाँकी छ । आशा छ भोलि राम्रो हुनेछ,' एपीएफका कप्तान शरदले भने, 'टिमले राम्रो खेलिरहेको छ । चुनौतिपूर्ण अवस्थामा पनि राम्रो भएको छ ।'
एपीएफ अपराजित रहदै फाइनल पुगेको हो ।
पहिलो खेलमा एपीएफले प्रदेश-१ लाई १ सय ३५ रनले हराएको थियो । यस्तै दोस्रो खेलमा गण्डकी प्रदेशलाई ६ विकेटले हराएको एपीएफले तेस्रो खेलमा कर्णाली प्रदेशलाई ७१ रनले हराएको थियो ।
समूह चरणको अन्तिम खेलमा आर्मीलाई ६ रनले हराएर एपीएफ समूह विजेता बनेको थियो । सेमिफाइनलमा एपीएफले नेपाल पुलिस क्लबलाई ३० रनले हराएको थियो ।
अपराजित यात्राले उत्साहित शरद आर्मीविरुद्धको फाइनलमा उत्कृष्ट टिम उतार्ने बताउछन् ।
'भुवन कार्की फिट छन् । बसन्त रेग्मीको भन्न सकिने अवस्था छैन । आर्मीसँग उत्कृष्ट प्लेईङ सेट हुन्छ,' शरदले थपे ।
शरदले फाइनलमा आफ्नो व्यक्तिगत प्रदर्शनमा समेत सुधार गर्ने बताए ।
'राम्रो गर्ने भोको छ । आशा छ भोलि टिमका लागि उत्कृष्ट दिनेछु,' शरदले भने ।
समूह चरणमा आर्मी एपीएफसँग ६ रनले पराजित भएपनि अन्य खेलमा विजयी भएको थियो ।
आर्मीले पहिलो खेलमा गण्डकी प्रदेशलाई ९८ रनले हराएको थियो । यस्तै कर्णालीविरुद्ध ८० रनको जित निकालेको आर्मीले प्रदेश १ विरुद्ध ४ विकेटको जित निकालेको थियो ।
आर्मीले सेमिफाइनलमा बागमती प्रदेशलाई ९४ रनले हराएर एपीएफसँगको भेट पक्का गरेको हो ।
आर्मी फाइनलमा भने एपीएफसँग अघिल्लो भेटमा व्यहोरेको हारको बदला लिन चाहन्छ ।
'टिमले राम्रो गरिरहेको छ । चाहिएको समयमा खेलाडीले खेलेका छन् । हामी जित्नका लागि खेल्छौ,' फाइनल अघि आर्मीका कप्तान विनोदले भने ।
पीएम कप क्रिकेटको इतिहासमा आर्मी लगातार फाइनल खेल्ने एक्लो टिम हो । तर, पहिलो संस्करणमा पुलिससँग उपाधि बाडेको आर्मी फाइनलमा चुक्दै आएको छ ।
यसपटक भने आर्मी गल्ति दोहोर्याउने पक्षमा छैन । एपीएफविरुद्ध आर्मी सहज भने हुनेछ ।
'इतिहास हो तर त्यसलाई सोचेर केहि फरक पर्दैन । ३ खेलाडी नहुदा समस्या भएको जस्तो देखिएको हो । हाम्रो टिम सन्तुलित छ,' विनोदले भने, 'एपीएफ पनि सन्तुलित टिम हो ।'
आर्मीका तीन खेलाडी करण केसी, सोमपाल कामी र कुशल मल्ल यस पटक टिममा छैनन् । उनीहरु टी-१० लिगका लागि युएईमा रहेका छन् ।
प्रतियोगिताको विजेताले १० लाख र उपविजेताले ५ लाख पाउने छन् ।
यस्तै प्लेयर अफ दि सिरिजले ५० हजार प्राप्त गर्नेछ ।
उत्कृष्ट ब्याट्सम्यान र बलरले समान २५-२५ हजार पाउने छन् ।
-1751975074.jpeg)
