दक्षिण अफ्रिकालाई सिरिज

एजेन्सी । दक्षिण अफ्रिकाले श्रीलंकाविरुद्धको दुई खेलको टेस्ट सिरिज जितेको छ ।

जोहन्सवर्गमा मंगलबार दोस्रो टेस्टमा श्रीलंकालाई १० विकेटले पराजित गर्दै घरेलु टोलीले सिरिज २-० ले जितेको हो ।

टस जितेर पहिले ब्याटिङ गरेको श्रीलंकाले पहिलो इनिङ्समा अलआउट हुँदै १ सय ५७ रन बनायो ।

खराब प्रदर्शन गरेको श्रीलंकाका लागि कुशल परेराले ६० रनको अर्धशतकीय इनिङ्स खेले ।

यस्तै डी सिल्भाले २९ रन जोड्दा दुशमान्था चामिराले २२ रन जोडे ।

दक्षिण अफ्रिकाका एन्रीच नोर्ट्जेले ६ विकेट लिए । विन मुल्डरले ३ विकेट लिए ।

दक्षिण अफ्रिकाले भने पहिलो इनिङ्समा ३ सय २ रन बनाएको थियो ।

दक्षिण अफ्रिकाका डीन एल्गरले १ सय २७ रन को शतकीय इनिङ्स खेले । भान डेर डुसेनले ६७ रन बनाए ।

श्रीलंकाका विश्व फर्नान्डोले ५ विकेट लिए ।

दोस्रो इनिङ्समा कप्तान दिमुथ करुनारत्नेले १ सय ३ रनको शतकीय इनिङ्स खेलेपनि श्रीलंका २ सय ११ रनमा अलआउट भएपछि दक्षिण अफ्रिकाले ६७ रनको लक्ष्य प्राप्त गर्यो ।

उक्त लक्ष्य दक्षिण अफ्रिकाले बिना विकेटको क्षतिमा पुरा गर्यो ।

दक्षिण अफ्रिकाका लागि दोस्रो इनिङ्समा एडिन मार्करामले अविजित ३६ रन जोड्दा डीन एल्गर ३१ रनमा अविजित रहे ।

विश्व टेस्ट च्याम्पियनसिप अन्तर्गतको सिरिजको पहिलो टेस्टमा दक्षिण अफ्रिकाले एक इनिङ्स ४५ रनको जित निकालेको थियो ।