करण आबद्द पुनेको विजयी सुरुवात

काठमाडौं । युएईमा जारी आबुधाबी टी-१० लिगमा पुने डेभिल्सले विजयी सुरुवात गरेको छ ।

नेपाली राष्ट्रिय क्रिकेट टोलीका अलराउण्डर करण केसी आबद्द पुनेले पहिलो खेलमा डेकन ग्ल्याडियटर्सलाई ७ विकेटले हराएको हो ।

डेकनले दिएको १ सय ५ रनको लक्ष्य पुनेले ९ ओभर २ बलमा मात्र ३ विकेट गुमाएर पुरा गर्यो ।

पुनेको जितमा केन्नर लेविसले ५७ रनको अर्धशतकीय इनिङ्स खेले ।

चाडविक वाल्टनले १८ रन जोड्दा टम काडमोरले १२ रन बनाए ।

यस अघि टस हारेर पहिले ब्याटिङ गरेको डेकनले १० ओभरमा ५ विकेट गुमाएर १ सय ४ रन बनाएको थियो ।

डेकनको लागि आजम खानले अविजित ३७ रन जोडे । क्यामरोन डेलपोर्टले २५ रन जोड्दा प्रसान्त गुप्ताले १७ रन बनाए ।

पुनेका नासिर होसेनले ३ तथा मुनिस अन्सारीले २ विकेट लिए ।

डेकेनविरुद्ध खेल्दै नेपाली राष्ट्रिय क्रिकेट टोलीका अलराउण्डर करण केसीले टी-१० लिगमा डेब्यु गरे ।

उनले १ ओभर बलिङ गर्दै १७ रन खर्चिएर विकेट लिन सकेनन् ।