६ महिने लिगसहित एन्फाको क्यालेन्डर तयार

काठमाडौं । अखिल नेपाल फुटबल संघ (एन्फा)ले ६ महिने ए डिभिजन लिग सहितको वार्षिक क्यालेन्डर तयार पारेको छ ।

एन्फाको प्रतियोगिता कमिटिले शीर्ष डिभजिनको लिग सहित अर्को वर्षको वार्षिक क्यालेन्डर तयार पारेको हो ।

एन्फाले आगामी वर्षको ए डिभिजन लिग भाद्रदेखि माघसम्म ६ महिना सञ्चालनको तयारी गरेको छ । यसअघि करिब तीन महिने लिग एन्फाले सञ्चालन गर्दै आएको थियो ।

घरेलु फुटबलको मेरुदण्ड मानिने शीर्ष डिभिजनको लिग छोटो समयमात्र सञ्चालन भएको भन्दै एन्फाको आलोचना हुँदै आएको थियो । अर्को वर्ष एन्फाले कम्तिमा ६ महिना लिग फुटबल सञ्चालन गर्ने गरि क्यालेन्डर तयार पारेको हो ।

विश्व फुटबलको सर्वोच्च निकाय फिफा र एसियाली फुटबल महासंघ (एएफसी)ले समेत कम्तीमा ६ महिना लिग सञ्चालनका लागि एन्फालाई दबाब दिदै आएका थिए ।
एन्फाको वार्षिक क्यालेन्डर अनुसार बैशाखमा फुटसल, ए डिभिजन लिग र पुरुषको यू–२२ अन्तर नगरपालिका फुटबल प्रतियोगिता हुनेछ ।

यस्तै, स्कुले प्रतियोगिताको रुपमा यू–१४ क्विक्स कप नगरस्तरमा जेठदेखि असारसम्म, जिल्ला स्तरमा श्रावणदेखि भाद्रसम्म, प्रदेश स्तरमा आश्विनदेखि कात्तिक र राष्ट्रिय स्तरमा मंसिरसम्म सञ्चालन गरिनेछ ।

एन्फाले जेठ महिनामा ४ राष्ट्र सम्मिलित महिलाको अन्तराष्ट्रिय फुटबल प्रतियोगिता खेलाउने कार्यक्रम तयार गरेको छ ।

यस्तै, शहिद स्मारक राष्ट्रिय सी डिभिजन लिगको छनोट र ललित स्मृति यू–१८ प्रतियोगिता जेठदेखि असारमा सम्पन्न गर्ने एन्फाको योजना छ ।

नेपालले जेठ २४ मा विश्वकप छनोटको जोर्डनविरुद्धको खेल दशरथ रंगशालामा खेल्नेछ ।

एन्फाले उप मेयर कप राष्ट्रिय महिला लिगको पहिलो चरण श्रावणदेखि भाद्रसम्म, दोस्रो चरण कात्तिकदेखि मंसिरसम्म र अन्तिम चरण पौषदेखि फाल्गुनसम्म सञ्चालन गर्ने तयारी गरेको छ ।

यस्तै, ए डिभिजन लिग अघि एन्फा कप नकआउट फुटबल प्रतियोगिता सञ्चालन गरिने क्यालेन्डरमा उल्लेख छ । एन्फा कप भाद्र पहिलो साता सञ्चालन गर्ने तालिकामा छ ।

यस्तै, साफका उमेर समूहका प्रतियोगिता यू–१९ महिला च्याम्पियनसिप असार २९ देखि श्रावण ७ सम्म, यू–१६ महिला च्याम्पियनसिप भाद्र २ देखि ११ सम्म, साफ यू–१५ असोज १५ देखि २४ सम्म, साफ यू–१८ असोज २९ देखि कात्तिक ७ सम्म सञ्चालन हुनेछ ।

यस्तै, सिनियर साफ च्याम्पियनसिप बंगलादेशमा भाद्र २९ देखि असोज ९ गतेसम्म सञ्चालन हुने पक्का भईसकेको छ ।

यस्तै, सहिद स्मारक राष्टिय ए डिभिजन लिग भाद्रदेखि माघसम्म, बी डिभिजन लिग पौषदेखि माघसम्म, जिल्ला लिग पौषदेखि माघसम्म, सी डिभिजन लिग माघदेखि फाल्गुनसम्म, प्रदेश लिग फाल्गुन र एन्फा प्रेसिडेन्ट लिग चैतमा सञ्चालन गर्दै एन्फाले घरेलु फुटबल समापन गर्नेछ ।

एन्फाले वर्ष २०७७ को खेल तालिका समेत क्यालेन्डरमा उल्लेख छ । गत सिजन बाँकी रहेको बी डिभिजन लिगका ३४ खेल फागुन ११ खेलदेखि सञ्चालन गर्ने तयारी गरेको एन्फाले बाँकी रहेको प्रदेश लिग माघदेखि सञ्चालन गर्ने तयारी गरेको छ । प्रदेश लिग अन्तर्गत बागमती, प्रदेश २ र सुदुरपश्चिमको प्रतियोगिता गर्न बाँकी छ ।

एन्फाले फागुनमा एन्फा प्रेसिडेन्ट कप सञ्चालन गर्ने क्यालेन्डरमा उल्लेख छ ।

यस्तै, सी डिभिजन लिग चैत १ देखि ३० गतेसम्म, जिल्ला लिग चैतमा, चार राष्ट्र सम्मिलित पुरुषको फुटबल प्रतियोगिता फागुन २२ देखि २९ गतेसम्म सञ्चालन गर्ने लक्ष्य छ ।

यस्तै, विश्वकप छनोटको खेल चैत १३ र १७ गते दशरथ रंगशालामा आयोजना गर्ने र फुटसल प्रतियोगिता चैत १ गतेबाट बैशाख ७ गतेसम्म सञ्चालन गर्दै यस वर्षको फुटबल सिजन समापन गर्ने एन्फाको योजना छ ।