सुदूरपश्चिम स्पोर्टस अवार्ड चैतमा

धनगढी । दोस्रो संस्करणको ‘एनएसजेएफ सुदूरपश्चिम स्पोर्टस अवार्ड २०७७’ चैतमा आयोजना हुने भएको छ ।

नेपाल खेलकुद पत्रकार मञ्च कैलालीले आइतबार पत्रकार सम्मेलन गर्दै अवार्ड चैत ६ गते आयोजना गरिने जानकारी गराएको छ ।

सुदूरपश्चिम स्पोर्टस अवार्डमा २०७६ सालभर उच्च प्रदर्शन गरेका राष्ट्रिय तथा अन्तर्राष्ट्रिय क्षेत्रमा सफल खेलाडी र प्रशिक्षकलाई विभिन्न विधाहरु गरी ९ वटा विधामा अवार्ड प्रदान गरिने आयोजकले जनाएको छ । अवार्डमा सुदूरपश्चिम प्रदेशका खेलाडी तथा प्रशिक्षकहरुलाई मात्रै समावेश गरिने छ ।

पहिलो संस्करणमा ६ वटा विधामा अवार्ड प्रादन गरिएकोमा दोस्रो संस्करणमा तीन वटा विधाहरु थपिएका छन् ।

अघिल्लो वर्षमा जस्तै यस वर्ष उत्कृष्ट खेलाडी पुरुष र महिला, उत्कृष्ट प्रशिक्षक, वर्ष युवा खेलाडी, स्पेशल अवार्ड र लाईफटाइम एचिभमेन्ट अवार्डहरुका साथै यो वर्षदेखि पिपल्स च्वाईस अवार्ड तथा सुदूरपश्चिम आईकन महिला र पुरुष विधामा नगद सहित अवार्ड प्रदान गरिनेछ ।

उत्कृष्ट खेलाडी पुरुष र महिला, उत्कृष्ट प्रशिक्षक र पिपल्स च्वाईस अवार्ड गरी चार विधाका विजेतालाई नगद ३० हजार सहित ट्रफी मेडल र प्रमाणपत्र वितरण गरिनेछ भने वर्ष युवा खेलाडी, स्पेशल अवार्ड र लाईफटाइम एचिभमेन्ट अवार्डका विजेताहरुलाई नगद २५ हजार सहित ट्रफी मेडल र प्रमाणपत्र प्रदान गरिनेछ ।

सुदूरपश्चिम आईकन विधाका महिला र पुरुष विधाका विजेतालाई नगद २० हजार सहित ट्रफी मेडल र प्रमाणपत्र प्रदान गरिनेछ । त्यसका साथै विभिन्न विधाका विजेताहरुलाई विभिन्न गिफ्ट ह्याम्पर प्रदान गरिनेछ ।

सुदूरपश्चिम आईकन महिला तथा पुरुष विधामा भने सुदूरपश्चिम प्रदेशको प्रतिनिधित्व गर्दै राष्ट्रिय तथा अन्तराष्ट्रिय खेलकुद क्षेत्रमा सफल भएका खेलाडीहरु मात्रै समावेश गरिनेछन् । यो दुई विधा प्रदेशका खेलाडीहरुको हौसला र प्रोत्सहान गर्नका लागि समावेश गरिएको जानकारी गराईन्छ ।

अवार्ड कार्यक्रम डिसहोम एक्सन स्पोर्टसबाट प्रत्यक्ष प्रसारण हुनेछ भने धनगढीका स्थानीय टेलिभिजनहरुका साथै विभिन्न संञ्चार माध्यमहरु र सामाजिक सञ्जालबाट पनि प्रत्यक्ष प्रसारण गरिने आयोजकले जनाएको छ ।