अच्युत र करिशा च्याम्पियन

काठमाडौं । क्रस दुवाथलन सिरिज च्याम्पियनसिप अन्तर्गतको दोस्रो संस्करणको उपाधि अच्युत कृष्ण खरेल र करिशा महर्जनले जितेका छन् ।

कीर्तिपुरको जाखामा शनिबार भएको च्याम्पियनसिपमा ३७ मिनेट २७ सेकेन्डको समय निकाल्दै पुरुषतर्फ खरेल च्याम्पियन बनेका हुन् ।

उनले जिम्बु थकालीको तर्फबाट प्रदान गरिएको २ हजार बराबरको भौचर र प्याङ्क बाईकको तर्फबाट २ हजार बराबरको फ्रि सर्भिसिङ्ग भौचर प्राप्त गरे ।

च्याम्पियनसिपको महिलातर्फ करिशाले १ घण्टा ८ मिनेट ३० सेकेन्डको समय निकालिन । उनले काठमाडौं गेष्ट हाउसको तर्फबाट २ हजार बराबरको भौचर र प्याङ्क बाईकको तर्फबाट २ हजार बराबरको फ्रि सर्भिसिङ्ग प्राप्त गरिन् ।

पुरुषतर्फ ४५ मिनेट १२ सेकेन्डका साथ आर्यन राई दोस्रो र ४५ मिनेट २१ सेकेन्डका साथ सुशिम चित्रकार तेस्रो भए । दोस्रो हुने खेलाडीले क्याफेसिनोको तर्फबाट ५ सय बराबरको भौचर र प्याङ्क बाईकको १५ सय बराबरको साईकल मर्मत भौचर तथा तेस्रो हुने खेलाडीले प्यान बाईकको तर्फबाट १ हजार बराबरको साईकल मर्मतको भौचर प्राप्त गरे ।

नेपाल ट्राईयाथलन संघ र जम्प नेशनको संयुक्त आयोजनामा भएको च्याम्पियनसिपका विजयी खेलाडीहरुलाई कीर्तिपुर नगरपालिकाका मेयर रमेश कुमार महर्जन, किर्तिपुरका डिएसपी रुकेश तण्डुकार, वडा नं. ६ का अध्यक्ष, संघका अध्यक्ष एवं नेपाल ओलम्पिक कमिटिका महासचिव निलेन्द्र राज श्रेष्ठले पुरस्कार वितरण गरेका थिए ।

सिरिजको पहिलो संस्करण काठमाडौंको टोखामा सम्पन्न भईसकेको छ ।

प्रत्येक दुई हप्तामा हुने सिरिजको तेस्रो संस्करण ललितपुरको चापागाउँमा आयोजना हुनेछ । यसैगरि चौथो संस्करण टोखा, पाँचौ किर्तिपुरमा हुनेछ ।

तीन महिनासम्म प्रत्येक दोस्रो हप्ता आयोजना हुने सिरिजको अन्तिम प्रतियोगिता उपत्यका बाहिर आयोजना हुनेछ ।