पीएम कप : बागमतीको नजर दोस्रो जित

काठमाडौं । प्रधानमन्त्री कप (पीएम कप) एकदिवसीय पुरुष क्रिकेट प्रतियोगितामा आज (सोमबार) दुई खेलहरु हुँदैछ ।

कीर्तिपुरस्थित टियु क्रिकेट मैदानमा बागमती प्रदेशले सुदूरपश्चिम प्रदेशसँग प्रतिस्पर्धा गर्नेछ । दुई टिमबीचको खेल बिहान ९ बजे सुरु हुनेछ ।

सुदूरपश्चिमविरुद्ध मैदान उत्रदा बागमती प्रदेश लगातार दोस्रो जितको खोजीमा हुनेछ ।

राष्ट्रिय टिमका कप्तान समेत रहेका ज्ञानेन्द्र मल्लको कप्तानीमा बागमतीले पहिलो खेलमा नेपाल पुलिस क्लबलाई हराएको थियो ।

आइतबार भएको खेमा बागमतीले पुलिसमाथि ७ विकेटको जित निकालेको थियो ।

समूह 'बी' मा रहेको बागमतीले २ अंक जोडेको छ । बागमती तालिकाको शीर्ष स्थानमा रहेको छ ।

सुदूरपश्चिमको भने यो पहिलो खेलमा हो । पहिलो खेलमा सुदूरपश्चिम बागमतीलाई हराएर सुखद सुरुवात गर्न चाहन्छ ।

मुलपानीस्थित मुलपानी क्रिकेट मैदानमा हुने खेलमा गण्डकी र प्रदेश-१ भिड्ने छन् ।

गण्डकी र प्रदेश १ पहिलो जितको खोजीमा हुनेछ ।

समूह 'ए' मा रहेको दुबै टिमले अंक जोड्न सकेका छैनन् ।

पहिलो खेलमा गण्डकी आर्मीसँग र प्रदेश-१ एपीएफसँग पराजित भएको थियो ।