ज्ञानेन्द्र बागमती खेलकुद विकास परिषदको सदस्य नियुक्त

काठमाडौं । नेपाली राष्ट्रिय क्रिकेट टिमका कप्तान ज्ञानेन्द्र मल्ल बागमती प्रदेश खेलकुद विकास परिषद्को बोर्ड सदस्यमा नियुक्त भएका छन् ।

बागमती प्रदेश सरकारको सामाजिक विकास मन्त्रालयले शनिबार कप्तान ज्ञानेन्द्रलाई खेलकुद विकास परिषद्को सदस्य नियुक्त गरेको हो ।

नेपाल क्रिकेट संघ (क्यान) का सदस्य छुम्बी लामाले कप्तान ज्ञानेन्द्रलाई ५ वर्षको लागि परिषद्को सदस्य नियुक्त गरेको जानकारी दिए ।

'राष्ट्रिय खेलकुद परिषद् (राखेप) अन्तर्गतको प्रदेश खेलकुद विकास परिषद्को सदस्यमा एक अन्तर्राष्ट्रिय खेलाडी हुनु पर्ने प्रावधान रहेको छ,' लामाले भने, 'क्रिकेटबाट अन्तर्राष्ट्रिय खेल खेलिसकेका र कप्तान रहेका उहाँलाई पाँचको लागि सदस्यमा नियुक्त गरेको हो ।'

ज्ञानेन्द्रले बागमती प्रदेशबाट राजधानीमा जारी प्रधानमन्त्री कप क्रिकेट खेल्दैछन् । ज्ञानेन्द्र टिमको कप्तान समेत हुन् ।

यस्तै बागमती प्रदेशले पीएम कप खेल्ने टिमलाई ट्रयाक सुट प्रदान गरेको छ । प्रदेश सरकारले टिमका खेलाडीलाई
म्याच फि वापत दैनिक २ हजार दिने समेत जनाएको छ ।

त्यस्तै बागमती प्रदेश क्रिकेट संघले प्रतियोगितामा शतक बनाउने आफ्ना खेलाडीलाई १० हजार पुरस्कार दिने घोषणा समेत गरेको छ ।

त्यसबाहेक अर्धशतक हान्ने खेलाडी र पाँच विकेट लिने खेलाडीलाई ५/५ हजार दिने संघले जनाएको छ । हरेक खेलमा ३ विकेट लिनेलाई भने ३ हजार दिईने छ ।