काठमाडौं । आयोजक कोहलपुर क्रिकेट एकेडेमी (केसीए) , न्यु दर्पण युथ क्लब र बिबि वारियर्स कोहलपुर ओपन क्रिकेटको सेमिफाइनलमा प्रवेश गरेका छन् ।
बाँकेको कोहलपुरमा बिहीबार भएको क्वाटरफाइनलमा जित निकाल्दै तीन टोलीले अन्तिम चारको यात्रा तय गरेका हुन् ।
कोहलपुर प्रस्तावित अन्तर्राष्ट्रिय क्रिकेट मैदानमा भएको पहिलो क्वाटरफाइनलमा न्यु दर्पणले कारकाँदो क्रिकेट क्लबलाई १४ रनले पराजित गर्यो ।
न्यु दर्पणले दिएको ९२ रनको लक्ष्य पछ्याउने क्रममा कारकाँदोले निर्धारित १५ ओभरमा ८ विकेट गुमाएर ७७ रन मात्र बनाउन सक्यो ।
कारकाँदोको लागि संगम कंडेलले ३४ रन तथा उत्कर्ष विश्वकर्माले ११ रन बनाउनु बाहेक अन्य ब्याट्सम्यानले दोहोरो अंक जोड्न सकेनन् । न्यु दर्पणका बलर रेशम सिंह ठकुरी र दिप रानाले २/२ विकेट लिए।
यस अघि पहिले ब्याटिङ गरेको न्यु दर्पणले निर्धारित १५ ओभरमा ७ विकेट गुमाएर ९१ रन बनाएको थियो । उसको लागि दिपक बिसीले ३७ तथा निर्मल बिसीले २५ रन बनाए । कारकाँदोका हुसेन अलिले २ विकेट लिए ।
दोस्रो क्वाटरफाइनलमा आयोजक कोहलपुरले च्याम्पियन्स स्पोर्ट्स क्लबलाई ३ रनले पराजित गर्यो। कोहलपुरले दिएको ९८ रनको लक्ष्य पछ्याउने क्रममा च्याम्पियन्सले निर्धारित १५ ओभरमा ७ विकेट क्षेतिमा ९४ रन मात्र बनाउन सक्यो।
च्याम्पियन्सका ब्याट्सम्यान रोहन केसीले २८ बलमा ३ छक्का र २ चौका मद्दतले ४४ रन बनाए । राहुल शर्माले १५ तथा सुनिल खड्काले १० रन बनाए । कोहलपुरका रमेश सिंहले सर्वाधिक ३ विकेट तथा अजय शहानी र लभकुश यादवले २/२ विकेट लिए।
यस अघि कोहलपुरले १४.३ ओभरमा सम्पूर्ण विकेट गुमाएर ९७ रन बनाएको थियो । उसका लागि सुजल केसीले ३१, रोशन शाहले २१ तथा सुरज दासले १२ रन योगदान दिए । च्याम्पियन्सका सोम शर्मा र सुनिल खड्काले ३/३ विकेट लिए ।
तेस्रो क्वाटरफाइनलमा बिबी वारियर्स नेपालगन्जले युभीसीसी कोहलपुरलाई ६ विकेटले पराजित गर्यो। युभीसीसीले दिएको ७८ रनको लक्ष्य बिबी वारियर्सले ८.४ ओभरमा ४ विकेट गुमाएर ८१ रन बनायो।
बिबी वारियर्सको लागि प्रनित थापाले अविजित २९ रन, शाहिद अन्सारीले २० तथा सिद्धान्त राज शाहीले १२ रन बनाए।
यस अघि युभीसीसी कोहलपुरले निर्धारित १५ ओभरमा ५ विकेट क्षेतीमा ७७ रन बनएको थियो। उसको लागि कमल थापाले सर्वाधिक २३ रन तथा सुमन गुरुङ र आलोक चौधरीले समान १९ रन बनाए । बिबि वारियर्सका निजामुद्दिन हलवाई र आकाश बिस्टले २/२ विकेट लिए ।
