युभेन्ट्स क्वाटरफाइनलमा

एजेन्सी । युभेन्ट्स कोपा इटालिया फुटबलको क्वाटरफाइनलमा प्रवेश गरेको छ ।

बुधबार राति भएको खेलमा जिनोआलाई अतिरिक्त समयमा ३-२ गोल अन्तरले पराजित गर्दै युभेन्ट्स क्वाटरफाइनलमा पुगेको हो ।

घरेलु मैदानमा युभेन्ट्सलाई जित दिलाउन डिजान कुलुसेभ्स्की, अल्भारो मोराटा र हम्जा राफियाले एक एक गोल गरे ।

जिनोआका लेननार्ट सिबोरा र फिलिप्पो मेलेगोनीले एक एक गोल फर्काए ।

खेलको दोस्रो मिनेटमा कुलुसेभ्स्कीले गोल गर्दै युभेन्ट्सलाई अग्रता दिलाएका थिए ।

खेलको २३ औं मिनेटमा मोराटाले गोल गर्दै युभेन्ट्सलाई २-० को अग्रता दिलाए ।

तर, खेलको २८ औं मिनेटमा जिनोआका सिबोराले गोल गर्दै खेल २-१ को स्थितिमा ल्याए ।

खेलको ७४ औं मिनेटमा जिनोआका फिलिप्पोले गोल गरेपछि खेल २-२ को बराबरीमा सकिएको थियो ।

त्यसपछि खेल अतिरिक्त समयमा गएको थियो ।

अतिरिक्त समयमा सब्सिच्युट खेलाडी हाम्जा नायक बने ।

उनले खेलको १०५ औं मिनेटमा गोल गर्दै युभेन्ट्सलाई ३-२ को महत्वपूर्ण जित दिलाए ।

हाम्जा खेलको ८८ औं मिनेटमा क्रिस्टियानो रोनाल्डोको स्थानमा मैदान छिरेका थिए ।

अर्को खेलमा इन्टर मिलानले फियोरेन्टिनालाई अतिरिक्त समयमा २-१ ले पराजित गरेको छ ।

त्यस्तै नापोलीले इम्पोलीलाई ३-२ ले पराजित गरेको छ ।