तिलक भन्छन्, ‘खेलको मज्जा लिए’

काठमाडौं । बागमती प्रदेशले प्रधानमन्त्री कप राष्ट्रिय पुरुष एकदिवसीय क्रिकेट प्रतियोगितामा विजयी सुरुवात गर्यो ।

आईतबार विहान त्रिभुवन विश्वविद्यालय (टीयु)को मैदानमा बागमती प्रदेशले साविक विजेता नेपाल पुलिस क्लबलाई ७ विकेटले पराजित गर्न सफल रह्यो ।

सुरुवाती बलिङ गरेको बागमतीलाई जित दिलाउन किफायती बलिङ गरेका युवा खेलाडी तिलक राज भण्डारी र नन्दन यादवले समान ४ विकेट लिए ।

पुलिसविरुद्ध शानदार सुरुवात गरेका तिलक खेलको म्यान अफ दि म्याच घोषित भए । सिनियर क्रिकेटमा पहिलो राष्ट्रिय प्रतियोगिता खेलिरहेका तिलकले टोलीका सिनियर खेलाडीले हौसलाले अवसर जुटेको बताए ।

‘पहिलो खेल थियो । सुरुमा नर्भस थिए । पारस र ज्ञानु दाई (कप्तान ज्ञानेन्द्र मल्ल, पारस खड्का)ले हौसला दिनु भयो । सुरुमा प्रेसर भएपनि दाईको हौसलाले पहिलो बल फ्याँलेपछि राम्रो हुँदै गयो ।’ नेपाल यू–१९ क्रिकेट टिममा सदस्य समेत रहेका नन्दनले भने ।

पहिलो पटक प्रधानमन्त्री कप राष्ट्रिय पुरुष क्रिकेट प्रतियोगितामा सहभागी भएका नन्दनले ७ ओभर ३ बल फ्याँक्दा १ मेडन सहित १७ रनमात्रै खर्चेका थिए । जसमा ४ विकेट झरेको थियो ।

'म्यान अफ दि म्याच' सहित २५ सय प्राप्त गरेका तिलकले टोलीका ठुला खेलाडीले आत्माविश्वास दिएका कारण सोही लयमा बलिङ चलेको बताए ।

‘दाईहरुले खेलमा मज्जा लिनुपर्छ भनेका थिए । मैले त्यही लिए । आत्माविश्वास प्राप्त भयो । नराम्रो बल हुँदा पनि राम्रो गर्नुपर्छ भन्नुभयो । त्यसैले पनि लयमा बलिङ चल्यो ।’ तिलकले भने ।

यसअघि टस हारेर फिल्डिङ गरेको पुलिसले २९ ओभर ३ बलमा अल आउट हुँदै १ सय ११ रनमा बनाएको थियो ।

उसका कुनै पनि खेलाडीले दोहोरो अंक बनाउन सकेनन् । पुलिसका आरिफ शेखले सर्वाधिक २१ रन जोडे ।

जवाफी ब्याटिङमा उत्रिएको बागमती प्रदेशका उप–कप्तान पृथु बास्कोटाले सर्वाधिक ४८ रन जोडे । उनले ६६ बल खेलेका थिए ।

युवा खेलाडी इशान पाण्डेले ६६ बल खेल्दै १७ रन जोडेका थिए । बागमतीले ३४ ओभर ४ बलमा लक्ष्य पुरा गरेको थियो । उपकप्तान पृथुले अन्तिम बलमा छक्का हिर्काएका थिए ।

विजयी टोलीका कप्तान ज्ञानेन्द्र मल्लले पुलिसविरुद्ध आफ्ना युवा खेलाडीले उत्कृष्ट प्रदर्शन गर्न सफल रहेको बताए । उनले युवा खेलाडीलाई हौसला दिनुुपर्ने उल्लेख गरे ।

‘युवा खेलाडीले राम्रो खेले । पृथुले पनि धेरै पछि कमब्याम गर्दै राम्रो खेल्न सफल भए । अब अर्काे खेलको लागि ध्यान दिन जरुरी छ ।’ मल्लले भने ।

पराजित टोलीका कप्तान मञ्जित श्रेष्ठले ब्याटिङ नचल्दा हार ब्यहोरेको स्विकार गर्दै अर्को खेलमा बलियो बनेर मैदान फर्कने बताए ।

‘समस्या ब्याटिङमा देखियो । योजना अनुसार खेल गएन । जस्तो खेल्नुपर्ने हो त्यो खेलाडीबाट भएन । अर्काे पटक बलियो भएर मैदान फर्कन्छौं ।’ उनले भने ।

पुलिसले ७ गते सुदुरपश्चिमसँग खेल्नेछ भने बागमतीले सोमबारनै सुदुरपश्चिमसँग खेल्ने तालिका रहेको छ ।