नेपालगन्ज । नेपालगन्जमा प्रथम श्याम थापा स्मृति फुटबल प्रतियोगिता आयोजना हुने भएको छ ।
पूर्व राष्ट्रिय खेलाडी स्वर्गीय श्याम थापा ‘हुइया’ को स्मृतिमा आयोजना हुने प्रतियोगिता पुस २७ गतेबाट सुरु हुने भएको हो ।
आयोजक जयकिसान स्पोर्टस् क्लब र खजुरा गाउँपालिकाले शुक्रबार पत्रकार सम्मेलन गरी प्रतियोगिता माघ ५ गतेसम्म आयोजना हुने जनाएको छ ।
खजुरा गाउँपालिका–१ स्थित मैटहवा माविको फुटबल मैदानमा आयोजना हुने प्रतियोगितामा भारतका दुई क्लबसहित १४ टिमले प्रतिस्पर्धा गर्ने छन् ।
प्रतियोगितामा मुसुरिया फुटबल एकेडेमी, कैलाली, राजापुर, बर्दिया, युएनविसि, दाङ, एसएसएफय, दाङ, गुर्माकोट, सुर्खेत, चन्द्रनाथ, जुम्ला, सिटि युथ एकेडेमी, कोहलपुरले प्रतिस्पर्धा गर्ने छन् ।
यस्तै न्यू डाँफे स्पोर्टस्, डि गाउँ, धम्बोझी स्पोर्टस् क्लब, नेपालगन्ज, साहारा एफ सी, लखनऊ, साहारा एकेडेमी, लखनऊ, जय किसान स्पोर्टस् क्लब, सैनिक र गौरीगंगा, धनगढीको सहभागिता हुनेछ ।
अनुमानित १२ लाख बजेट रहेको प्रतियोगिताको विजेताले १ लाख पाँच हजार रुपैयाँ प्राप्त गर्ने छन् । त्यसैगरी उपविजेताले ५५ हजार पाउने छन् ।
प्रतियोगिताको उत्कृष्ट खेलाडीले १५ हजार रुपैयाँ, सर्वाधिक गोलकर्ताले १५ हजार रुपैयाँ र हरेक खेलमा म्यान अफ द म्याचलाई पुरस्कार प्रदान गरिनेछ ।
दुई वर्ष अगाडी थापाको दुर्घटनामा निधन भएको थियो ।
