आर्सनलको नजर अब युरोपतिर

एजेन्सी । खालि ११ दिन अगाडिसम्म मात्र, वेस्ट ब्रुमका व्यवस्थापक साम एलाडायसी भनिरहेका थिए, आर्सनल उनका लागि रेलिगेसनको प्रतिद्वन्द्वी हो । तर यही आर्सनलले पछिल्ला केही दिनमा यसरी आफूलाई फेरेको छ कि यो रेलिगेसनबाट बच्न संघर्ष गर्ने टिम त रहेन नै, बरू उसको नजर अब युरोपतिर पो छ । हुन् पनि, आर्सनल रेलिगेसनबाट अहिले १२ अंक अगाडि छ । जति बेला एलाडायसीले वेस्ट ब्रुम सम्हालेको थियो, आर्सनल १५ औं स्थानमा थियो ।

त्यति बेला अन्तिम तीन स्थानबाट यो लन्डनको क्लब खालि चार अंक मात्र अगाडि थियो । उसले लिगका १० खेलमा खालि एकै जित मात्र देखेको थियो । तर अहिले आर्सनलले चेल्सी, ब्राइटन र वेस्ट ब्रुममाथि लगातार तीन जित निकालेको छ । अनि अंक तालिकाको ११ औं स्थानमा उक्लेको छ । त्यस स्थानबाट शीर्ष चार अब उसका लागि खालि छ अंकको दूरी मात्र भएको छ । यसो भनेको आर्सनलको पहुँच युरोपतिर हुनु नै त हो, जादुयी चार स्थान नजिक पुगेकै हो ।

त्यसैले आर्सनल व्यवस्थापक मिखेल आर्टेटा भनिरहेका छन्, ‘अहिले एकाएक सबै राम्रो हुन थालेको छ ।’ आर्सनलको यो यात्राले केही स्तब्ध भएका छन् भने केही आश्चर्य मानिरहेका छन् । यसबीच क्लबका पूर्व खेलाडी मार्टिन केवन पनि के कम, उनले पनि भनेका छन्, अब आर्सनलको काम भनेको युरोपतिर नजर लगाउनु नै हो । अर्का पूर्व खेलाडी इयान राइटले आर्सनलले अहिलेसम्म तय गरेको यात्राको खुबै ठीक ढंगले विश्लेषण गरेका छन् ।

उनली मान्छन्, लगातार खराव नतिजा बेहोरिरहेको बेला खेलाडीमा आत्मविश्वास भन्ने नै थिएन्, तर आर्टेटाले उक्साएपछि वेस्ट ब्रुमविरुद्ध तिनै खेलाडीको प्रदर्शन पूरा आत्मविश्वासले भरिएको थियो । राइटले भनेका छन्, ‘अब खेलाडीले आफ्नो प्रदर्शनमा विश्वास गर्न थालेका छन् । यसको धेरै श्रेय आर्टेटालाई जानु पर्छ । एकपल्ट आत्मविश्वास फर्केपछि खेलाडीको प्रदर्शन नै बेग्लै हुन्छ ।’ त्यसमाथि आर्सनलका लागि युवा खेलाडीले अझ राम्रो खेल्न थालेका छन् ।

आर्टेटा आफै पनि सबै घटनाक्रमलाई लिएर खुसी छन्, उनको अध्यारो मुखमा अहिले उज्यालो फर्केको छ । उनी भन्छन्, ‘हामीले आर्सनलबाट यस्तै प्रदर्शन चाहेको थियौं, जुन पछिल्ला तीन खेलमा प्राप्त भएको छ । यो यस्तो आर्सनल टिम हो, जससँग केही गरेर देखाउने आत्मविश्वास छ । त्यसैले सबै खेलाडी अहिले खुलेर खेलिरहेका छन् । यस्तै खेलले त नतिजा आउने हो ।’ नयाँ परिस्थितिमा तिनै आर्टेटाको आलोचना गर्ने अब उनको प्रशंसा गर्ने पनि भएका छन् ।

–बीबीसी स्पोर्टसबाट स्वतन्त्र अनुवाद गरिएको ।